ອ່ານຕໍ່ຈາກສະບັບກ່ອນ…
ຊຽງໄດ້ໄປສົ່ງນ້ຳຮອດຫ້ອງກ່ອນຈະກັບເມືອເຮືອນ ນ້ຳໄດ້ຊວນຊຽງເຂົ້າໄປນັ່ງຫຼິ້ນໃນຫ້ອງພັກຂອງນາງ ເກດທີ່ກຳລັງນັ່ງເບິ່ງໂທລະພາບຢູ່ຮູ້ສຶກແປກໃຈທີ່ເຫັນ ນ້ຳມາກັບຊຽງ ນ້ຳໄດ້ພາຊຽງມານັ່ງຫຼິ້ນທີ່ໂຊຟານ້ອຍໆໃນບ່ອນຮັບແຂກ ແລ້ວນາງກໍ່ຍ່າງໄປທີ່ຫ້ອງຄົວເພື່ອເອົານ້ຳມາເສີບ ເກດກໍ່ຟ້າວລຸກຂຶ້ນຈາກຕັ່ງນັ່ງແລ້ວຍ່າງນຳຫຼັງນ້ຳໄປທີ່ເຮືອນຄົວທັນທີ ເພື່ອຈະໄປຖາມເລື່ອງລາວທັງໝົດກັບນ້ຳ ແຕ່ເບື້ອງຕົ້ນນ້ຳກໍ່ບໍ່ໄດ້ເລົ່າລາຍລະອຽດຫຍັງສູ່ເກດຟັງ
ນ້ຳໄດ້ເອົານ້ຳໄປເສີບໃຫ້ຊຽງທີ່ກຳລັງນັ່ງເບິ່ງໂທລະທັດ ຊຽງແນມເບິ່ງຮອບໆຫ້ອງ ຫ້ອງທີ່ນ້ຳຢູ່ເປັນຫ້ອງນ້ອຍໆ ແຕ່ກໍ່ຕົບແຕ່ງໄດ້ໜ້າຮັກ ແລະ ສະອາດສົມຄວນ
ທັງສາມຄົນ ຊຽງ, ນ້ຳ ແລະ ເກດ ນັ່ງລົມກັນປະມານ 20 ນາທີ ກ່ອນທີ່ຊຽງຈະກັບເມື່ອເຮືອນ ເມື່ອຊຽງ ກັບ ໄປ ນ້ຳກໍ່ໄດ້ເລົ່າເລື່ອງທັງໝົດໃຫ້ເກດຟັງ ເມື່ອເກດຟັງແລ້ວກໍ່ຮູ້ສຶກດີໃຈແທນໝູ່ທີ່ເຫັນໝູ່ຮັກໄດ້ພົບກັບຄົນດີໆ ຢ່າງຊຽງ ແຕ່ກໍ່ຄິດເຫງົາໃນໃຈເລັກໜ້ອຍ ເພາະຕົນເອງຍັງບໍ່ມີໃຜ
ຂ່າວຄວາມສຳພັນຂອງນ້ຳ ແລະ ຊຽງ ໄດ້ແຜ່ກະຈາຍໄປທົ່ວໂຮງຮຽນຢ່າງໄວວາ ໂດຍມີຄົນໜຶ່ງທີ່ຢູ່ໃນເຫດການມື້ນັ້ນ ນຳຮູບທີ່ຖ່າຍຢູ່ຮ້ານອາຫານຫຼັງຈາກເຕະບານແລ້ວພວກເຂົາໄປກິນລ້ຽງສາມັກຄີນຳກັນທີ່ຮ້ານອາຫານ ແລະ ຖ່າຍ ຮູບຮ່ວມກັນມາ ໂພສຕ໌ລົງເຟສບຸກ ເຊິ່ງມີພາບຖ່າຍລວມ ແລະ ພາບຖ່າຍດ່ຽວ ລວມທັງພາບຖ່າຍຄູ່ລະຫວ່າງ ຊຽງ ກັບ ນ້ຳທີ່ນັ່ງຂ້າງກັນ ໄດ້ມີຄົນເຂົ້າມາກົດໄລນ໌ຮູບນີ້ເປັນຈຳນວນຫຼາຍ ແລະ ຍັງມີຄອມເມັ້ນລຸ່ມພາບຖາມກ່ຽວກັບຄວາມສຳພັນຂອງສອງຄົນໃນຮູບອີກດ້ວຍ ການທີ່ນ້ຳ ກັບ ຊຽງຄົບກັນ ເຮັດໃຫ້ສາວໆຫຼາຍຄົນທີ່ແອບຊື່ນຊົມຊຽງຮູ້ສຶກຜິດຫວັງໄປຕາມກັນ ເຊິ່ງຂ່າວນີ້ມັນໄດ້ເຮັດໃຫ້ມີບາງຄົນບໍ່ພໍໃຈຢ່າງແຮງໃນຄວາມສຳພັນຂອງພວກເຂົາ ໂດຍສະເພາະແມ່ນ ລິນດາທີຫຼົງຮັກຊຽງມາຕັ້ງແຕ່ດົນ (ຕັ້ງແຕ່ຕອນຮຽນປີ 1 – ປີ 3) ແລະ ເຄີຍສະແດງອາການໃຫ້ຊຽງໄດ້ຮັບຮູ້ຕັ້ງຫຼາຍເທື່ອ ແຕ່ກໍ່ຖືກຊຽງປະຕິເສດທຸກເທື່ອ ລິນດາ ຮູ້ສຶກຄຽດໃຫ້ຊຽງ ແລະ ນ້ຳທີ່ສຸດ
ທີ່ຫ້ອງນ້ຳຂອງໂຮງຮຽນໃນຂະນະທີ່ ນ້ຳ ກັບ ເກດ ກຳລັງນັ່ງໃນຫ້ອງນ້ຳ ກໍ່ໄດ້ຍິນສຽງຜູ້ຍິງສອງຄົນກຳລັງເວົ້າຂັວນນ້ຳຢ່າງມ່ວນປາກ ໂດຍແມ່ນຕຸ່ນ ກັບ ລິນດາ ບໍ່ຮູ້ວ່ານ້ຳກັບເກດຢູ່ໃນຫ້ອງນ້ຳ.
ຕຸ່ນ: ບໍ່ເຂົ້າໃຈວ່າຊຽງຄິດແນວໃດ ຈິ່ງໄປເລືອກຄົນແບບນັ້ນມາເປັນແຟນ ໜ້າຈືດຄືໄກ່ຕົ້ນນິ ເບິ່ງແລ້ວບໍ່ເປັນຕາແຊ໊ບຕານົວຈັ່ງໜ່ອຍ
ລິນດາ: ຊຽງລາວຄົງຈະມັກແບບແປກໆ! ມັກແບບຈືດໆ ຈາງໆ, ໜ້າບ້ານໆ…
ນ້ຳພະຍາຍາມອົດທົນຟັງໃນຫ້ອງນ້ຳດ້ວຍການຂົ່ມໃຈບໍ່ໃຫ້ໂມໂຫ ເພາະບໍ່ຢາກມີເລື່ອງຜິດຖຽງກັນ ແຕ່ເກດ ຮູ້ສຶກທົນຟັງບໍ່ໄຫວແລ້ວເລີຍຟ້າວລ້າງຫ້ອງນ້ຳແລ້ວໄຂປະຕູອອກມາທັນທີ
ເກດ (ເອົາມືຊີ້ໜ້າ): ເວົ້າໃຫ້ໝູ່ຂ້ອຍດີໆໃດ໋! ພວກເຈົ້າວິເສດມາແຕ່ໃສຈິ່ງມາວິຈານໝູ່ຂ້ອຍ! ຜູ້ຊາຍທີ່ເຂົາມີສະໝອງເຂົາກໍ່ຄົງບໍ່ເລືອກຜູ້ຍິງແບບພວກເຈົ້າດອກທີ່ແຕ່ລະມື້ ດີແຕ່ແຕ່ງໜ້າ ແຕ່ງຕົວ ແລະ ໃຊ້ສະໝອງຄິດແຕ່ເລື່ອງຈັບຜູ້ຊາຍ ແຕ່ລະມື້ດີແຕ່ເວົ້າຂັວນ ກັບ ອິດສາຄົນອື່ນ ຜູ້ຊາຍດີໆທາງໃດເຂົາຈະເອົາ
ລິນດາ: ເຮີ້ຍ! ໂຕເວົ້າແຮງເກີນໄປແລ້ວໃດ໋
ເກດ: ບໍ່ແຮງດັອກ! ຊ່ຳນີ້ມັນພໍດີກັບພວກໂຕແລ້ວ
ນ້ຳໄດ້ຍິນສຽງເກດກຳລັງຜິດຖຽງກັບຄົນທາງນອກ ນາງກໍ່ຟ້າວອອກມາເບິ່ງທັນທີ ແລ້ວກໍ່ເຫັນ 2 ລຸມ 1 ນ້ຳກໍ່ຟ້າວໄປຫ້າມສອງສາມຄົນນັ້ນທັນທີ
ນ້ຳ (ແນມເບິ່ງໜ້າ ລິນ,ຕຸ່ນ): ຢຸດໄດ້ແລ້ວ! ຂ້ອຍບໍ່ຮູ້ດອກວ່າພວກເຈົ້າແມ່ນ ເຮົາບໍ່ຮູ້ຈັກກັນ! ແຕ່ຂ້ອຍບໍ່ມັກກັບການທີ່ເຈົ້າຈະເວົ້າຂົ່ມເພິ່ນຢໍໂຕແບບນີ້ ຂ້ອຍບໍ່ຮູ້ວ່າເຈົ້າມີດີກວ່າຂ້ອຍພຽງໃດ ແຕ່ຂ້ອຍໝັ້ນໃຈວ່າຜູ້ຊາຍຄົນທີ່ເຈົ້າສົນໃຈຢູ່ເວລານີ້ລາວຮັກຂ້ອຍຫຼາຍ. (ເມື່ອເວົ້າສຸດຄວາມນ້ຳກໍ່ຈັບແຂນເກດຍ່າງອອກຈາກຫ້ອງນ້ຳທ່າມກາງຜູ້ຄົນຈຳນວນຫຼາຍທີ່ມາຫຸ້ມເບິ່ງທີ່ໜ້າປະຕູ)
ລິນດາ ຮູ້ສຶກເຈັບໃຈໃນຄຳເວົ້າຂອງນ້ຳ ສ່ວນນ້ຳເອງກໍ່ຮູ້ສຶກອາລົມເສຍ ແລະ ໂມໂຫເລັກໜ້ອຍທີ່ໄດ້ຍິນຄົນເວົ້າໃຫ້ຕົນເອງແບບນັ້ນ ແລ້ວກໍ່ເກັບເອົາຄຳເວົ້າເຫຼົ່ານັ້ນມາຄິດ ແລະ ປ່ຽນເປັນແຮງພັກດັນຕົວເອງ ນ້ຳຄິດວ່າ “ຖ້າຄິດຈະຄົບກັບ ຊຽງ ລາວຕ້ອງເກັ່ງ ແລະ ປັບປຸງຕົວເອງໃຫ້ງາມຂຶ້ນກວ່ານີ້” ນ້ຳຕັດສິນໃຈປິດເລື່ອງນີ້ໂດຍຢ້ຳກັບເກດຫ້າມເກດເລົ່າເລື່ອງນີ້ສູ່ໃຜຟັງເດັດຂາດ ໃຫ້ຮູ້ກັນຢູ່ 2 ຄົນລະພໍ ເຊິ່ງເກດກໍ່ຮັບປາກ.
ແຕ່ຄວາມລັບມັນບໍ່ໄດ້ມີໃນໂລກ ມີຄົນທີ່ເຫັນເຫດການໃນຫ້ອງນ້ຳ ເລົ່າປາກຕໍ່ປາກ ແລ້ວຍັງບໍ່ພໍຍັງແຕ່ຍັງມີມືດີປ່ອຍ ຄລິບ ໃນຂະນະທີ່ທີ່ທັງສີ່ສາວຜິດກັນໃນຫ້ອງນ້ຳ (ຄລິບມີຄວາມຍາວ 30 ວິນາທີ) ລົງເຟສບຸກ ແລະ ຍັງພາດຫົວຂ່າວໃສ່ຄລິບວ່າ: “ສອງສາວງາມ ຈາກສອງພາກວິຊາ ຜິດໃຈກັນຍ້ອນຜູ້ຊາຍຄົນດຽວ ໂດຍມີໝູ່ຂອງທັງສອງເປັນຕົວຊ່ວຍໃນເລື່ອງນີ້” ຂ່າວໄດ້ກະຈ່າຍແຜ່ໄວໃນໂລກອອນໄລນ໌ ມີຄົນແຊຣ, ຄົນກົດໄລນ໌ ແລະ ມີຄົນເຂົ້າມາຄອມເມັ້ນເປັນຈຳນວນຫຼາຍ
ເກດ: ເຮີ້ຍນ້ຳ! ມາເບິ່ງນີ້ ມີຄົນບ້າທາງໃດເອົາຄລິບພວກເຮົາທີ່ມີເລື່ອງສວາຍນີ້ມາໂພສຕລົງເພສເຟສບຸກ! ແຕ່ຍັງດີທີ່ມັນຍັງເບີໜ້າຈຸເຮົາໄວ້ຢູ່ ຖືວ່າມັນຍັງມີມະນຸດສະທຳຢູ່ເລັກໜ້ອຍ
ນ້ຳ: ໃສ! ອູ່ແມ່ນແທ້! ແບບນີ້ຕ້ອງກວດສອບວ່າມັນແມ່ນໃຜ? ນ້ຳຮູ້ສຶກ ໂມໂຫສຸດໆເລີຍທີ່ເຫັນຂ່າວແບບນີ້ ນ້ຳຮ້ອນຮົນໃນການກວດເບິ່ງຮູບໂປຣຟາຍເຈົ້າຂອງເຟສ ແຕ່ບໍ່ເຫັນລາຍລະອຽດຂອງເຈົ້າຂອງເພສເຟສບຸກດັ່ງກ່າວລະບຸກໄວ້ເລີຍ ນ້ຳຮ້ອນໃຈຢາກເຂົ້າໄປລຶບຄລິບນັ້ນຖຶ້ມໄວໆ ນ້ຳພະຍາຍາມຫາໄອດີ ແລະ ກວດສອບໄອພີແອດເດຣສ ເພື່ອຢາກຮູ້ວ່າເຈົ້າຂອງໂພສຕ໌ວິດີໂອນີ້ເປັນໃຜ ນ້ຳພະຍາຍາມຈະແຮັກເຂົ້າເຟສບຸກດັ່ງກ່າວ ແຕ່ທຸກຢ່າງມັນຊັບຊ້ອນເກີນກວ່າຄວາມສາມາດຂອງນາງຈະເຮັດໄດ້ ນ້ຳຈິ່ງໄດ້ແຕ່ນັ່ງເຫຼືອໃຈຢູ່ໜ້າຄອມ
ຫຼັງເລີກຮຽນຊຽງ,ສິດ ແລະ ໄຊ ໄດ້ໄປຮວມຕົວກັນທີ່ເຮືອນຂອງຊຽງ ແລະ ກຳລັງປຶກສາກັນເລື່ອງແຜນການສ້າງບໍລິສັດ ອອກແບບ ແລະ ສ້າງເວັບໄຊ໌ ຫຼັງຈາກທີ່ພວກເຂົາຮຽນຈົບ (ເປັນບໍລິສັດຮ່ວມທຶນສ້າງຂອງທັງສາມຄົນ) ພວກເຂົາໄດ້ຕົກລົງກັນວ່າຈະເຊົ່າຫ້ອງການເກົ່າລຸງຂອງຊຽງ ຕົບແຕ່ງເປັນຫ້ອງການຂອງພວກເຂົາໃນອານາຄົດ, ຊຽງຈະເປັນຜູ້ຖືຮຸ້ນຫຼັກ ຮອງມາຈະແມ່ນສິດ ກັບ ໄຊ ເມື່ອລົມກັນເລື່ອງວາງແຜນວຽກງານເປັນຊົ່ວໂມງ ໄຊກໍ່ຂໍພັກສະໝອງຈັກ 10 ນາທີ ລາວໄດ້ເຂົ້າເບິ່ງເຟສບຸກ ແລ້ວກໍ່ເຫັນຄລິບດັ່ງກ່າວ
ໄຊ (ລະທຶກ): ເຮີ້ຍໆ ຂ່າວໃໝ່ ເຮີ້ຍ ມີຄລິບຜູ້ຍິງກຳລັງຜິດກັນຍາດຜູ້ບ່າວຄົນດຽວ ແຕ່ທີ່ສຳຄັນສະຖານທີ່ໃນຄລິບຄ້າຍໆຫ້ອງນ້ຳໂຮງຮຽນເຮົາເລີຍ
ສິດ(ຢາກຮູ້ຢາກເຫັນ): ໃສໆ! ເອີ້ແມ່ນໃດ໋ນິ ! ສາວທີ່ຢູ່ໃນຄລິບເບິ່ງຮູບຮ່າງແລ້ວຄຸ້ນໆຄືໃຜນໍ້! ອໍ້…ຄິດອອກແລ້ວ! ຄືນ້ຳ ກັບ ລິນດາ
ໄຊ: ເອີ້ ແມ່ນໆ
ຊຽງອອກຈາກຫ້ອງນ້ຳມາ ກໍ່ຍ່າງມາຫາສິດ ກັບ ໄຊ: ແມ່ນພວກເຈົ້າເບິ່ງຄລິບຫຍັງ! (ໄຊ ກັບ ສິດແນມເບິ່ງໜ້າຊຽງ ແລ້ວເອົາຄລິບໃຫ້ຊຽງເບິ່ງ, ຊຽງໄດ້ຈ້ອງຕາໄປເບິ່ງທີ່ຄລິບນັ້ນ ສັງເກດເບິ່ງຜູ້ຍິງໃນຄລິບດ້ວຍໃຈຈົດຈໍ່ ແລະ ຕັ້ງໃຈຟັງສຽງກໍ່ແນ່ໃຈເລີຍວ່າ ໜຶ່ງຄົນໃນຄລິບນັ້ນແມ່ນມີນ້ຳຢູ່ແນ່ນອນ ຊຽງຮູ້ສຶກບໍ່ພໍໃຈຢູ່ເລິກໆ ແຕ່ຍັງຄົງທ່ານິ້ງໆ ເກັບກົດຄວາມຮູ້ສຶກໂມໂຫໄວ້ ເຮັດຄືບໍ່ໄດ້ຄິດຫຍັງໃນສິ່ງທີ່ເຫັນ ເມື່ອເບິ່ງຄລິບນັ້ນຈົບ ຊຽງກໍ່ຈັດການແຮັກເຂົ້າ ເຟສບຸກເພສນັ້ນທັນທີ ຊຽງເຂົ້າໄປລົບຄລິບນັ້ນອອກຈາກເພສ, ປ່ຽນລະຫັດເຂົ້າເຟສ ພ້ອມທັງປິດຄວາມສາມາດໃນການອັບໂຫຼດວິດີໂອ ແລະ ຮູບພາບຂອງເພຈນັ້ນໄວ້ພ້ອມ ຊາຍນິລະນາມເຈົ້າຂອງ ເຟສບຸກດັ່ງກ່າວເມື່ອຮູ້ວ່າເຟສຂອງຕົນເອງຖືກແຮັກເກີ້ມືດີຈັດການ ລາວກໍ່ຮູ້ສຶກເຈັບໃຈສຸດໆ.
ສິດ ແລະ ໄຊ ຮູ້ວ່າຊຽງເຂົ້າໄປຈັດການ ເຟສບຸກນັ້ນແລ້ວ ທັງສອງກໍ່ພາກັນຍົກໂປ້ໃຫ້ໃນການກະທຳຂອງເພື່ອນຮັກ ຊຽງຍິ້ມເບົາໆດ້ວຍຄວາມສະໃຈ, ຈາກນັ້ນລາວກໍ່ລຸກຍ່າງໄປທາງເຮືອນຄົວຂອງເຮືອນແລ້ວຈົກໂທລະສັບຈາກຖົງໂສ້ງອອກມາກົດໂທໄປຫານ້ຳ
ນ້ຳ (ລົມສາຍ): ຊຽງ
ຊຽງ (ລົມສາຍ): ນ້ຳ! ມື້ອື່ນຕອນເຊົ້າວ່າງບໍ່
ນ້ຳ (ລົມສາຍ): ວ່າງ! ມີຫຍັງ
ຊຽງ (ລົມສາຍ): ມື້ອື່ນເຊົ້າຈະໄປຮັບເດີ້! ມີເລື່ອງຈະລົມນ້ຳ!
ນ້ຳ (ລົມສາຍ):ໄດ້! ແຕ່ຕອນນີ້ຂໍວາງສາຍກ່ອນເພາະຄາເບິ່ງບົດຮຽນກຽມເສັງ! ບ່າຍ!ບ່າຍ
ເຊົ້າມື້ຕໍ່ມາຊຽງໄດ້ມາຮັບນ້ຳທີ່ໜ້າຫ້ອງ ແລ້ວພວກເຂົາກໍ່ໄດ້ຂີ່ລົດອອກໄປນຳກັນ ຊຽງພານ້ຳໄປກິນເຂົ້າ ເຊິ່ງເຊົ້າມື້ນີ້ນ້ຳເປັນຄົນເລືອກຮ້ານອາຫານເອງ ເຊິ່ງເປັນຮ້ານອາຫານເຈ (ພາຊຽງກິນເຈ) ເມື່ອຮອດຮ້ານ ທັງສອງໄດ້ໄປເລືອກອາຫານ ແລ້ວມານັ່ງກິນທີ່ໂຕະ ທັງສອງທັງກິນທັງລົມກັນໄປ
ຊຽງ: ປີນີ້ນ້ຳຢູ່ປີສາມແລ້ວ ອີກບໍ່ດົນກໍ່ກຽມຝຶກງານລະໃດ໋ເນາະ
ນ້ຳ: ແມ່ນລະ! ຕອນນີ້ຂ້ອຍກັບ ເກດ ກຳລັງ ຊອກຫາບ່ອນລົງຝຶກງານໄວ້ຢູ່
ຊຽງ: ແລ້ວໄດ້ລະບໍ່ບ່ອນລົງຝຶກງານ! ມີຫຍັງໃຫ້ຊ່ວຍລະບອກຂ້ອຍເດີ້
ນ້ຳ (ຍິ້ມ): ບໍ່ລົບກວນລະ! ເລື່ອງເລັກໜ້ອຍແບບນີ້ຂ້ອຍຈັດການເອງໄດ້
ຊຽງ: ອື້! ນ້ຳ! ເຈົ້າມີເລື່ອງຫຍັງຈະເລົ່າສູ່ຂ້ອຍຟັງບໍ່ ນອກຈາກເລື່ອງຝຶກງານ
ນ້ຳ (ຄິດໃນໃຈ “ຊຽງຄົງເຫັນຄລິບນັ້ນແລ້ວ ແລະ ຢາກຮູ້ລາຍລະອຽດກ່ຽວກັບເລື່ອງທີ່ເກີດຂຶ້ນ”): ອິ້ມ! ເຈົ້າຄົງຈະເຫັນຄລິບແລ້ວ ແລະ ຄົງຈະໄດ້ຍິນສຽງໃນຄລິບນັ້ນແລ້ວ ເລື່ອງມັນກໍ່ເປັນແບບໃນຄລິບນັ້ນລະ
ຊຽງ (ເອົາມືເບື້ອງໜຶ່ງຢື່ນມາຈັບມືນ້ຳໄວ້ ແລ້ວຕາຈ້ອງເບິ່ງໜ້ານ້ຳ): ເຈົ້າບໍ່ເປັນຫຍັງຫຼາຍຕີ້! ຂ້ອຍໝາຍເຖິງຄວາມຮູ້ສຶກຂອງເຈົ້າ
ນ້ຳ (ຄິດໃນໃຈ “ຊຽງ ແຄຣຄວາມຮູ້ສຶກຂອງເຮົານຳ ຮູ້ສຶກດີແທ້” ນ້ຳຍິ້ມໃສ່ຊຽງເບົາໆ): ບໍ່ເປັນຫຍັງ! ເລື່ອງຊ່ຳນີ້ ເພາະຂ້ອຍຈັດການໄດ້ ຄວາມຈິງຂ້ອຍທຳໃຈແລ້ວແຫຼະ ມີແຟນຫຼໍ່ກໍ່ຕ້ອງພົບກັບເລື່ອງແບບນີ້ ມັນເປັນເລື່ອງປົກກະຕິ
ຊຽງ (ຮູ້ສຶກດີໃຈທີ່ໄດ້ຍິນນ້ຳຕອບແບບນີ້ ຊຽງຍິ້ມອາລົມດີ): ດີແລ້ວທີ່ເຈົ້າບໍ່ເປັນຫຍັງ! ຢ່າຄິດຫຍັງຫຼາຍ ເພາະບໍ່ມີໃຜແຍກຂ້ອຍກັບເຈົ້າອອກຈາກກັນໄດ້ ເພາະຂ້ອຍເລືອກແລ້ວວ່າຕ້ອງແມ່ນເຈົ້າຄົນດຽວທີ່ຢູ່ຂ້າງກາຍຂ້ອຍ.
ອ່ານຕໍ່ສະບັບໜ້າ…
ແຕ່ງໂດຍ: ແອັດມິນ ປັອກເລັກ ລາວໂພສຕ໌
ຕິດຕາມເລື່ອງດີດີເພຈຊີວິດແລະຄວາມຮັກ ກົດໄລຄ໌ເລີຍ!