ກົມໃຫຍ່ຕຳຫຼວດ ( ກົມໃຫຍ່503 ) ກະຊວງ ປກສ ໄດ້ຈັດພິທີປະກາດສ້າງຕັ້ງຫ້ອງການກວດກາ ແລະ ຄວບຄຸມ ຢາເສບຕິດ ທີ່ຂຶ້ນກັບກົມໃຫຍ່ 503 ພ້ອມທັງແຕ່ງຕັ້ງຄະນະຫ້ອງການຈຳນວນ 5 ທ່ານເພື່ອຊີ້ນຳ-ບັນຊາວຽກງານວິຊາສະ ເພາະໃຫ້ຖືກຕ້ອງຕາມພາລະບົດບາດ, ໜ້າທີ່, ຂອບເຂດສິດຂອງການຈັດຕັ້ງ ແລະ ສາມາດຕອບສະໜອງກັບຄວາມ ຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່; ໂດຍມີ ພົຈວ ປອ ທອງເຫຼັກມັງໜໍ່ເມກ ຫົວໜ້າກົມໃຫຍ່ຕຳຫຼວດ, ພ້ອມດ້ວຍຄະນະ ບັນຊາກົມໃຫຍ່ ແລະ ພະນັກງານ ຫຼັກແຫຼ່ງອ້ອມຂ້າງເຂົ້າຮ່ວມ, ໃນວັນທີ 9 ທັນວາ ຜ່ານມານີ້.

ໃນພິທີ, ພັທ ສົມພອນ ແກ້ວພູທອນ ຮອງຫົວໜ້າກົມຈັດຕັ້ງພະນັກງານກົມໃຫຍ່ການເມືອງ ປກສ ໄດ້ຜ່ານຂໍ້ຕົກລົງຂອງລັດຖະມົນຕີກະຊວງ ປກສ ສະບັບເລກທີ 1899/ປກສ, ລົງວັນທີ 14 ພະຈິກ 2016 ວ່າດ້ວຍການສ້າງຕັ້ງຫ້ອງ ການກວດກາ ແລະ ຄວບ ຄຸມຢາເສບຕິດທີ່ຂຶ້ນກັບ ກົມໃຫຍ່ຕຳຫຼວດ ເຊິ່ງປະກອບມີ 5 ພະແນກຂຶ້ນກັບ ແລະ ໃນປັດຈຸ ບັນທົ່ວກົມໃຫຍ່503 ມີ 16ກົມກອງທີ່ຂຶ້ນກັບ; ພ້ອມທັງແຕ່ງຕັ້ງຄະນະຫ້ອງການ 5 ທ່ານຄື: ພັອ ອ່ອນຜິວ ໂຄ້ງວຽງທອງ ເປັນຫົວໜ້າ, ພັທພຸດສະຫວາດ ສູນທະລາ, ພັທ ວົງໄຊ ພັນທະວົງ, ພັທ ວົງເພັດ ແສນວົງສາ ແລະ ພັຕ ວັດທະນາ ສຸວັນນະຈັກ ເປັນຮອງໂດຍມອບໃຫ້ກົມໃຫຍ່ 503 ສົມທົບ ພາກສ່ວນກ່ຽວຂ້ອງກຳນົດພາລະບົດບາດ, ໜ້າທີ່ຂອງຫ້ອງ ການ, ພະແນກໃຫ້ສອດຄ່ອງກັບສະພາບຕົວຈິງ.

ໂອກາດນີ້, ຍັງໄດ້ປະກາດໂຍກຍ້າຍແຕ່ງຕັ້ງ ພັອ ຄຳແກ້ວ ມະໂນລາ ຈາກຫົວໜ້າກົມຕຳຫຼວດສືບສວນ-ສອບ ສວນເປັນຫົວໜ້າກົມຕຳຫຼວດເສດຖະກິດ, ພັອ ຄຳຜອງ ວິຈິດ ຈາກຮອງຫົວໜ້າກອງບັນຊາການ ປກສ ແຂວງອຸດົມໄຊ ເປັນຫົວໜ້າກົມຕຳຫຼວດສືບສວນ-ສອບສວນ, ພັອ ຄຳແພງ ໄຊຍະລາດ ຈາກຮອງຫົວໜ້າກອງບັນຊາການ ປກສ ນະຄອນ ຫຼວງເປັນຫົວໜ້າກົມຕຳຫຼວດສະກັດກັ້ນ ແລະ ຕ້ານຢາເສບຕິດ; ສ່ວນຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ.

ພຈວ ປອ ທອງເຫຼັກ ມັງໜໍ່ເມກ ມີທິດຊີ້ນຳໃຫ້ບັນດາທ່ານທີ່ໄດ້ຮັບການແຕ່ງຕັ້ງໜ້າທີ່ໃໝ່ ຈົ່ງເພີ່ມຄວາມເອົາໃຈ ໃສ່ຊີ້ນຳ-ນຳພາວຽກງານວິຊາສະເພາະຕາມພາລະບົດບາດຂອງກົມກອງທີ່ຕົນຮັບຜິດຊອບໃຫ້ມີຜົນສຳເລັດສູງຂຶ້ນ ແນໃສ່ ໃຫ້ບັນຫາອາດຊະຍາກຳທີ່ເກີດຂຶ້ນຫຼຸດໜ້ອຍຖອຍລົງຮັບປະກັນໃຫ້ທົ່ວສັງຄົມມີຄວາມສະຫງົບ-ປອດໄພ.

ຂ່າວຈາກ: ປກສ

ຕິດຕາມຂ່າວເສດຖະກິດລາວ ກົດໄລຄ໌ເລີຍ!