ໃນວັນທີ 9 ທັນວາ 2016 ຜ່ານມາທີ່ວັດພູຈຳປາສັກໄດ້ຈັດພິທີສະເຫຼີມສະຫຼອງຄົບຮອບ 150 ປີຂອງການຄົ້ນພົບ ແລະ ສຶກສາຄົ້ນຄວ້າກ່ຽວກັບມໍລະດົກໂລກວັດພູຈຳປາສັກ ພ້ອມທັງປິດໂຄງການຮ່ວມມືລາວ-ຝຣັ່ງ ໃນການບູລະນະສ້ອມແປງສະຖານບູຮານ ເຊິ່ງໃຫ້ກຽດເຂົ້າຮ່ວມຂອງທ່ານ ສີທົນ ແກ້ວພູວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງ, ທ່ານ ນາງ ໂກຣດີນ ເລີດຸກ ເອກອັກຄະລັດຖະທູດຝຣັ່ງປະຈຳລາວ, ທ່ານ ອຸດົມສີ ແກ້ວສັກສິດ ຫົວໜ້າຫ້ອງການມໍລະດົກໂລກວັດພູຈຳປາສັກ, ມີບັນດາທ່ານມາຈາກພະແນກການ ທີ່ກ່ຽວຂ້ອງຂອງແຂວງ, ເມືອງ, ອົງການຈັດຕັ້ງສາກົນເຂົ້າຮ່ວມຢ່າງພ້ອມພຽງ.
ໃນພິທີທ່ານ ສີທົນ ແກ້ວພູວົງ ໃຫ້ຮູ້ວ່າ: ສະຖານບູຮານວັດພູແມ່ນຕົວຢ່າງຊັ້ນເລີດ ໃນການວາງແຜນຜັງ ອອກແບບກໍ່ສ້າງ ທີ່ກົມກືນກັບຈຸດພິເສດທຳມະຊາດ ທັງສອດຄ່ອງກັບຄວາມເຊື່ອຖືທາງສາສະໜາ ທີ່ເຕັມໄປດ້ວຍຄຸນຄ່າທາງວັດທະນະທຳ ແລະ ສະຖາປັດຕະຍະກຳອັນເກົ່າແກ່, ຖືວ່າເປັນເວລາ 150 ປີທີ່ຄະນະວິຊາການຂອງຝຣັ່ງ ໄດ້ຄົ້ນພົບວັດພູຈໍາປາສັກ ແລະ ໄດ້ເປີດການຮ່ວມມືຕັ້ງແຕ່ນັ້ນມາ. ຈາກນັ້ນກໍ່ເປັນເວລາຂອງການຄົ້ນຄວ້າສຳຫຼວດ ຕາມດ້ວຍການຂຸດຄົ້ນທາງບູຮານຄະດີ, ການຄົ້ນຄວ້າທາງວິທະຍາສາດ ແລະ ກ້າວເຂົ້າເປັນມໍລະດົກໂລກຂອງອົງການສຶກສາ,ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ ຫຼື ອຸຍແນັສໂກ UNESCO ຈົນມາຮອດຂັ້ນຕອນການສຸມໃສ່ການບູລະນະສ້ອມແປງ.
ຈາກຜົນງານດັ່ງກ່າວແມ່ນການປະກອບສ່ວນຊ່ວຍເຫຼືອຂອງບັນດາປະເທດເພື່ອນມິດ ແລະອົງການຈັດຕັ້ງສາກົນຕ່າງໆ ໂດຍສະເພາະແມ່ນໂຄງການຮ່ວມມືລາວ-ຝຣັ່ງ ທີ່ໄດ້ປະກອບສ່ວນກໍ່ສ້າງບຸກຄະລາກອນໃຫ້ແກ່ວັດພູ ແລະບັນດາແຂວງພາກໃຕ້ ໃນວຽກງານມໍລະດົກວັດທະນະທຳ ຜ່ານໂຮງຮຽນພາກສະໜາມ ຂອງການສ້ອມແປງປະຕູທາງເຂົ້າ ແລະ ສີໜ້າດ້ານທິດຕາເວັນອອກຂອງໂຮງຊາວຫຼັງໃຕ້ ທີ່ສຳເລັດຢ່າງຈົບງາມ.
ຂ່າວ: ໜັງສືພິມ ຈຳປາໃໝ່