ທ້າວ ລັດຖະເທວາ ພຸດທະວົງ ເກີດໃນວັນຈັນ, ວັນທີ 12 ກັນຍາ ຄ.ສ 1988, ທີ່ບ້ານ ສີສະຫວາດ, ເມືອງ ຈັນທະບູລີ, ນະຄອນຫຼວງວຽງຈັນ ໂດຍເປັນບຸດຂອງທ່ານ ອິນຕອງ ພຸດທະວົງ ( ພະນັກງານການທູດລາວປະຈຳການທີ່ສະຖານເອກອັກຄະລັດຖະທູດລາວທີ່ນະຄອນຫຼວງກົວລາລຳເປີປະເທດມາເລເຊຍ ) ແລະ ທ່ານນາງ ຄຳມີ ຕັນດາວົງ ( ພື້ນຖານຫຼວງພຣະບາງ ); ຕັ້ງແຕ່ຍັງເຍົາໄວ ທ້າວ ລັດຖະເທວາ ພຸດທະວົງ ເປັນນັກຮຽນເກັ່ງໃນລະດັບປະຖົມສຶກສາທີ່ໂຮງຮຽນປະຖົມສຶກສາສົມບູນນາໄຮ່ດຽວສົກຮຽນ 1994 – 1999 ພ້ອມທັງເປັນນັກຮຽນເກັ່ງໃນລະດັບມັດທະຍົມສຶກສາທີ່ໂຮງຮຽນມັດທະຍົມສຶກສາສົມບູນວຽງຈັນສົກຮຽນ 1999 – 2005 ລວມເຖິງໄດ້ຮັບກຽດເປັນນັກສຶກສາລົງຝຶກງານຢູ່ທີ່ ກົມຈັດຕັ້ງ-ພະນັກງານ ສຳນັກງານນາຍົກລັດຖະມົນຕີ ແລະ ພ້ອມທັງເປັນອະດີດນັກສຶກສາລະດັບປະລິນຍາຕີຄະແນນດີເດັ່ນໃນສາຂາວິຊາກົດໝາຍປົກຄອງຈາກຄະນະນິຕິສາດ-ລັດຖະສາດ, ມະຫາວິທະຍາໄລແຫ່ງຊາດລາວໃນສົກສຶກສາ 2005 – 2010 ນໍາດ້ວຍ.
ໃນໄລຍະທີ່ຜ່ານມາທ້າວ ລັດຖະເທວາ ພຸດທະວົງໄດ້ເຄື່ອນໄຫວວຽກງານອັນມີຄວາມພົ້ນເດັ່ນຫລາຍດ້ານໃນສັງຄົມລາວເຊັ່ນ : ເປັນນັກຂ່າວສື່ມວນຊົນໃຫ້ກັບວາລະສານຊີວິດ ແລະ ທຸລະກິດ, ພ້ອມທັງເປັນທີ່ປຶກສາກົດໝາຍນຳດ້ວຍ ແລະ ມາຮອດໃນປັດຈຸບັນນີ້ແມ່ນໄດ້ຮັບກຽດເປັນບັນນາທິການບໍລິຫານກິດຕິມະສັກປະຈຳວາລະສານຄອບ ຄົວ, ບົດຂຽນຫຼາຍໆບົດກ່ຽວກັບວັດທະນະທຳຮີດຄອງປະເພນີລວມເຖິງວິຖີຊີວິດຂອງຄົນລາວທີ່ຂຽນໂດຍ ທ້າວ ລັດຖະເທວາ ພຸດທະວົງແມ່ນໄດ້ຖືກຕີພິມລົງໃນສື່ສັງຄົມຫຼາກຫຼາຍປະເພດເຊັ່ນ: ວາລະສານ, ໜັງສືພິມ ແລະ ສື່ສັງຄົມອອນລາຍຕ່າງໆ.
ໃນວັນອາທິດ, ວັນທີ 25 ກັນຍາ ທີ່ຜ່ານມາທີ່ນະຄອນຫຼວງບາງກອກ, ປະເທດໄທໄດ້ມີພິທີຮັບປະທານລາງວັນເຫມມະຣາດ “ ບຸກຄົນຕົ້ນແບບແຫ່ງປີ ” ຈັດໂດຍມູນນິທິດິນດີນໍ້າໃສແຫ່ງປະເທດໄທຂຶ້ນເປັນປີທຳອິດທີ່ສູນປະຊຸມທຳມະສາດຣັງສິດ, ໂດຍໄດ້ຮັບກຽດປະທານລາງວັນໃນພິທີອັນສະຫງ່າລາສີດັ່ງກ່າວໂດຍໝ່ອມເຈົ້າ ມົງຄົນສະເຫຼີມ ຍຸຄົນ ເຊື້ອພະວົງຊັ້ນສູງແຫ່ງຣາດຊະອານາຈັກໄທ; ມູນນິທິດິນດີນໍ້າໃສແຫ່ງປະເທດໄທສ້າງຕັ້ງຂຶ້ນໃນປີ ພ.ສ 2550 ( ປີຄ.ສ 2007 ) ໂດຍ ໝ່ອມຣາດຊະວົງ ສົມລາກ ກິຕິຍາກອນ ເລຂານຸການ ໃນພຣະເຈົ້າວໍຣະວົງເທີພຣະອົງເຈົ້າໂສມສະວະຣີພຣະວໍຣະຣາຊາທິນັດດາມາດ, ໂດຍດຳເນີນງານທາງດ້ານການອະນຸລັກດິນ, ອານຸລັກນໍ້າ ແລະ ສິ່ງແວດລ້ອມ ທີ່ເປັນຊັບພະຍາກອນທີ່ລໍ້າຄ່າຂອງປະເທດຊາດ ແລະ ມວນມະນຸດໃນໂລກໂດຍສົ່ງເສີມສະໜັບສະໜູນໃຫ້ມີຜືນປ່າເພີ່ມຂຶ້ນໃນປະເທດໄທ; ມູນນິທິດິນດີນໍ້າໃສແຫ່ງປະເທດໄທໄດ້ທາບທາມໂດຍກົງມາຍັງທ້າວ ລັດຖະເທວາ ພຸດທະວົງ ທີ່ນະຄອນຫຼວງວຽງຈັນ ປະເທດລາວໃຫ້ສົ່ງຜົນງານເຂົ້າຄັດເລືອກເພື່ອຮັບປະທານລາງວັນເຫມມະຣາດໂດຍອີງຕາມຜົນງານອັນພົ້ນເດັ່ນຫຼາຍຢ່າງ ແລະ ມີຫຼັກຖານທາງສັງຄົມທີ່ເປັນຮູບປະທຳໂດຍພົ້ນເດັ່ນທີ່ສຸດນັ້ນກໍ່ຄືການປະກອບສ່ວນຢ່າງຕັ້ງໜ້າເຂົ້າໃສ່ການຖະນຸບໍາລຸງພະພຸດທະສາສະໜາ ດ້ວຍການໝັ່ນທຳບຸນເປັນປະຈຳ. ທາງຄະນະກຳມະ ການຜູ້ຊົງຄຸນວຸດທິຈາກມູນນິທິດິນດີນໍ້າໃສແຫ່ງປະເທດໄທໄດ້ພິຈາລະນາເຫັນວ່າທ້າວ ລັດຖະເທວາ ພຸດທະວົງມີຄຸນສົມບັດອັນຄົບຖ້ວນໃນການຮັບລາງວັນ ແລະ ຕົກລົງເຫັນດີມອບລາງວັນເຫມມະຣາດ ຫຼື ລາງວັນສິງຄຳ “ບຸກຄົນຕົ້ນແບບແຫ່ງປີ” ປະຈໍາປີ 2016 ( ພ.ສ 2559 ) ຈາກປະເທດໄທໃຫ້ແກ່ ທ້າວ ລັດຖະເທວາ ພຸດທະວົງ ຈາກປະເທດລາວ ແລະ ໄດ້ບັນທຶກເຫດການປະຫວັດສາດດັ່ງກ່າວວ່າເປັນຄົນລາວຜູ້ທຳອິດທີ່ໄດ້ຮັບລາງວັນເຫມມະຣາດ ຫຼື ລາງວັນສິງຄຳ “ບຸກຄົນຕົ້ນແບບແຫ່ງປີ” ຈາກປະເທດໄທໃນສາຂາຜູ້ນຳດ້ານວັດທະນະທຳຕົ້ນແບບ.
ຂໍ້ມູນຈາກ : ວາລະສານວັດທະນະທຳ (Culture Magazine)
ທີ່ມາຈາກ: unader.com
ຕິດຕາມເລື່ອງດີດີ ບັນເທີງລາວ Lao Entertenment ກົດໄລຄ໌ເລີຍ!