ໂຄງການກໍ່ສ້າງຂົວຂ້າມນ້ຳເຄັມ ລະຫວ່າງແຍກເສັ້ນທາງເລກ 10 ທ່າງ່ອນ, ເມືອງໄຊທານີ ຕັດໃສ່ເສັ້ນທາງເລກ
13 ເໜືອ ອອກບ້ານນາຊາຍທອງເໜືອ ເມືອງນາຊາຍທອງ ນະຄອນຫລວງວຽງຈັນ ທີ່ເລີ່ມກໍ່ສ້າງມາເກືອບ 2 ປີ
ທີ່ສຳເລັດໄປແລ້ວຫລາຍກວ່າ 90% ແລະ ນັບແຕ່ລະດູແລ້ງຜ່ານມາ ໂຄງການດັ່ງກ່າວຖືກໂຈະໄວ້ ຍ້ອນເຈົ້າຂອງ
ໂຄງການສະໜອງທຶນໃຫ້ບໍ່ທັນກັບຄວາມຕ້ອງການ ບວກໃສ່ບໍລິສັດຜູ້ຮັບເໝົາລົງທຶນໄປກ່ອນ ກໍບໍ່ມີທຶນພຽງພໍ
ທີ່ຈະສຶບຕໍ່ກໍ່ສ້າງ, ຊຶ່ງຄາດວ່າຈະຕ້ອງໄດ້ນຳໃຊ້ທຶນອີກປະມານ 7 ແສນກວ່າໂດລາສະຫະລັດ ຈຶ່ງຈະສຳເລັດ ແລະ
ນຳໃຊ້ໄດ້.
ຂົວແຫ່ງນີ້ ເປັນຂົວເບຕົງອັດແຮງ, ຍາວ 70 ກ່ວາແມັດ ແລະ ກວ້າງ 10 ແມັດ ປະກອບດ້ວຍຮາວເຫລັກ 2 ຝາກ,
ໂດຍພະແນກໂຍທາທິການ ແລະ ຂົນສົ່ງ ໄດ້ວ່າຈ້າງບໍລິສັດກໍ່ສ້າງຂົວທາງແຫ່ງໜຶ່ງ ຢູ່ນະຄອນຫລວງວຽງຈັນ ເປັນ
ຜູ້ລົງທຶນກໍ່ສ້າງກ່ອນ, ແຕ່ເມື່ອການກໍ່ສ້າງໃກ້ຈະສຳເລັດ ບໍລິສັດດັ່ງກ່າວເກີດວິກິດການທາງດ້ານການເງິນຈຳເປັນ
ຈຶ່ງເຮັດໃຫ້ກິດຈະການຖືກໂຈະໄປຊົ່ວຄາວ.
ສ່ວນການກໍ່ສ້າງເສັ້ນທາງສາຍນີ້ (ທ່າງ່ອນ-ນາຄູນຍາວເກືອບ 20 ກິໂລແມັດ), ໂດຍແມ່ນອີກບໍລິສັດໜຶ່ງ ເປັນຜູ້
ກໍ່ສ້າງ ແລະ ໄດ້ສຳເລັດມາເປັນເວລາຫລາຍເດືອນແລ້ວ ດ້ວຍການປູຢາງຊັ້ນດຽວ, ແຕ່ນັກວິຊາການ ໃຫ້ຂໍ້ສັງເກດ
ວ່າ: ຍ້ອນພື້ນທາງບໍ່ແໜ້ນ ແລະ ບໍ່ໄດ້ມາດຕະຖານ, ຈິ່ງສົ່ງຜົນເຮັດໃຫ້ເສັ້ນທາງຫລາຍຍ່ານເປ່ເພເກີດເປັນບວກ,
ຂຸມຢູ່ໃນຫລາຍຈຸດ.
ເຖິງຢ່າງໃດກໍດີຖ້າຂົວ ແລະ ເສັ້ນທາງສາຍນີ້ ສຳເລັດການກໍ່ສ້າງສົມບູນ ກໍຈະອຳນວຍຄວາມສະດວກແກ່ການລຳ
ລຽງຂົນສົ່ງສິນຄ້າຈາກພາກເໜືອລົງພາກໃຕ້, ໂດຍບໍ່ເຂົ້າຜ່ານໃຈກາງນະຄອນຫລວງວຽງຈັນດັ່ງຜ່ານມາ ແລະ
ຈະເປັນການຫລຸດຜ່ອນສະ ພາບແອອັດຂອງການສັນຈອນໃນຕົວເມືອງໄດ້ຫລາຍສົມຄວນ.
ຂອບໃຈຂ່າວຈາກ: http://laophatthananews.blogspot.com/2014/08/blog-post_34.html