ເວັບໄຊ Live Science ລາຍງານເມື່ອວັນທີ 3 ມັງກອນ 2017 ຜ່ານມາວ່າ ປະເທດຝຣັ່ງ ໄດ້ອອກກົດໝາຍ ຫ້າມລົງໂທດທຸບຕີເດັກນ້ອຍທຸກກໍລະນີ ເຖິງແມ່ນວ່າຈະເປັນເລື່ອງຮ້າຍແຮງພຽງໃດກໍຕາມ ຫາກຝ່າຝືນຈະມີໂທດທາງກົດໝາຍ ເຊິ່ງເປັນປະເທດທີ 52 ຂອງໂລກ ຫຼັງຈາກໄດ້ຮັບອະນຸມັດ ໃນວັນທີ 22 ທັນວາ 2016 ຜ່ານມາ
ກົດໝາຍດັ່ງກ່າວ ບັນຍັດໄວ້ໃນກົດໝາຍການປົກຄອງ ໃນສ່ວນຂອງ “ກົດໝາຍພົນລະເມືອງ ແລະຄວາມສະເໝີພາບ” ໂດຍມີການລະບຸໄວ້ວ່າ “ຫ້າມທຳຮ້າຍເດັກນ້ອຍທຸກປະການ ບໍ່ວ່າຈະເປັນທັງຄວາມຮຸນແຮງທາງດ້ານຮ່າງກາຍ ຫຼືຈິດໃຈ ລວມເຖິງການເຮັດໃຫ້ເສື່ອມເສຍກຽດ”
ເມື່ອປີ 2016 ຈາກການວິເຄາະ ຜົນການວິໄຈທີ່ມີມາດົນນານກວ່າ 50 ປີ ພົບວ່າ ເດັກນ້ອຍທີ່ຖືກພໍ່ແມ່ລົງໂທດ ດ້ວຍການທຸບຕິ ຫຼືໃຊ້ຄວາມຮຸນແຮງ ສ່ວນຫຼາຍມີແນວໂນ້ມ ທີ່ຈະຂັດຂືນ ຫຼືມີລັກສະນະທ້າທາຍອຳນາດຂອງ ພໍ່ແມ່ ລວມເຖິງຍັງໄປກະຕຸ້ນບັນຫາທາງສະໝອງ ສົ່ງຜົນໃຫ້ມີພຶດຕິກຳທີ່ຮ້າຍແຮງ ແລະຕໍ່ຕ້ານສັງຄົມ
ຢູ່ໃນຢູໂຣບ ມີຫຼາຍປະເທດ ທີ່ມີກົດໝາຍຫ້າມລົງໂທດເດັກນ້ອຍ ດ້ວຍການໃຊ້ຄວາມຮຸນແຮງກັບເດັກເກືອບທຸກປະເທດແລ້ວ ເຊິ່ງການເຄື່ອນໄຫວຄັ້ງນີ້ ປະເທດຝຣັ່ງ ເຮັດໃຫ້ໃນຢູໂຣບເຫຼືອພຽງ 4 ປະເທດເທົ່ານັ້ນ ທີ່ຍັງບໍ່ທັນໄດ້ອອກກົດໝາຍຫ້າມຕີເດັກ ເຊິ່ງມີປະເທດ ອັງກິດ, ອີຕາລີ, ສະວິດເຊີແລນ ແລະສາທາລະນະລັດເຊັກ