ທ່ອງທ່ຽວ ກັບ ລາວໂພສຕ໌ ມືນີ້ແອັດມິນຈະພາທຸກຄົນມາຮູ້ຈັກກັບ ສະຖານທີ່ທ່ອງທ່ຽວທີ່ໜ້າສົນໃຈຂອງແຕ່ລະເມືອງຫຼວງ ໃນ 10 ປະເທດອາຊຽນ ເຊິ່ງຕ້ອງບອກເລີຍວ່າສະຖານທີ່ທ່ອງທ່ຽວຂອງແຕ່ລະປະເທດນັ້ນມີຄວາມໜ້າສົນໃຈ, ງົດງາມ ແລະ ເປັນເອກະລັກຂອງປະເທດແຕກຕ່າງກັນໄປ ເຊິ່ງຕອນນີ້ເຮົາກໍ່ມາຮູ້ຈັກ 10 ສະຖານທີ່ທ່ຽວໃນ 10 ປະເທດກັນເລີຍ

Vientiane, Laos

ມາເລີ່ມກັນທີ່ນະຄອນຫຼວງ ປະເທດລາວ ສະຖານທີ່ທ່ຽວແຫ່ງທຳອິດ ນະຄອນຫຼວງວຽງຈັນຂອງລາວເຮົາ, ທຳອິດເລີຍແມ່ນປະຕູໄຊທີ່ຕັ້ງສະຫງ່າຢູ່ໃຈກາງນະຄອນຫຼວງວຽງຈັນ ຖືເປັນໜຶ່ງໃນເອກະລັກທີ່ສຳຄັນຂອງລາວ, ຕໍ່ມາມີຫໍພະແກ້ວ ທີ່ຖືເປັນຫໍພິພິຕະພັນ ແລະ ມີເຄື່ອງທີ່ລະນຶກໃຫ້ຊື້ເປັນຈຳນວນຫຼາຍສົມຄວນ ແລະ ທີ່ບໍ່ຄວນພາດແມ່ນພະທາດຫຼວງວຽງຈັນ ເປັນທາດຂະໜາດໃຫຍ່ສີທອງສະຫງ່າ ນອກຈາກນັ້ນຍັງມີວັດເກົ່າແກ່ຄູ່ນະຄອນຫຼວງວຽງຈັນກໍຄືວັດສີສະເກດ, ຖ້າໃຜມັກຂໍພອນຕ້ອງມາທີ່ວັດສີເມືອງ ຂຶ້ນຊື່ວ່າເປັນວັດສັກສິດ ແລະ ໄປທ່ຽວຊົມຂົວມິດຕະພາບລາວ-ໄທ 1 ແລ້ວຢ່າລືມໄປທີ່ວັດຊຽງຄັວນ ສະຖານທີ່ທ່ຽວແຫ່ງມົນສະເໜ່ທາງດ້ານວັດທະນະທຳ -ສາດສະໜາພຸດສ່ວນໃຜທີ່ມັກເລາະຫາຊື້ເຄື່ອງກໍ່ສາມາດໄປໄດ້ທີ່ຕະຫຼາດເຊົ້າ, ລາວໄອເຕັກ, ວຽງຈັນເຊັນເຕີ້ ເປັນຕົ້ນ. ຍາມຫົວແລງບໍ່ຮູ້ຈະໄປຫຼິ້ນໄສ ກໍ່ສາມາດໄປຍ່າງເລາະຫຼິ້ນແຖວແຄມຂອງນັ່ງຊົມວິວງາມໆກ່ອນຕະເວັນຈະຫຼັບຂອບຟ້າ ແລ້ວເຕັ້ນອາລາບິກອອກກຳລັງກາຍຜ່ອນຄາຍກັບສາຍລົມເຢັນເບົາໆ

Bangkok, Thailand

ດິນແດນທີ່ເຕັມໄປດ້ວຍສະຖານທີ່ທີ່ໜ້າສົນໃຈ ບໍ່ວ່າຈະເປັນບັນດາວັດວາອາຮາມ ເຊັ່ນ: ວັດພະແກ້ວ, ວັດແຈ້ງ, ວັດໂພ ແລະ ອື່ນໆ. ນອກຈາກນັ້ນຍັງມີສະຖານທີ່ຂາຍຂອງກິນທີ່ມີຊື່ສຽງຢູ່ຫຼາກຫຼາຍແຫ່ງ, ດ້ານແສງສີສຽງຍາມຄໍ່າຄືນກໍ່ຖືວ່າເປັນຈຸດທີ່ດຶງດູດບັນດານັກທ່ອງທ່ຽວ ທັງຄົນຕ່າງປະເທດ ແລະ ຄົນໄທເອງ ບໍ່ວ່າຈະເປັນແຖວສຸຂຸມວິດ, ຖະໜົນເຂົ້າສານ ຫຼື ສີລົມເປັນຕົ້ນ ແລະ ສຳລັບຄົນທີ່ມັກເລາະຊື້ເຄື່ອງກໍ່ບໍ່ຕ້ອງຫ່ວງເພາະສາມາດຫາຊື້ພວກຂອງແບຣນເນມແຖວສະຍາມໃຈກາງກຸງເທບ ຫຼື ຈະເປັນຂອງຖືກຂອງດີຢູ່ແຖວສຳເພັງ, ໂບ້ເບ້ ກໍ່ມີໃຫ້ເລືອກຢ່າງຈຸໃຈ

Phnom Penh, Cambodia

ເຕັມໄປດ້ວຍບູຮາສະຖານຈໍານວນຫຼວງຫຼາຍໄດ້ແກ່ວັດພະນົມ ເຊິ່ງເປັນທີ່ມາຂອງຊື່ເມືອງ, ອະນຸສາວະລີອິດສະຫຼະ ພາບ (Independence Monument). ນອກຈາກນີ້ຍັງມີພິພິຕະພັນແຫ່ງຊາດພະນົມເປັນ, ຫໍປະຊຸມຈັດຕຸຣະມຸກ, ຣໍຍອລ ພາເລສ. ສຳລັບແຫຼ່ງເລາະຊື້ເຄື່ອງທີ່ໜ້າສົນໃຈໄດ້ແກ່ຕະຫຼາດເກົ່າ (Phsar Chas) ສູນຮວມສິນຄ້າທ້ອງຖິ່ນພະນົມເປັນ ແລະ ຕະຫຼາດ Urussey ເຊິ່ງເປັນຕະຫຼາດທີ່ຍອດນິຍົມຂອງບັນດານັກທ່ອງທ່ຽວ ເຊິ່ງມີໃຫ້ເລາະຊື້ຫາທັງຂອງກິນ, ຂອງຝາກ ແລະ ບັນດາຂອງສົດ.

Bandar Seri Begawan, Brunei Darussalam

ມາທີ່ປະເທດ ບລູໄນ ມາຊົມພິພິຕະພັນຣໍຍອລເຣກກາເລຍ (Royal Regalia Museum) ທີ່ເຊິ່ງຮວບຮວມຂອງເຄື່ອງໃຊ້ຂອງສຸນລະຕ່ານອົງປະຈຸບັນ, ມີຄວາມງົດງາມ. ມາຕໍ່ກັນທີ່ມັດສະຢິດທອງຄໍາ ເຊິ່ງເປັນມັດສະຢິດທີ່ໃຫຍ່ ແລະ ອະລັງການທີ່ສຸດໃນປະເທດບຼູໄນ. ສ່ວນໃຜທີ່ມັກເລາະຊື້ເຄື່ອງກໍ່ມາກັນໄດ້ທີ່ Yayasan Sultan Haji Hassanal Bolkial Complex ແລະ Gadong Shopping Mall ເຊິ່ງເປັນຫ້າງສັບພະສິນຄ້າຂະໜາດໃຫຍ່ ມີສິນຄ້າຫຼາກຫຼາຍລາຄາໃຫ້ເລືອກຊື້.

Nay Pyi Taw, Myanmar

ເນປິດໍ ເມືອງຫຼວງແຫ່ງໃໝ່ຂອງປະເທດມຽນມາ ເຊິ່ງປຽບເໝືອນສູນກາງການທ່ອງທ່ຽວຂອງປະເທດມຽນມາ ທີ່ຜູ້ຄົນຕ້ອງສັນຈອນຜ່ານໄປມາ ແລະ ກໍ່ຕ້ານທານບໍ່ໄດ້ທີ່ຈະເລາະເບິ່ງຄວາມສວຍງາມຂອງບັນດາສະຖານທີ່ທ່ອງທ່ຽວ ໄດ້ແກ່ມະຫາເຈດີອຸປປະຕະສັນຕິ (Uppatasanti) ອົງເຈດີຂະໜາດໃຫຍ່ທີ່ຈຳຮອງແບບມາຈາກມະຫາທາດເຈດີຊະເວດາກອງໃນຍ່າງກຸ້ງ. ນອກຈາກນີ້ຍັງມີສະຖານທີ່ທ່ອງທ່ຽວສຳຄັນເຊັ່ນ: ອານຸສາວະລີ 3 ກະສັດ, ອາຄານສະພາແຫ່ງຊາດອັນກວ້າງໃຫຍ່.

Manila, Philippines

ທີ່ກຸງມະນີລາ ເຈົ້າສາມາດເພີດເພີນໄປກັບນໍ້າທະເລໃສໃສ, ພູເຂົາໄຟຂະໜາດນ້ອຍທີ່ສຸດໃນໂລກ, ທະເລສາບ ແລະ ຍັງມີກິດຈະກຳປີນເຂົາວັດຄວາມໃຈກ້າຂອງນັກທ່ອງທ່ຽວທີ່ມັກໃນຄວາມທ້າທາຍອີກດ້ວຍ. ນອກຈາກນີ້ຍັງມີສະຖານທີ່ທີ່ໜ້າສົນໃຈໄດ້ແກ່ ວິຫານກຸງມະນີລາ (Manila Cathedral) ທີ່ມີລັກສະນະຄ້າຍກັບສະຖາປັດຕະຍະກຳສະໄຕລ໌ໂຣມັນ, ສວນ Rizal ສວນສາທາລະນະທີ່ມີອານຸສາວະລີ ບຸກຄົນສຳຄັນຂອງຟີລິບປິນຕັ້ງຢູ່ ແລະ ແຖວໄຊນາທາວຂອງກຸງມະນີລາ.

Kuala Lumpur, Malaysia

ຕຶກແຝດເປໂຕຼນາສ (Petronas Twin) ແມ່ນທີ່ເໝາະກັບການຊົມວິວທິວທັດຍາມລາຕີ ບໍ່ໄກຈາກກັນນັ້ນເຈົ້າຈະພົບກັບສວນສາທາລະນະ KLCC Park ເຊິ່ງເປັນສວນສາທາລະນະໃຈກາງກົວລາລຳເປີ ແລະ ສຳລັບໃຜທີ່ມັກການເລາະຊື້ສິນຄ້າທີ່ Central Market ແມ່ນບ່ອນທີ່ເຈົ້າຕ້ອງມາແວ່ ແລະ ທາງດ້ານຫຼັງຂອງຕະຫຼາດແຫ່ງນີ້ເປັນທີ່ຕັ້ງຂອງ The Annexe Gallery ໂດຍຈະມີການຈັດນິທັດສະການພາບວາດສິລະປະ ແລະ ການສາຍໜັງອີກດ້ວຍ.

Hanoi, Vietnam

ເມືອງຫຼວງອັນເກົ່າແກ່ຂອງຫວຽດນາມ ທີ່ເຈົ້າຈະໄດ້ພົບກັບພິພິຕະພັນປະຫວັດສາດອັນເກົ່າແກ່ທີ່ມີບູຮານວັດຖຸ ທີ່ຫາເບິ່ງໄດ້ຍາກ ຫຼື ຈະເປັນຕະຫຼາດດົງຊວນ (Dong Xuan) ເຊິ່ງມີສິນຄ້າ ແລະ ເຄື່ອງທີ່ລະນຶກໃຫ້ເລືອກຊື້ຢ່າງຫຼວງຫຼາຍ ເຊິ່ງນອກຈາກບ່ອນທ່ຽວໃນເມືອງແລ້ວຍັງມີອີກສະຖານທີ່ທີ່ໜຶ່ງທີ່ບໍ່ຄວນພາດ ເຊິ່ງກໍ່ຄ້ືເມືອງເກົ່າທີ່ເຕັມໄປດ້ວຍຜູ້ຄົນຫຼວງຫຼາຍເທິງຫົນທາງເສັ້ນນ້ອຍໆ ທີ່ມີ ອາຄານບ້ານຊ່ອງນັບຮ້ອຍຫຼັງ.

Singapore

ມາທີ່ສະຖານທີ່ສຸດຮິດຢ່າງ ໂຮງແຮມເມຣິນາເບແຊນສທີ່ມີຈຸດຂາຍຢູ່ທີ່ສະລອຍນໍ້າລອຍຟ້າ ທີ່ຈະເຮັດໃຫ້ເຈົ້າເຫັນສິງກະໂປທົ່ວທັງເມືອງ. ນອກຈາກນີ້ຍັງມີ Singapore Flyer ຊິງຊ້າສະຫວັນຂະໜາດໃຫຍ່ ແລະ ທີ່ຂາດບໍ່ໄດ້ແມ່ນ ຣີສອດເວີລເຊັນໂຕຊ່າ ທີ່ມີທັງໂຊນ Universal Studio Singapore, ສວນນໍ້າ, ກາສິໂນ, ພິພິະພັນສັດນໍ້າ ແລະ ເຄື່ອງຫຼິ້ນຫຼາກຫຼາຍ ແຕ່ຖ້າເປັນຜູ້ທີ່ມັກເລາະຊື້ເຄື່ອງຕ້ອງຖະໜົນອໍຊາດ (Orchard Road).

Jakarta, Indonesia

ສຳລັບໃຜທີ່ພາເດັກນ້ອຍໄປນຳກໍ່ຢ່າລືມແວະມາທີ່ Kidzania ທີ່ເຕັມໄປດ້ວຍສາລະຄວາມຮູ້ທີ່ ເດັກນ້ອຍຈະໄດ້ພາກັນຈິນຕະນາການໃນໂລກສ້າງສັນ ດ້ານການທ່ອງທ່ຽວທຳມະຊາດທີ່ໄດ້ຮັບຄວາມນິຍົມແມ່ນໝູ່ເກາະພັນເກາະ (Thousand Islands). ນອກຈາກນີ້ຍັງມີເມືອງເກົ່າຈາກາຕາ ໂອລ ທາວ, ຈະຕຸລັດ Fatahillah ແລະ ຈະຕຸລັດ Merdeka ທີ່ສະແດງໃຫ້ເຫັນສະຖາປັດຕະຍະກຳອັນແສນງົດງາມຂອງສະໄໝລ່າອະນານິຄົມ.

ແລ້ວເຮົາກໍ່ໄດ້ຮູ້ຈັກກັບ 10 ສະຖານທ່ຽວທີ່ໜ້າສົນໃຈຂອງເມືອງຫຼວງ ຂອງແຕ່ລະປະເທດໃນອາຊຽນກັນແລ້ວ ເຫັນແລ້ວກໍ່ມີແຕ່ສະຖານທີ່ທີ່ໜ້າສົນໃຈ ແລະ ງາມແຕກຕ່າງກັນອອກໄປຕາມເອກະລັກຂອງປະເທດນັ້ນໆ ເອົາເປັນວ່າຖ້າໃຜໄດ້ໄປທ່ຽວໄປເທດໃດໃນອາຊຽນແລ້ວກໍ່ຢ່າລືມສົ່ງມາເລົ່າຄວາມຮູ້ສຶກສູ່ແອັດມິນຟັງນຳແນ່ເດີ້

ຂໍ້ມູນຈາກ: http://sabaideeasean.com/