ພິທີວາງສີລາລືກໂຄງການກໍ່ສ້າງເຂື່ອນໄຟຟ້ານໍ້າຕົກ ຂະໜາດນ້ອຍນໍ້າຕະລານ ເມືອງຫຼວງນໍ້າທາ ແຂວງຫຼວງນໍ້າທາ ໄດ້ຈັດຂຶ້ນວັນທີ 28 ພະຈິກຜ່ານມາ ທີ່ບ້ານສິນອຸດົມ ໂດຍແມ່ນບໍລິສັດນໍ້າຕະລານພາວເວີຈໍາກັດ ຊຶ່ງແມ່ນນັກທຸລະກິດເອກະຊົນພາຍໃນ ແຂວງຫຼວນໍ້າທາເປັນຜູ້ລົງທຶນກໍ່ສ້າງ 100%. ເຂົ້າຮ່ວມໃນພິທີຂອງທ່ານ ບຸນຢີ່ ແກ້ວຄຸນເມືອງ ຮອງເຈົ້າແຂວງໆຫຼວງນໍ້າທາ, ທ່ານ ບຸນມາ ມະນີວົງ ຮອງຜູ້ອໍານວຍການໃຫ່ຍລັດວິສາຫະກິດໄຟຟ້າລາວ ພ້ອມຜູ້ຕາງໜ້າຈາກຂະແໜງການກ່ຽວຂ້ອງ ແລະບໍລິສັດເຂົ້າຮ່ວມ.

ທ່ານ ຄໍາຜາຍ ໄຊພະຈັນ ອໍານວຍການບໍລິສັດນໍ້າຕະລານພາວເວີຈໍາກັດກ່າວຕໍ່ພິທີວ່າ: ໂຄງການກໍ່ສ້າງເຂື່ອນໄຟຟ້ານໍ້າຕົກຂະໜາດນ້ອຍນໍ້າຕະລານ ຕັ້ງຢູ່ທີ່ເຂດຊາຍແດນບ້ານສິນອຸດົມ ເມືອງຫຼວງນໍ້າທາ ແລະເມືອງນາໝໍ້ ແຂວງອຸດົມໄຊ, ມີກໍາລັງຕິດຕັ້ງ 5 ເມກາວັດ, ມູນຄ່າ 10,5 ລ້ານໂດລາ ຫຼື ປະມານ 84 ຕື້ກວ່າກີບ, ຈະກໍ່ສ້າງໃນລັກ ສະນະເຂື່ອນຝາຍນໍ້າລົ້ນ, ມີຄວາມສູງ ຂອງສັນເຂື່ອນ 12,5 ແມັດ, ກວ້າງ 18 ແມັດ, ມີຄວາມຍາວ 17,5 ແມັດ, ມີ ຄອງເໝືອງສົ່ງນໍ້າ 6,2 ກິໂລແມັດ, ປະຕູລະບາຍຊາຍ 1 ປ່ອງ, ອ່າງແຮງ ດັນນໍ້າຂະໜາດ 46×34,2 ແມັດ, ສູງ 7 ແມັດ, ສ້າງທໍ່ແຮງດັນຍາວ 186 ແມັດ, ຄວາມສູງຂອງນໍ້າໂຕນເຂົ້າເຮືອນຈັກ 93 ແມັດ, ຕິດຕັ້ງເຄື່ອງຈັກຜະລິດກະແສ ໄຟຟ້າ 3 ເຄື່ອງ, ມີກໍາລັງແຮງຕິດຕັ້ງ 5 ເມກາວັດ, ສາມາດຜະລິດກະແສໄຟຟ້າໄດ້ 18,8 ລ້ານກິໂລວັດໂມງຕໍ່ປີ, ການກໍ່ສ້າງຈະໃຫ້ສໍາເລັດພາຍໃນ 36 ເດືອນເຖິງປີ 2019 ຈິ່ງຈະສໍາເລັດ 100% ແລະຜະລິດກະແສໄຟຟ້າຂາຍໃຫ້ລັດວິສາຫະກິດໄຟຟ້າລາວ. ພ້ອມນັ້ນ ທາງບໍລິສັດຍັງຈະໄດ້ກໍ່ສ້າງສາຍສົ່ງ ແຮງກາງ 22 ກິໂລໂວນຍາວ 23 ກິໂລແມັດເຂົ້າໄປຫາສະຖານີໄຟຟ້າບ້ານໃໝ່ ເມືອງຫຼວງນ້ຳທາຕື່ມອີກ.

ຂ່າວ: ເສດຖະກິດ-ສັງຄົມ