ໃນວັນທີ 12 ທັນວາ 2016ຜ່ານມານີ້ ທາງບໍລິສັດ ຮ້ອຍແປດພັນເກົ້າກຣຸບ ຈໍາກັດ ໄດ້ຈັດງານສະເຫຼີມສະຫຼອງຄົບຮອດ 5 ປີ ຢູ່ທີ່ໂຮງແຮມເມີກຽວ Mercure ໂດຍການເປັນປະທານຂອງທ່ານ ແກ້ວວີສຸກ ດາລາສານ ຜູ້ກໍ່ຕັ້ງ ແລະຜູ້ອໍານວຍການຂອງບໍລິສັດຮ້ອຍແປດພັນເກົ້າກຣຸບ ຈໍາກັດ, ມີແຂກຮ້ອຍກວ່າທ່ານ ທັງພາຍໃນ ແລະຕ່າງປະເທດ, ຈາກພາກລັດ ແລະເອກະຊົນ ທັງຜູ້ປະກອບການ ແລະອົງການຈັດຕັ້ງສາກົນກໍໃຫ້ກຽດເຂົ້າຮ່ວມ.

ທ່ານ ແກ້ວວີສຸກ ດາລາສານ ໄດ້ບອກໃຫ້ຮູ້ວ່າ: ບໍລິສັດໄດ້ເລີ່ມສ້າງຕັ້ງເວັບໄຊທຊອກວຽກ 108 JOB.LA ແລະວາລະສານ 108 ອາຊີບ ໃນທ້າຍປີ 2011 ຈົນກາຍມາເປັນເວັບໄຊທຊອກວຽກອັນດັບໜຶ່ງຂອງປະເທດລາວ ພ້ອມກັບວາລະສານ 108 ກໍເປັນວາລະສານດຽວກ່ຽວກັບການຊອກວຽກໃນປະເທດລາວ ໂດຍການຈໍາໜ່າຍໃນລາຄາ 5000 ກີບຕໍ່ສະບັບ ແລະຕໍ່ມາໃນປີ 2014 ວາລະສານກໍໄດ້ຢຸດເຊົາຈໍາໜ່າຍ ແລະຫັນມາເປັນວາລະສານແຈກຟຣີລາຍອາທິດ.

ບົນພື້ນຖານວິໄສທັດສະໜອງສື່ຊອກວຽກທີ່ຮັບໃຊ້ສັງຄົມ ແລະວາລະສານແຈກຢາຍຟຣີທີ່ຮອງຮັບວິຖີຊີວິດທີ່ປ່ຽນໄປຕະຫຼອດໄລຍະ 5 ປີຜ່ານມາ ທາງບໍລິສັດຍັງໄດ້ພັດທະນາການໃໝ່ເພື່ອເພີ່ມຊ່ອງທາງການຊອກວຽກໃຫ້ເພີ່ມຂຶ້ນ, ງ່າຍຂຶ້ນ ແລະເຂົ້າເຖິງທຸກກຸ່ມຄົນ ເປັນຕົ້ນແມ່ນເວັບໄຊທ JOBJIBJIB.LA ເວັບໄຊທຊອກວຽກທີ່ມີຫຼາກຫຼາຍ, ບໍ່ຫຍຸ້ງຍາກ ແລະນໍາໃຊ້ໄດ້ງ່າຍ ດ້ວຍເມນູພາສາລາວ ສໍາຫຼັບຜູ້ທີ່ຕ້ອງການເຮັດວຽກເສີມ, ວຽກໄລຍະສັ້ນ ກໍໄດ້ຮັບການພັດທະນາຂຶ້ນ. ສ່ວນວ່າ Spoon.la ແມ່ນພ້ອມກັບແອັບເທິງມືຖື ແລະເວັບໄຊທ ທີ່ສ້າງຄວາມສະດວກສະບາຍໃນການເລືອກຮ້ານອາຫານ ແລະເປັນຊ່ອງທາງປະຊາສໍາພັນຂອງຮ້ານອາຫານ.

ທ່ານຍັງກ່າວຕື່ມວ່າ ໃນໂອກາດຄົບຮອດ 5 ປີຂອງບໍລິສັດ ຮ້ອຍແປດພັນເກົ້າກຣຸບ ຈໍາກັດ ທາງບໍລິສັດພ້ອມປ່ຽນແປງ ແລະປັບປຸງໂສມໜ້າໃໝ່ຂອງເວັບໄຊທ 108JOB.LA ມາເປັນ 108.JOBS (ເປີດໃຊ້ທົ່ວໄປຕົ້ນເດືອນ ກຸມພາ 2017 ນີ້) 108.JOBS ຈະມາພ້ອມກັບແອັບທັງລະບົບ Android ແລະios ນອກຈາກເຮັດໃຫ້ໂດເມນສັ້ນລົງແລ້ວ 108.JOBS ຍັງຕອກຢໍ້າຄວາມສໍາເລັດຂອງບໍລິສັດ ປັກເປົ້າໝາຍເຂົ້າສູ່ທຸລະກິດວຽກເຮັດງານທໍາທຸກຮູບແບບ ທັງໃນ ສປປ ລາວ ແລະຕະຫຼາດອາຊຽນໃຫ້ພ້ອມຮັບມືກັບຍຸກເອອີຊີ  (AEC).