ອົງການໄຈກາ ແລະ ອົງການຄົນພິການເອເຊຍ ເພື່ອການພັດທະນາ ຫຼື ເອດີດີພີ (ADDP) ໃຫ້ການສະໜັບ ສະໜູນ ສປປ ລາວ ກໍ່ຄື ກະຊວງສຶກສາທິການ ແລະ ກິລາ (ສສກ) ແຕ່ນີ້ຮອດປີ 2021 ລວມມູນຄ່າ 5.6 ຕື້ກວ່າກີບ ຫຼື ປະມານ 7 ແສນກວ່າ ໂດລາສະຫະລັດ ເພື່ອສົ່ງເສີມ ການພັດທະນາວົງການ ກິລາຄົນພິການລາວ ກຽມສ້າງຜົນງານ ໃຫ້ແກ່ປະເທດຊາດ ໃນການເຂົ້າຮ່ວມແຂ່ງຂັນໃນລະດັບອະນຸພາກພື້ນ, ພາກພື້ນ ແລະ ສາກົນ ໃນຕໍ່ໜ້າ ກໍ່ຄື ງານມະຫາກຳກິລາ ອາຊຽນພາຣາເກມ 2017 ທີ່ປະເທດມາເລເຊຍ ຮັບກຽດເປັນເຈົ້າພາບ ໃນທ້າຍປີນີ້.
ພິທີເຊັນສັນຍາ ບົດບັນທຶກຄວາມເຂົ້າໃຈ ໃຫ້ການຮ່ວມມື ສົ່ງເສີມການພັດທະນາ ວົງການກິລາຄົນພິການລາວ ເພື່ອກ້າວສູ່ຜົນສຳເລັດໃນເວທີພາກພື້ນ ແລະ ສາກົນ ໄດ້ມີຂຶ້ນ ໃນຕອນເຊົ້າວັນທີ 7 ທັນວາ ຜ່ານມາ ທີ່ຫ້ອງການກົມກິລມວນຊົນ ຕືກສຳນັກງານກະຊວງ ສສກ (ຂ້າງສະໜາມກິລາເຈົ້າອານຸວົງ) ນະຄອນຫຼວງວຽງຈັນ ລະຫວ່າງ ທ່ານ ມະເອຈິມະ ໂຕມິໂກະ ປະທານອົງການຄົນພິການເອເຊຍ ເພື່ອການພັດທະນາ ແລະ ທ່ານ ສີທາດ ຈັນທະບູລີ ຫົວໜ້າກົມກິລາມວນຊົນ, ມີທ່ານ ສີນະຄອນ ປະທຸມມະລັດ ຮອງຫົວໜ້າຫ້ອງການ ກະຊວງສສກ, ຕາງໜ້າກົມແຜນການ, ກົມການເງິນ, ກົມພົວພັນຕ່າງປະເທດ ແລະ ບັນດາຮອງຫົວໜ້າກົມກິລາມວນຊົນ, ຫົວໜ້າພະ ແນກອ້ອມຂ້າງກົມດັ່ງກ່າວ, ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ຕະຫຼອດຮອດຫົວໜ້າຂະແໜງການຕ່າງໆ ແລະ ພະນັກງານທີ່ກ່ຽວຂ້ອງທັງ 2 ພາກສ່ວນດັ່ງກ່າວ ເຂົ້າຮ່ວມເປັນສັກຂີພິຍານ.
ໂອກາດນີ້, ທ່ານ ສີທາດ ຈັນທະບູລີ ກ່າວວ່າ: ມື້ນີ້ແມ່ນ ເປັນມື້ທີ່ມີຄວາມໝາຍຄວາມສຳຄັນຫຼາຍ ທີ່ກົມກິລາມວນຊົນ ຮູ້ສຶກເປັນກຽດຢ່າງສູງ ແລະ ມີຄວາມພາກພູມໃຈ ທີ່ໄດ້ຮັບການມອບໝາຍ ວຽກງານທີ່ສຳຄັນ ໃນຄັ້ງນີ້ ຈາກທ່ານລັດຖະມົນຕີ ກະຊວງສຶກສາທິການ ແລະ ກິລາ ໃນການລົງນາມ ເຊັນບົດບັນທຶກຄວາມເຂົ້າໃຈ ລະຫວ່າງ ກະຊວງສຶກສາທິການ ແລະ ກິລາ ຕ່າງໜ້າໂດຍ ກົມກິລາມວນຊົນ ແລະ ອົງການຄົນພິການເອເຊຍ ເພື່ອການພັດທະນາ ສ້າງຄວາມອາດສາມາດ ໃຫ້ແກ່ຊຽວຊານ, ກຳມະການຕັດສິນ ແລະ ຄູເຝິກກິລາຄົນພິການໃນ ສ ປປ ລາວ ເວົ້າລວມ, ເວົ້າສະເພາະ ການພັດທະນາກິລາ-ກາຍຍະກຳ ຄົນພິການລາວ ໃຫ້ນັບມື້ນັບມີບາດກ້າວຂະຫຍາຍຕົວ ຢ່າງກ້ວາງຂວາງ ລົງເລິກໃຫ້ເຖິງຊຸມຊົນ ບ້ານ, ເມືອງ, ບັນດາແຂວງ ແລະ ນະຄອນຫຼວງວຽງຈັນ ໃຫ້ມີຄົນພິການລາວໄດ້ອອກມາຫັດກາຍຍະບໍລິຫານ, ອອກກຳລັງກາຍ, ຫຼິ້ນກິລາໃຫ້ຫຼາຍຂຶ້ນ ແລະ ເຂົ້າຮ່ວມງານແຂ່ງຂັນ ກິລາຄົນພິການແຫ່ງຊາດ ຢູ່ພາຍໃນປະເທດ ແລະ ເຂົ້າຮ່ວມແຂ່ງຂັນກິລາຄົນພິການ ຢູ່ໃນລະດັບອານຸພາກພຶ້ື້ນ, ພາກພື້ນ ແລະ ສາກົນ ໃຫ້ມີທາງດ້ານປະລິມານ ແລະ ຄຸນນະພາບສູງຂຶ້ນເທື່ອລະກ້າວ ແລະ ຂໍສະແດງຄວາມຮູ້ບຸນຄຸນຢ່າງສູງ ມາຍັງອົງການຄົນພິການເອເຊຍ ເພື່ອການພັດທະນາ ທີ່ໃຫ້ການສະໜັບສະໜູນປະກອບສວນດ້ວຍຄວາມເອົາໃຈໃສ່ຢ່າງຕັ້ງໜ້າ ໃນການຍົກລະດັບຄວາມຮູ້ ຄວາມສາມາດ ໃຫ້ບຸກຄະລາກອນ, ຊຸກຍູ້ດ້ານອຸປະກອນກິລາຄົນພິການ, ກຳມະການຕັດສິນ ແລະ ຄູຝຶກໃຫ້ຂະ ແໜງກິລາ-ກາຍຍະກຳມວນຊົນ, ກໍ່ຄື ການພັດທະນາ ກິລາ-ກາຍຍະກຳຄົນພິການລາວ ຢູ່ບັນດາແຂວງ, ນະຄອນຫຼວງວຽງຈັນ, ເມືອງ, ສູນ ແລະ ສະມາຄົມຄົນພິການ ຢູ່ພາຍໃນປະເທດ ແລະ ຕ່າງປະເທດ ໃນແຕ່ລະປີ.
ທ່ານ ສີທາດ ຈັນທະບູລີ ກ່າວຕື່ມອີກວ່າ: ສໍາລັບວຽກງານກິລາ-ກາຍຍະກຳ ຄົນພິການ ກະຊວງສຶກສາທິການ ແລະ ກິລາ, ໄດ້ກຳນົດເງື່ອນໄຂ ແນໃສ່ການຈັດຕັ້ງປະຕິບັດຕາມ ແນວທາງວິໃສທັດແຕ່ນີ້ ຮອດປີ 2030, ໄດ້ກຳນົດແຜນຍຸດທະສາດ ຮອດປີ 2025 ແລະ ແຜນພັດທະນາຂະແໜງ ການສຶກສາ ແລະ ກິລາ 5 ປີ ຄັ້ງທີ 8 (2016-2020) ບັນດານິຕິກຳ ດັ່ງກ່າວນີ້ແມ່ນ ເພື່ອແນ່ໃສ່ເຮັດວຽກງານ ກິລາ-ກາຍຍະກຳ ຄົນພິການ ໄດ້ມີການພັດທະນາດີຂຶ້ນ ເທື່ອລະກ້າວ, ເປັນການເປີດໂອກາດ ໃຫ້ຄົນພິການລາວ ໃນຂອບເຂດທົ່ວປະເທດ ທີ່ມີພອນສະຫວັນ ມີຄວາມຮັກມັກ ໃນການອອກມາຫັດກາຍະບໍລິຫານ, ອອກກຳລັງກາຍ ແລະ ຫຼິ້ນກິລາ ເຂົ້າຮ່ວມແຂ່ງຂັນກິລາຄົນພິການ ໃນລະດັບຊາດ ແລະ ລະດັບສາກົນ ຢ່າງເປັນຂະບວນການຝົດຟື້ນກ້ວາງຂວາງ ເພື່ອເປັນການເຝິກແອບ ການແຂ່ງຂັນຢ່າງເປັນລະບົບຖືກຕ້ອງ ຕາມກົດລະບຽບ, ກະຕິກາ ຂອງກິລາຄົນພິການສາກົນໄດ້ວາງອອກ.
ສຳລັບການເຊັນສັນຍາ ບົດບັນທຶກຄວາມເຂົ້າໃຈ ລະຫວ່າງ 2 ຝ່າຍ ໃນໄລຍະ 6 ປີ ກໍ່ຄື ແຕ່ນີ້ຮອດເດືອນມິຖຸນາ 2021 ກົມກິລາມວນຊົນ ຈະໄດ້ຈັດກິດຈະກຳເຝິກອົບຮົມ ກຳມະການຕັດສິນ, ຄູເຝິກໃນຂັ້ນສູນກາງ, ກະຊວງ, ສະມາຄົມກິລາຄົນພິການ ໃຫ້ບັນດາແຂວງ ແລະ ນະຄອນຫຼວງວຽງຈັນ ໃນທົ່ວປະເທດ; ເຜີຍແຜ່ປະເພດກິລາຄົນພິການ 12 ປະເພດ ໃນຂອບເຂດທົ່ວປະເທດ ເພື່ອຈັດແຂ່ງຂັນລະດັບຊາດ, ຈັດພິມປື້ມຄູ່ມື, ກົດລະບຽບກະຕິກາການແຂ່ງຂັນກິລາ 12 ປະເພດ ມອບໃຫ້ບັນດາແຂວງ, ນະຄອນຫຼວງວຽງຈັນ ສົ່ງເສີມໃຫ້ມີການເຄື່ອນໄຫວຈັດກິດຈະກຳ ແລະ ແຂ່ງຂັນປະຈຳປີ, ສ້າງສະໂມສອນກິລາຄົນພິການຢູ່ 2 ແຂວງ ຄື: ສະຫວັນນະເຂດ, ຫຼວງພະບາງ ແລະ ນະຄອນຫຼວງວຽງຈັນ ພ້ອມທັງສົ່ງຄູເຝິກກິລາຄົນພິການລາວ 2 ທ່ານ ຮ່ວມເຝິກອົບຮົມໃນໄລຍະ 14 ວັນໃນແຕ່ລະປີ ຢູ່ປະເທດຍີ່ປຸ່ນ ໂດຍໂຄງການຊ່ວຍເຫຼືອຄັ້ງນີ້ ແມ່ນໄດ້ຮັບທຶນຈາກອົງການໄຈກາ ສະໜັບສະໜູນ ຈຳນວນ 632.300 ໂດລາສະຫະລັດ ແລະ ອົງການ ເອດີດີພີ ຈຳນວນ 67.700 ໂດລາສະຫະລັດ.
ໂດຍ ອ້ວນດຳ ນສພ ສຶກສາ-ກິລາ
ຂອບໃຈຂ່າວຈາກ: 
ຕິດຕາມຂ່າວເສດຖະກິດລາວ ກົດໄລຄ໌ເລີຍ!