ຕາມການລາຍງານຂອງ ທ່ານ ພູວັນ ຈັນທະວົງ ຫົວໜ້າກົມພັດທະນາສີມືແຮງງານ ແລະຈັດຫາງານ ກະຊວງ ຮສສ ໃຫ້ຮູ້ວ່າ: ການໄປເຮັດວຽກຢູ່ຕ່າງປະເທດ ກໍ່ແມ່ນອົງປະກອບທີ່ສຳຄັນໜຶ່ງໃນການ ສ້າງລາຍຮັບໃຫ້ແກ່ຜູ້ອອກແຮງງານ ເພື່ອໃຫ້ຫຼຸດພົ້ນອອກຈາກຄວາມທຸກຍາກ. ສະນັ້ນ, ຜູ້ອອກແຮງງານລາວ ທີ່ມີຈຸດປະສົງຢາກໄປອອກແຮງງານຢູ່ຕ່າງປະເທດ ຕ້ອງໄດ້ສຶກສາ ແລະ ເຂົ້າໃຈຢ່າງລະອຽດກ່ຽວກັບເງື່ອນໄຂ ແລະ ສະພາບແວດລ້ອມຂອງການເຮັດວຽກ ຢູ່ປະເທດທີ່ຕົນເອງຈະໄປ.

ສິ່ງສໍາຄັນທີ່ສຸດແມ່ນຕ້ອງໄປຢ່າງຖືກຕ້ອງ ຕາມລະບຽບການໃນຂອບຂອງກົດໝາຍຜ່ານລະບົບການຈັດສົ່ງ, ໄດ້ຮັບການອະນຸຍາດຈາກກະຊວງແຮງງານ ແລະ ສະຫວັດດີການສັງຄົມ, ໂດຍແມ່ນວິສາຫະກິດບໍລິການຈັດຫາງານຂອງລາວ ຈະເປັນຜູ່ຊ່ວຍປະສານ ແລະ ຮັບຜິດຊອບ, ໃນການດຳເນີນເອກະສານຂໍອະນຸຍາດທັງໝົດ ພ້ອມທັງເປັນຜູ້ຕິດຕາມຄຸ້ມຄອງທ່ານ ຈົນຄົບກຳນົດສັນຍາ ແລະ ຈັດສົ່ງກັບຄືນປະເທດ ຢ່າງປອດໄພ, ໂດຍມີເງື່ອນໄຂດັ່ງນີ້: ຕ້ອງເປັນຜູ້ທີ່ມີອາຍຸ 18 ປີ ຂຶ້ນໄປ, ມີລະດັບການສຶກສາ ຈົບຊັ້ນປະຖົມຂຶ້ນໄປ, ມີສຸຂະພາບແຂງແຮງດີ, ເປັນພົນລະເມືອງດີ, ມີຄວາມຕ້ອງການຢາກເຮັດວຽກ, ຝຶກສີມື ແລະ ສະສົມປະສົບການ ເພື່ອພັດທະນາຕົນເອງ ແລະ ຄອບຄົວ. ເມື່ອເຮັດວຽກຄົບກໍານົດສັນຍາແລ້ວ ຜູ້ອອກແຮງງານ ຕ້ອງກັບຄືນປະເທດ ໂດຍນາຍຈ້າງ ຮ່ວມກັບບໍລິສັດຈັດຫາງານ ຈະເປັນຜູ້ນໍາສົ່ງແຮງງານກັບຄືນປະເທດ ດ້ວຍຄວາມປອດໄພ, ກະຊວງແຮງງານ ແລະ ສະຫວັດດີການສັງຄົມ ໄດ້ມີນະໂຍບາຍສົ່ງເສີມການມີວຽກເຮັດງານທຳຂອງແຮງງານລາວ ທັງຢູ່ພາຍໃນ ແລະ ໄປອອກແຮງງານຢູ່ຕ່າງປະເທດ ເພື່ອໃຫ້ແຮງງານໄດ້ຮັບການພັດທະນາສີມືແຮງງານຜ່ານປະສົບການເຮັດວຽກຕົວຈິງ, ມີລາຍໄດ້, ມີຊີວິດການເປັນຢູ່ທີ່ດີແນໃສ່ໃຫ້ຫລຸດພົ້ນອອກຈາກຄວາມທຸກຍາກເທື່ອລະກ້າວ.

ຂ່າວ: ສຳນັກຂ່າວສານປະເທດລາວ