ໃນວັນທີ 29 ພະຈິກ 2016 ນີ້ ທີ່ຫໍປະຊຸມແຫ່ງຊາດ ໄດ້ຈັດຝຶກອົບຮົມກ່ຽວກັບວຽກງານເຂດເສດຖະກິດພິເສດຂອງ ສປ ຈີນ ລະຫວ່າງ ສະພາແຫ່ງຊາດລາວ-ຈີນ ໂດຍມີທ່ານ ນາງ ສີໄສ ລືເດດມູນສອນ ຮອງປະທານສະພາແຫ່ງຊາດລາວ, ທ່ານ ຈາງ ຢົງ ຮອງຫົວໜ້າຄະນະກໍາມາທິການກົດໝາຍສະພາແຫ່ງຊາດຈີນ, ມີບັນດາຮອງປະທານສະພາແຫ່ງຊາດ ແລະ ສະມາຊີກສະພາແຫ່ງຊາດ ແລະ ສະພາປະຊາຊົນຂັ້ນແຂວງພ້ອມດ້ວຍຜູ້ຕາງກະຊວງອົງການກ່ຽວຂ້ອງເຂົ້າຮ່ວມ.
ທ່ານ ໄຂຄໍາ ວັນນະວົງສີ ຫົວໜ້າສູນຝຶກອົບຮົມ ແລະ ຂໍ້ມູນຂ່າວສານສະພາແຫ່ງຊາດລາວ ໄດ້ກ່າວວ່າ: ການຈັດຕັ້ງຝຶກອົບຮົມໃນຄັ້ງນີ້ ບັນດາຜູ້ເຂົ້າຮ່ວມຈະໄດ້ມີການແລກປ່ຽນ ແລະ ຖອດຖອນບົດ ຮຽນກ່ຽວກັບການພັດທະນາເຂດເສດຖະກິດພິເສດຢູ່ ສປ ຈີນ ກັບ ນັກວິທະຍາກອນຈາກສະພາແຫ່ງຊາດຈີນ ໂດຍຈະໄດ້ລົງເລິກ 4 ບັນຫາໃຫຍ່ເຊັ່ນ: ບົດຮຽນໃນການສ້າງ ແລະ ພັດ ທະນາເຂດເສດຖະ ກິດພິເສດຢູ່ ສປ ຈີນ, ລະບົບກົດໝາຍກ່ຽວກັບທີ່ດິນ ເຂດຊົນນະບົດ ແລະ ການເວນຄືນຕຶກອາຄານໃນຕົວເມືອງຂອງ ສປ ຈີນ, ການປະຕິຮູບລະບົບການເວນຄືນທີ່ດິນຢູ່ ສປ ຈີນ ແລະ ການພັດທະນາເຂດເສດ ຖະກິດພິເສດ ນະຄອນເຊີນເຈີນ ແຫ່ງປະເທດຈີນ. ທັງນີ້ເພື່ອຍົກລະດັບຄວາມຮັບຮູ້ທາງດ້ານທິດສະດີ ແລະ ພຶດຕິກໍາກ່ຽວກັບການພັດທະນາເຂດເສດຖະກິດພິເສດໂດຍຜ່ານປະສົບການຈາກສາກົນ ເພື່ອມາໜູນໃຊ້ເຂົ້າໃນສະພາບຕົວຈິງຢູ່ປະເທດເຮົາຢ່າງຖືກຕ້ອງ ແລະ ມີປະສິດ ທິຜົນ
ຂ່າວ: ສຳນັກຂ່າວສານປະເທດລາວ