ນັກວິທະຍາສາດ ການາດາ ຄົ້ນພົບວັກຊີນຮັກສາໂຣກ HIV ກຽມທົດສອບກັບຄົນບໍ່ມີເຊື້ອ HIV ໃນທ້າຍປີນີ້

ເມື່ອວັນທີ 15 ທັນວາ 2016 ປີທີ່ຜ່ານມາ ສຳນັກຂ່າວຣັດເຊຍທູເດຍ໌ ລາຍງານວ່າ ນັກວິທະຍາສາດຈາກມະຫາວິໄລ ເວສເທຣິນ ອອນຕາຣິໂອ ປະເທດ ການາດາ ໄດ້ເຮັດການຄິດຄົ້ນວັກຊີນ HIV-001 (SAV001) ເຊິ່ງມີເປົ້າໝາຍເພື່ອໃຊ້ໃນການຮັກສາຜູ້ປ່ວຍທີ່ຕິດເຊື້ອ (HIV- Human Immunodeficiency Virus) ໂດຍໄດ້ທຳການທົດລອງສັກວັກຊີນດັ່ງກ່າວກັບຜູ້ຕິດເຊື້ອທັງໝົດ 33 ຄົນ ພົບວ່າຮ່າງກາຍຂອງຜູ້ປ່ວຍມີປະຕິກິລິຍາໃນການຕອບສະໜອງກັບວັກຊີນໃນທາງທີ່ດີ ສາມາດສ້າງພູມຄຸ້ມກັນໄດ້ ເຮັດໃຫ້ການທົດລອງຂັ້ນທຳອິດຜ່ານໄປໄດ້ດ້ວຍດີ

ທັງນີ້ການທົດສອບກັບຜູ້ຕິດເຊື້ອ 33 ຄົນ ຍັງເປັນພຽງການທົດສອບຂັ້ນທຳອິດ ເຊິ່ງນັບຈາກນີ້ນັກວິທະຍາສາດຕ້ອງລໍຖ້າກັບຜົນການທົດສອບໃນຄັ້ງຕໍ່ໄປ ໃນການທົດສອບກັບອາສາສະໝັກຜູ້ທີ່ບໍ່ໄດ້ຕິດເຊື້ອ HIV ຈາກທົ່ວທະວີບອາເມລິກາເໜືອ ຈຳນວນ 600 ຄົນ ໂດຍເຄິ່ງໜຶ່ງຂອງອາສາສະໝັກ 600 ຄົນນີ້ ຈະຄັດເລືອກຈາກກຸ່ມຜູ້ທີ່ມີຄວາມສ່ຽງໃນການຕິດເຊື້ອສູງທີ່ສຸດ ເຊັ່ນ: ກຸ່ມທີ່ເຮັດອາຊີບຂາຍບໍລິການທາງເພດ,​ ຜູ້ທີ່ໃຊ້ສິ່ງເສບຕິດຜ່ານເຂັມສັກຢາ, ກຸ່ມຮັກຮ່ວມເພດ ເຊິ່ງການທົດສອບດັ່ງກ່າວຈະເລີ່ມຕົ້ນຂຶ້ນໃນເດືອນກັນຍາ 2017

ຖ້າຜົນການທົດສອບການປ້ອງກັນການຕິດເຊື້ອໃນອາສາສະໝັກ 600 ຄົນ ປະສົບຜົນສຳເລັດ ແຜນເປົ້າໝາຍຕໍ່ໄປຄືການທົດສອບຂັ້ນສຸດທ້າຍ ກັບອາສາສະໝັກອີກ 6,000 ຄົນຈາກທົ່ວໂລກ, ທ່ານ ຄັງຊິລຢົງ ຫົວໜ້າທີມວິໄຈວັກຊີນເອສໄອວີ-001 ກ່າວວ່າ “ຖ້າວັກຊີນປະສົບຜົນສຳເລັດໃນການທົດສອບທຸກຂະບວນການ ໄດ້ຜົນຕາມທີ່ຄາດໄວ້ມັນຈະເປັນແສງແຫ່ງຄວາມຫວັງໃນການຢຸດຢັ້ງການລະບາດຂອງເຊື້ອ ເອສໄອວີໃນອານາຄົດໄດ້ ເຊິ່ງນັບເປັນຜົນງານທີ່ຍິ່ງໃຫຍ່ຂອງມະນຸດ”

 

ແຫລ່ງຂ່າວ http://health.kapook.com/view162660.html
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!