ເພື່ອແກ້ໄຂປາກົດການຫຍໍ້ທໍ້ທີ່ເກີດຂຶ້ນກັບສັງຄົມປະຈຸບັນ ໃນອາທິດຜ່ານມາຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ເມືອງໄຊທານີ ນະຄອນຫຼວງວຽງຈັນ ສົມທົບກັບຄະນະກຳມະການສະເພາະກິດຂອງເມືອງນຳພາໂດຍ ທ່ານ ນູໄລ ລັດຕະນະ ຮອງຫ້ອງການ ຖວທ ເມືອງໄຊທານີ ລົງກວດກາບັນດາຫົວໜ່ວຍທຸລະກິດ ທີ່ດຳເນີນບໍ່ຖືກຕ້ອງ ຕາມລະບຽບກົດໝາຍ ໂດຍສະເພາະພາກທຸລະກິດຂອງຕ່າງປະເທດທີ່ເຂົ້າມາລາວໃນນາມນັກທ່ອງທ່ຽວ ແຕ່ມາລັກລອບປະກອບອາຊີບທຳການຄ້າຂາຍ ຊຶ່ງອາຊີບດັ່ງກ່າວກໍເປັນອີກອາຊີບທີ່ສະຫງວນໄວ້ໃຫ້ປະຊາຊົນລາວທຳມາຫາກິນ.
ທ່ານ ນູໄລ ລັດຕະນະ ໄດ້ກ່າວວ່າ: ອີງຕາມທິດຊີ້ນຳຂອງຂັ້ນເທິງ ກໍຄືການນໍາພາທ່ານເຈົ້າເມືອງກ່ຽວກັບການ ແກ້ໄຂປາກົດການຫຍໍ້ທໍ້ໃນສັງຄົມ ລວມເຖິງການລັກລອບປະກອບທຸລະກິດຂອງຕ່າງປະເທດ ໂດຍສະເພາະ ຊາວຫວຽດນາມ ຊຶ່ງພວກເຂົາໄດ້ເຂົ້າມາລາວໃນນາມນັກທ່ອງທ່ຽວ ແຕ່ມາດຳເນີນທຸລະກິດທີ່ຜິດຕໍ່ລະບຽບກົດໝາຍຂອງ ສປປ ລາວ ດັ່ງນັ້ນ, ຄະນະກຳມະການສະເພາະກິດ ຂອງເມືອງໄຊທານີ ໄດ້ລົງກວດກາ ແລະສຶກສາອົບຮົມຮ້ານທີ່ຍັງບໍ່ຖືກຕາມລະບຽບໄດ້ທັງໝົດ 10 ຫົວໜ່ວຍ, ໃນນັ້ນ ຮ້ານກາເຟຢອດ 4 ຫົວໜ່ວຍ, ຮ້ານອາຫານ, ຮ້ານເຝີ ແລະເຂົ້າປຸ້ນ 4 ຫົວໜ່ວຍ ແລະຮ້ານເສີມສວຍ 2 ຫົວໜ່ວຍ. ນອກນີ້ ຍັງສາມາດເກັບກູ້ໄຟແສງສີໄດ້ເຖິງ 4 ຮ້ານ, ເກັບກູ້ປ້າຍໂຄສະນາທີ່ບໍ່ໄດ້ຮັບອະນຸຍາດ ໄດ້ທັງໝົດ 7 ປ້າຍ ແລະຍຶດເຄື່ອງສຽງຄາຣາໂອເກະໄດ້ 1 ເຄື່ອງ.
ນອກຈາກນີ້ ທ່ານຍັງໃຫ້ຮູ້ຕື່ມວ່າ ຄະນະກຳມະການສະເພາະກິດຂອງເມືອງໄດ້ລົງເຄື່ອນໄຫວຈັດຕັ້ງປະຕິບັດເລີ່ມແຕ່ຕົ້ນປີ 2016 ເປັນຕົ້ນມາແມ່ນ ສາມາດປັບປຸງແກ້ໄຂໄດ້ຫຼາຍບັນຫາເຊັ່ນ: ຮ້ານອາຫານ, ຮ້ານກິນດື່ມທີ່ບໍ່ປະຕິບັດຕາມລະບຽບ ການຄຸ້ມຄອງລັດແມ່ນ ໄດ້ຫັນເຂົ້າສູ່ລະບຽບ ແລະຫົວໜ່ວຍທຸລະກິດທີ່ເກີດຂຶ້ນໃໝ່ກໍໄດ້ຊຸກຍູ້ໃຫ້ເຂົາເຈົ້າ ເຮັດໜັງສືຂໍອະນຸຍາດດຳເນີນທຸລະກິດ ໃຫ້ຖືກຕ້ອງ, ຄຽງຄູ່ກັນນັ້ນກໍປາສະຈາກບໍ່ໄດ້ເຖິງບັນຫາທີ່ຍັງຄົງຄ້າງ ຍ້ອນແນວນັ້ນຄະນະກຳມະການສະເພາະກິດຂອງເມືອງຈິ່ງໄດ້ສຶບຕໍ່ລົງແກ້ໄຂບັນຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມປະຈຸບັນໃຫ້ ນັບມື້ດີຂຶ້ນ ໂດຍສະເພາະບັນຫາທີ່ເກີດຂຶ້ນໃນຂົງເຂດວຽກງານວັດທະນະທຳ ແລະທ່ອງທ່ຽວ.
ຂ່າວ: ເສດຖະກິດ-ສັງຄົມ