ການຈັດເກັບລາຍຮັບສ່ວຍສາອາກອນຂອງແຂວງສາລະວັນ ປະຈໍາສົກປີ 2015-2016 ບໍ່ບັນລຸຕາມແຜນການ ເນື່ອງມາຈາກວ່າການຈັດເກັບຍັງໃຊ້ຖານຂໍ້ມູນເກົ່າ, ຖານຂໍ້ມູນບໍ່ລະອຽດ-ຊັດເຈນ, ເຮັດໃຫ້ການຈັດຕັ້ງປະຕິບັດການຈັດເກັບລາຍຮັບສ່ວຍສາອາກອນ ໄດ້ພຽງ 80 ກວ່າເປີເຊັນຂອງແຜນການດັດແກ້.

ທ່ານ ພອນປະເສີດ ລາຊາໂພ ຫົວໜ້າພະແນກສ່ວນສາອາກອນແຂວງ ໄດ້ໃຫ້ສໍາພາດຕໍ່ນັກຂ່າວໃນຕົ້ນເດືອນທັນວາວ່າ: ການຈັດຕັ້ງປະຕິບັດຄຸ້ມຄອງຈັດເກັບລາຍຮັບຂອງສ່ວຍສາອາກອນ ໃນສົກປີ 2015-2016 ດ້ານລາຍຮັບແຜນດັດແກ້ 92 ຕື້ກີບ ປະກອບມີລາຍຮັບອາກອນ 71.92 ຕື້ກີບ, ລາຍຮັບຄ່າທໍານຽມ 2 ຕື້ກີບ, ລາຍຮັບວິຊາການ 11.28 ຕື້ກີບ, ລາຍຮັບພາສີທີ່ດິນ 6.80 ຕື້ກີບ; ການຈັດຕັ້ງປະຕິບັດຕົວຈິງໃນສົກປີນີ້ສາມາດປະຕິບັດໄດ້ ພຽງ 78,05 ຕື້ກີບເທົ່າກັບ 84,84% ຂອງແຜນດັດແກ້, ທຽບໃສ່ໄລຍະດຽວກັນຂອງແຜນການປີຜ່ານມາເທົ່າກັບ 85,92% ໃນນັ້ນລາຍຮັບອາກອນ 58,54 ຕື້ກີບທຽບໃສ່ແຜນການປີເທົ່າກັບ 81,40%, ລາຍຮັບຄ່າທໍານຽມ 2,99 ຕື້ນກີບທຽບໃສ່ແຜນການປີເທົ່າກັບ 149%, ລາຍຮັບບໍລິການວິຊາການ 11,42 ຕື້ກີບທຽບໃສ່ແຜນການປີເທົ່າກັບ 101.30%, ລາຍຮັບພາສີທີ່ດິນ 5,09 ຕື້ກີບທຽບໃສ່ແຜນການປີເທົ່າກັບ 74,87%
ເຖິງວ່າການຈັດຕັ້ງປະຕິບັດການຈັດເກັບລາຍຂອງສ່ວຍສາອາກອນຂັ້ນແຂວງບໍ່ບັນລຸຕາມແຜນການ ແຕ່ກໍ່ມີ 3 ເມືອງປະຕິບັດໄດ້ລື່ນແຜນການຄື: ເມືອງເລົ່າງາມ ເກັບລາຍໄດ້ລື່ນແຜນ 8,20%, ເມືອງຕະໂອ້ຍ ເກັບລາຍໄດ້ລື່ນແຜນ 16,73%, ເມືອງສະໝ້ວຍ ເກັບລາຍໄດ້ລື່ນແຜນ 2,87% .

ຂ່າວ:​ ສຳນັກຂ່າວສານປະເທດລາວ