ຜູ້ຖືກຫາຄົນນີ້ຊື່ທ້າວ ຄຳສິງ ອາຍຸ 29 ປີ ປະຊາຊົນຢູ່ບ້ານໂພນພະ ເມືອງອານຸວົງ ແຂວງໄຊສົມບູນ ຖືກເຈົ້າໜ້າທີ່ ປກສ ແຂວງຫຼວງນ້ຳທາ ຈັບຕົວຍ້ອນມີການພົວພັນກັບຢາເສບຕິດ ໃນວັນທີ 10 ທັນວາ 2016.
ຜູ້ກ່ຽວສາລະພາບວ່າ: ໄດ້ຮັບການວ່າຈ້າງຈາດນາງ ຍອດ ອາຍຸ 35 ປີ ຢູ່ບ້ານຊຽງກົກໃໝ່ ເມືອງລອງ ແຂວງຫຼວງນ້ຳທາ ເປັນຈຳນວນເງິນ 5 ລ້ານກີບ ເພື່ອຂົນສົ່ງຢາບ້າ ຈຳນວນ 60 ພັນເມັດ ຈາກເມືອງລອງ ແຂວງຫຼວງນ້ຳທາ ລົງມານະຄອນຫຼວງວຽງຈັນ.
ຜູ້ກ່ຽວໄດ້ຕອບຕົກລົງເຮັດ, ແຕ່ກ່ອນໜ້ານັ້ນ ເຈົ້າໜ້າທີ່ ປກສ ແຂວງຫຼວງນ້ຳທາ ໄດ້ຮັບຂ່າວຈາກພົນລະເມືອງດີວ່າຈະມີການຂົນສົ່ງຢາບາດັ່ງກ່າວ ຈຶ່ງໄດ້ຈັດກໍາລັງວິຊາສະເພາະລົງຕິດຕາມແກ້ໄຂທັນທີ ແລະ ເມື່ອທ້າວ ຄຳສິງ ເດີນທາງມາຮອດຄິວລົດແຂວງຫຼວງນ້ຳທາ ຄາດວ່າມີຄົນໂທບອກຜູ້ກ່ຽວວ່າມີການສະກັດຈັບ, ຜູ້ກ່ຽວຈຶ່ງວາງແຜນຖິ້ມຖົງໃສ່ຢາບ້າ 60 ພັນເມັດນັ້ນໄວ້ຢູ່ຕັ້ງນັ່ງໃນຄິວລົດ ແລ້ວທໍາທ່າຍ່າງມາເຫັນ ແລະ ບອກພົນລະເມືອງດີໃຫ້ແຈ້ງຕໍ່ເຈົ້າໜ້າທີ່.
ແຕ່ສຸດທ້າຍ, ສົງໄສຢ້ານໜີບໍ່ລອດ ຜູ້ກ່ຽວຈຶ່ງໄດ້ເຂົ້າມອບຕົວກັບເຈົ້າໜ້າທີ່ດ້ວຍຕົວເອງ ແລະ ຍອມຮັບສາລະພາບວ່າຕົນເອງເປັນຄົນເອົາຖົງໃສ່ຢາບ້າໄປຖິ້ມໄວ້ຢູ່ຕັ່ງນັ່ງນັ້ນ. ປັດຈຸບັນ, ເຈົ້າໜ້າທີ່ ປກສ ແຂວງຫຼວງນ້ຳທາ ກໍາລັງຕິດຕາມຈັບຕົວນາງ ຍອດ ທີ່ເປັນຜູ້ວ່າຈ້າງໃນຄະດີດັ່ງກ່າວນີ້.
ຂ່າວຈາກໜັງສືພິມຄວາມສະຫງົບ