ຫວ່າງບໍ່ດົນມານີ້ທ່ານ ສົມຈັນ ຈວງໃບຄຳ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສະຫວັນນະເຂດພ້ອມຄະນະໄດ້ລົງຕິດຕາມເບິ່ງຄວາມຄືບໜ້າ ຂອງການບູລະນະປະຕິສັງຂອນ ຫໍແຈກໄມ້ຫຼັງເກົ່າວັດພະທາດອີງຮັງ ພາຍຫຼັງທີ່ໄດ້ຊຸດໂຊມເກົ່າແກ່ຫຼາຍ ແລະ ມີຄວາມຈຳເປັນຕ້ອງໄດ້ມີການປັບປຸງຄືນໃໝ່ທັງນີ້ກໍເພື່ອເປັນການອະນຸລັກຮັກສາມໍລະດົກ ທາງດ້ານວັດທະນະທຳຂອງຊາວແຂວງສະຫວັນນະເຂດໄວ້.
ສຳລັບການບູລະນະປະຕິສັງຂອນຫໍແຈກໄມ້ຫຼັງເກົ່າ ວັດພະທາດອີງຮັງເມືອງໄກສອນ ພົມວິຫານ ແມ່ນເລີ່ມລົງມືກໍ່ສ້າງມາແຕ່ວັນທີ 5 ມິຖຸນາ 2016 ມາຮອດປະຈຸບັນແມ່ນໄດ້ສຳເລັດໄປແລ້ວ 80%, ລວມມູນຄ່າການກໍ່ສ້າງທັງໝົດ ປະມານ 700 ລ້ານກີບ. ຊຶ່ງໜ້າວຽກທີ່ຍັງຄ້າງຄາ ແມ່ນມີພຽງແຕ່ການມຸງຫຼັງຄາ ທີ່ເຮັດດ້ວຍໄມ້ທີ່ຍັງຄົງຮັກສາໄວ້ ຊຶ່ງຮູບແບບ ແລະ ລັກສະນະຂອງຫໍແຈກຫຼັງເກົ່າໄວ້, ຖ້າຫາກການສະໜອງອຸປະກອນທ່ວງທັນຄາດວ່າການບູລະນະປັບປຸງແມ່ນຈະໃຫ້ສຳເລັດພາຍໃນປີ ນີ້.
ພ້ອມດຽວກັນນີ້, ຫາກທາງພາກສ່ວນໃດມີຄວາມສັດທາດ້ວຍຄວາມບໍລິສຸດໃຈກໍສາມາດຮ່ວມປະກອບສ່ວນທາງດ້ານທຶນຮອນ ກໍຄືປັດໄຈດ້ານອື່ນໆໄດ້ທີ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ຫຼື ຫ້ອງການແນວລາວສ້າງຊາດເມືອງໄກສອນພົມວິຫານ
ຂ່າວ: ເສດຖະກິດ-ສັງຄົມ