ດ່ານສາກົນບໍ່ເຕັນ ຄາດມີພາຫະນະ ຜ່ານເພີ່ມຂຶ້ນ ຫລັງເລີ່ມລົງມືກໍ່ສ້າງ ທາງລົດໄຟ ລາວ-ຈີນ

0
1766

ພາຍຫລັງ​ໂຄງການ​ກໍ່ສ້າງ ​ທາງ​ລົດ​ໄຟ​ລາວ-ຈີນ ​ເລີ່​ມລົງມື​ກໍ່ສ້າງ​ ຄາດ​ວ່າ​ຈະ​ມີ​ພາຫະນະ​ເຂົ້າ​ຜ່ານ ​ດ່ານສາກົນ​ບໍ່​ເຕັນ ​​ແຂວງ​ ຫລວງ​ນໍ້າ​ທາ ​​ເພີ່ມ​ຂຶ້ນມື້​ລະ 1000 ກວ່າຄັນ, ເພື່ອ​ເປັນ​ການ​ຮອງ​ຮັບ ​ຕໍ່​ບັນຫາ​ດັ່ງກ່າວ​, ​ຄະນະ​ຮັບຜິດຊອບ​ດ່ານ ​ໄດ້​ມີ​ຄວາມ​ພ້ອມ​ໃນ​ທຸກ​ດ້ານ.

ທ່ານ ພອນ​ໄຊ ຈັນທະ​ສອນ ຫົວໜ້າຄະນະຄຸ້ມຄອງ ດ່ານສາກົນບໍ່​ເຕັນ​ແຂວງ ​ຫລວງ​ນໍ້າ​ທາ ​ໄດ້​ໃຫ້​ສໍາພາດ​ຕໍ່​ສື່​ມວນ​ຊົນ ​ເມື່ອ​ບໍ່​ດົນ​ນີ້​​ວ່າ: ​ເພື່ອ​​ເປັນ​ການ​ຮອງ​ຮັບ ໃຫ້​ກັບ​ພາຫະນະ ຜ່ານ​ດ່ານ​ເພີ່ມ​ຂຶ້ນ​ໃນ​ແຕ່​ລະ​ມື້ ​ຫລັງ​​​ເລີ່​ມ​ການກໍ່ສ້າງ​ທາງ​ລົດ​ໄຟ ​​ລາວ-ຈີນ ຄະນະ​ຮັບຜິດຊອບ​ດ່ານ​ ກໍ​ໄດ້ກະກຽມຄວາມ​ພ້ອມ​ໃນ​ທຸກ​ດ້ານ​ ເປັນຕົ້ນ ພະນັກງານຮັບຜິດຊອບ ໜ່ວຍ​ງານຕ່າງໆ​ ໃຫ້​ເພີ່ມ​ຄວາມ​ເອົາ​ໃຈ​ໃສ່​ ໃນ​ການ​ອໍານວຍ​ຄວາມ​ສະດວກ​ ເພື່ອ​ບໍ່​ໃຫ້​ມີຄວາມ​ແອ​ອັດຢູ່​ດ່ານ​ ເພາະ​ດ່ານ​ລາວ-ຈີນ​ ເປັນ​ດ່ານ​ທີ່​ໃກ້​ກັນ​ ໃນ​ກໍລະນີ​ທີ່ມີ​ລົດ​ຂະໜາດ​ໃຫຍ່​ ມາ​ຈອດ​ຢູ່​ດ່ານ​ຈີນ. ປັດຈຸບັນ ​ຜູ້​ຮັບ​ເໝົາ​ກໍ່ສ້າງ​ທາງ​ລົດ​ໄຟ​ ກໍ​ໄດ້​ສະ​ເໜີ​ກ່ຽວ​ກັບ​ການ​ນໍາ​ເຂົ້າ​ລົດ​ ທີ່​ມາ​ກໍ່ສ້າງ ​ເຊິ່ງຈະ​ມີພາຫະນະ​ ເພີ່ມ​ຂຶ້ນ​ອີກ​ມື້​ລະ 500-1000 ກວ່າຄັນ. ​ພ້ອມ​ນີ້, ກໍ​ຈະ​ໄດ້​ປະສານ​ກັບ ​ພາກສ່ວນ​ທີ່​ກ່ຽວ​ຂ້ອງ​ ໃນ​ການ​ກໍານົດ​ເວລາ​ຢ່າງ​ລະອຽດ​ ເພື່ອ​ຈະ​ມີ​ການ​ຂະຫຍາຍ​ ເວລາ​ການ​​ເປີດ-ປິດ​ດ່ານ.

ສໍາລັບດ່ານສາກົນ​ບໍ່​ເຕັນ ປະກອບ​ມີ​ 2 ດ່ານ​ ຄື ດ່ານ​​ໃຫ້​ບໍລິການ​ ກວດກາຄົນ​ເຂົ້າ-ອອກ​ເມືອງ ​ແລະ ດ່ານ​ພາສີ ​ເຊິ່ງມີ​ລົດ​ເຂົ້າ​-ອອກດ່ານ​ ປະມານ 400 ກວ່າຄັນ/​ວັນ. ມີ​ຄົນ​ເຂົ້າ​ອອກ​ປີ​ໜຶ່ງ​ ມີ​ເຖິງ 250.000 ກວ່າຄົນ, ມີ​ສິນຄ້າ​ຜ່ານ​ເຂົ້າ-ອອກດ່ານ​ໃນ​ມູນ​ຄ່າ 1 ຕື້​ກວ່າ​ໂດ​ລາ​ສະຫະລັດ​ຕໍ່​ປີ ​ແລະ ​ໃນ​ແຜນ​ຕໍ່ໜ້າ ​ກ່ຽວ​ກັບ​ການ​ພັດທະນາ​ ເສດຖະກິດ-ສັງຄົມ ​ດ່ານ​ກໍາລັງ​ກໍ່ສ້າງ ​ດ່ານ​ເພີ່ມ​ຂຶ້ນ​ອີກ 2 ດ່ານ ​ຄືດ່ານ​ລົດ​ໂດຍສານ ​ແລະ ດ້ານ​ລົດ​ບັນທຸກ ​ເພື່ອ​ຮອງ​ຮັບ​ບໍ່​ໃຫ້​ມີ​ການ​​ແອ​ອັດ​ ໃນ​ເວລາ​ເຂົ້າ​ອອກ​.

ຂ່າວ: ສຳນັກຂ່າວສານປະເທດລາວ