ພວກຂ້າພະເຈົ້າມີຄວາມປິຕິຊົມຊື່ນທີ່ໄດ້ເຫັນວ່າໜຶ່ງປີຜ່ານມາ, ລາວໄດ້ປະສົບຜົນສຳເລັດໃນການຈັດກອງປະຊຸມໃຫຍ່ຄັ້ງທີ 10 ຂອງພັກ, ຜົນສຳເລັດໃນການມອບ-ຮັບໜ້າທີ່ຂອງລັດຖະບານແລະສະພາແຫ່ງຊາດຊຸດເກົ່າແລະຊຸດໃໝ່ ແລະປະສົບຜົນສຳເລັດໃນການປະຕິບັດໜ້າທີ່ເປັນປະທານໝູນວຽນອາຊຽນ ທັງໄດ້ຮັບຜົນສຳເລັດໃໝ່ທີ່ໜ້າພາກພູມໃຈໃນພາລະກິດປ່ຽນແປງໃໝ່.

ປັດຈຸບັນ, ສປປລາວ ມີລະບົບການເມືອງໝັ້ນທ່ຽງ, ສັງຄົມສາມັກຄີປອງດອງ,ເສດຖະກິດມີການພັດທະນາ ແລະຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເລື້ອຍໆ. ຈາກນີ້ ພວກຂ້າພະເຈົ້າເຊື່ອໝັ້ນວ່າ ພາຍໃຕ້ການນຳພາຂອງສູນກາງພັກປະຊາຊົນປະຕິວັດລາວທີ່ມີສະຫາຍ ບຸນຍັງວໍລະຈິດເປັນເລຂາທິການໃຫຍ່, ປະຊາຊົນລາວຈະສາມາດບັນລຸເປົ້າໝາຍສູ້ຊົນຕາມທີ່ກອງປະຊຸມໃຫຍ່ຄັ້ງທີ 10 ຂອງພັກປະຊາຊົນປະຕິວັດລາວໄດ້ຕັ້ງໄວ້ ແລະຈະໄດ້ຮັບຜົນສຳເລັດຫຼາຍຍິ່ງຂຶ້ນໃນພາລະກິດສ້າງສາພັດທະນາປະເທດຊາດໃຫ້ຫັນເປັນທັນສະໄໝ.

ປີນີ້ເປັນປີຄົບຮອບ 55 ປີແຫ່ງການສ້າງຕັ້ງສາຍພົວພັນທາງການທູດລະຫວ່າງຈີນ-ລາວ. ສອງຝ່າຍໄດ້ຮັກສາການໄປມາຫາສູ່ກັນຢ່າງໃກ້ຊິດລະຫວ່າງການນຳຂັ້ນສູງ, ຕັ້ງໜ້າປະຕິບັດການກໍ່ສ້າງ “ໜຶ່ງແລວທາງໜຶ່ງເສັ້ນທາງ”ແລະຮ່ວມມືໃນການລົງທຶນເພື່ອເພີ່ມຂີດຄວາມສາມາດການຜະລິດ ທັງລົງເລິກການແລກປ່ຽນດ້ານວັດທະນະທຳຢ່າງບໍ່ຢຸດຢັ້ງ ແລະຊຸກຍູ້ສາຍພົວພັນຮ່ວມມືແລະມິດຕະພາບຖານບ້ານໃກ້ເຮືອນຄຽງຈີນ-ລາວໃຫ້ພັດທະນາຢ່າງໃຫຍ່ຫຼວງ.

ສປຈີນຍິນດີຮ່ວມກັບລາວພະຍາຍາມເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວໃຫ້ສືບຕໍ່ຂະຫຍາຍຕົວ ແລະພ້ອມກັນກໍ່ສ້າງຄູ່ຮ່ວມຊະຕາກຳຈີນ-ລາວທີ່ບໍ່ສາມາດຕັດແຍກອອກຈາກກັນໄດ້ບົນພື້ນຖານທີ່ດີໃນປັດຈຸບັນ.

ຂໍອວຍພອນໃຫ້ ສາທາລະນະລັດປະຊາຕິປະໄຕປະຊາຊົນລາວຈະເລີນເຂັ້ມແຂງ ແລະ ປະຊາຊົນຜາສຸກ!
ອວຍພອນໃຫ້ສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວໝັ້ນຄົງ ແລະ ຂະຫຍາຍຕົວຢ່າງບໍ່ຢຸດຢັ້ງ!

ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ ສປ ຈີນ
ທ່ານຫຼີເຄີ້ສຽງ ນາຍົກລັດຖະມົນຕີ ສປ ຈີນ
ທ່ານຈ່າງເຕີຈ່ຽງ ປະທານສະພາປະຊາຊົນແຫ່ງຊາດ ສປ ຈີນ

ວັນທີ 2 ທັນວາ 2016 ນະຄອນຫຼວງປັກກິ່ງ ສປຈີນ.

ໂດຍ: ສຸຣິດົງ

ທີ່ມາຂ່າວຈາກ: ສຳນັກຂ່າວສານປະເທດລາວ

ຕິດຕາມຂ່າວເສດຖະກິດລາວ ກົດໄລຄ໌ເລີຍ!