ວັນທີ 6 ພະຈິກ 2016 ທີ່ ແຂວງຫຼວງພະບາງໄດ້ມີກອງປະຊຸມສຶກສາໂຄງການແລກປ່ຽນຄວາມຮູ້ດ້ານວິຊາການລະຫວ່າງທະນາຄານແຫ່ງ ສປປ ລາວ ແລະທະນາຄານ ສ.ເກົາຫຼີ
ໂດຍເປັນປະທານຂອງທ່ານ ເພັດສະຖາ ພອນແກ້ວວົງວິຈິດ ຫົວໜ້າຫ້ອງການທະນາຄານແຫ່ງ ສປປ ລາວ, ມີທ່ານ ກີ ຊັນຈາງ (kee sun jang) ຮອງຫົວໜ້າກົມຮ່ວມມືທະນາຄານກາງ ສ. ເກົາຫຼີ ພ້ອມດ້ວຍວິຊາການທັງສອງທະນາຄານເຂົ້າຮ່ວມ.
ທ່ານ ເພັດສະຖາພອນ ແກ້ວວົງວິຈິດ ກ່າວວ່າ: ການຮ່ວມມືທາງດ້ານວິຊາການສອງທະນາຄານຄັ້ງນີ້ແມ່ນເປັນ ຄັ້ງທີ 2 ແລ້ວ ເພື່ອສຶກສາຄົ້ນຄວ້າໂຄງການແລກປ່ຽນຄວາມຮູ້ທາງດ້ານວິຊາການ ຊຶ່ງໃນປີ 2015 ຜ່ານມາ ທະນາຄານແຫ່ງ ສປປ ລາວ ໄດ້ຮັບການຊ່ວຍເຫຼືອຈາກທະນາຄານກາງ ສ.ເກົາຫຼີ ໃນໂຄງການແລກປ່ຽນຄວາມຮູ້ທາງດ້ານວິຊາການໃນຫົວຂໍ້ທີ່ວ່າ “ການພັດທະນາໂຄງສ້າງດ້ານການເງິນ”.
ຜ່ານການຈັດຕັ້ງປະຕິບັດເຫັນວ່າໂຄງການປະສົບຜົນສໍາເລັດ ແລະມີຜົນປະໂຫຍດຫຼາຍຕໍ່ທະນາຄານແຫ່ງ ສປປ ລາວ ເປັນຕົ້ນແມ່ນພະນັກງານຂອງທະນາຄານແຫ່ງ ສປປ ລາວ ຈໍານວນໜຶ່ງ ໄດ້ປະກອບສ່ວນໃນການສ້າງຄວາມສາມາດໃນການຄົ້ນຄວ້າວຽກງານວິຊາການ ແລະໄດ້ຂຽນບົດຄົ້ນຄວ້າແລກປ່ຽນກັບສາສະດາຈານຈາກມະຫາວິທະຍາໄລທີ່ມີຊື່ສຽງຂອງ ສ. ເກົາຫຼີ ແລະໄດ້ມີການຈັດສໍາມະນາຢູ່ ສປປ ລາວ 2 ຄັ້ງ ແລະຢູ່ ສ. ເກົາຫຼີ 1 ຄັ້ງ.
ສະນັ້ນໂຄງການນີ້ຈຶ່ງໄດ້ສືບຕໍ່ໃຫ້ການຊ່ວຍເຫຼືອທະນາຄານແຫ່ງ ສປປ ລາວ ໃນປີ 2016 ໃນຫົວຂໍ້ທີ່ວ່າ: “ການຈັດຕັ້ງປະຕິບັດ ແລະຄຸ້ມຄອງລະບົບຊໍາລະສະສາງ” ໂຄງການນີ້ເປັນຂີດໝາຍສໍາຄັນໃນການເສີມສ້າງມິດຕະພາບ ແລະການຮ່ວມມືລະຫວ່າງທະນາຄານແຫ່ງ ສປປ ລາວ ກັບທະນາຄານ ສ. ເກົາຫຼີ ຕື່ມອີກ.
ຈາກໜັງສືພິມເສດຖະກິດ-ສັງຄົມ