ໃນວັນທີ 19 ທັນວາ 2016 ຜ່ານມານີ້ ມີພິທີມອບແຜນຜັງພັດທະນາເມືອງປາກຊ່ອງ ຈັດຂຶ້ນຢູ່ໂຮງແຮມຈໍາປາສັກແກຣນ ເມືອງປາກເຊ ແຂວງຈໍາປາສັກ, ໂດຍການເຂົ້າຮ່ວມຂອງ ທ່ານ ປອ.ບຸນຖອງ ດີວິໄຊ ກໍາມະການສູນກາງພັກປະຊາຊົນ ປະຕິວັດລາວ ເລຂາຄະນະບໍລິຫານງານພັກແຂວງ ເຈົ້າແຂວງໆຈໍາປາສັກ, ທ່ານ ເລ ແທງ ຮ້າຍ ອະດີດກໍາມະການກົມການເມືອງສູນກາງພັກຄອມມູຍນິດຫວຽດນາມ ອະດີດເລຂາພັກນະຄອນໂຮ່ຈິມິນ, ມີຄະນະນໍາຂັ້ນສູງ, ຄະນະຮັບຜິດຊອບອອກແບບແຜນຜັງ, ນັກທຸລະກິດ ແລະ ພະນັກງານວິຊາການທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ໃນພິທີໄດ້ຜ່ານບົດລາຍງານການສໍາຫຼວດ ແລະ ວາງແຜນຜັງຊີ້ນໍາລວມ, ຜັງແມ່ບົດການພັດທະນາບໍລິເວນໃຈກາງຕົວເມືອງປາກຊ່ອງ ເຊິ່ງເປັນການຮ່ວມມືລະຫວ່າງ 2 ພັກ, 2 ລັດຖະບານ ລາວ-ຫວຽດນາມ ເວົ້າລວມ, ເວົ້າສະເພາະແມ່ນແຂວງຈໍາປາສັກ ແລະ ນະຄອນໂຮ່ຈິມິນ, ເຊິ່ງເລິ່ມຈັດຕັ້ງປະຕິບັດວຽກງານຕົວຈິງແຕ່ເດືອນມີນາ 2013 ຈົນມາຮອດເດືອນສິງຫາ 2016 ຈິ່ງສໍາເລັດ, ປະກອບມີ 3 ໜ້າວຽກໃຫຍ່ຄື: ການກໍານົດແຜນຜັງແນວຄວາມຄິດຍຸດທະສາດໂຄງລ່າງເສັ້ນທາງຕົວເມືອງ ກວມເອົາເນື້ອທີ່ 6.963 ເຮັກຕາ. ການປັບປຸງແຜນຜັງພັດທະນາໃຈກາງຕົວເມືອງປາກຊ່ອງ ກວມເອົາເນື້ອທີ່ 381 ເຮັກຕາ ແລະ ການວາງແຜນຜັງພັດທະນາຈຸດບ້ານທົ່ງກະຕ່າຍ ກວມເອົາເນື້ອທີ່ 162 ເຮັກຕາ. ສິ່ງດັ່ງກ່າວນັ້ນຈະເປັນຂໍ້ມູນ, ເປັນລາຍລະອຽດທີ່ສໍາຄັນ ເພື່ອດໍາເນີນການພັດທະນາເມືອງປາກຊ່ອງ ໃຫ້ເປັນຕົວເມືອງອັນດັນສອງຂອງແຂວງຈໍາປາສັກ ແລະ ເປັນຕົວເມືອງທີ່ບັນລຸການພັດທະນາເສດຖະກິດຮອບດ້ານໃນຕໍ່ໜ້າ.
ໃນພິທີໄດ້ມີການເຊັນມອບ-ຮັບແຜນຜັງພັດທະນາດັ່ງກ່າວ. ຕາງໜ້ານະຄອນໂຮ່ຈິມິນ ເຊັນມອບໂດຍ ທ່ານ ຫງວຽນ ແທງ ຫຍ້າ ຮອງຫົວໜ້າພະແນກແຜນການ ແລະ ການລົງທຶນ ນະຄອນໂຮ່ຈິນມິນ. ຕາງໜ້າແຂວງຈໍາປາສັກ ເຊັນຮັບໂດຍ ທ່ານ ບຸນເນົາ ຟອງຄໍາແດງ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງຈໍາປາສັກ, ໂດຍມີຄະນະນໍາຂັ້ນສູງທັງສອງຝ່າຍເຂົ້າຮ່ວມເປັນສັກຂີພະຍານ.
ຂ່າວ: ຈຳປາໃໝ່