ພິທີເປີດນຳໃຊ້ຂົວນ້ຳງຽບ 1 ແລະ ບ້ານຈັດສັນຫ້ວຍສູບໄດ້ມີຂຶ້ນໃນວັນທີ 25 ພະຈິກນີ້, ທີ່ເມືອງບໍລິຄັນ ແຂວງບໍລິຄຳໄຊ, ໂດຍການເຂົ້າຮ່ວມຂອງທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ, ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ແລະ ທ່ານ ຮອງເຈົ້າແຂວງໄຊສົມບູນ, ທັງເປັນຮອງຄະນະກຳມະການຍົກຍ້າຍ ແລະ ຟື້ນຟູຊີວິດການເປັນຢູ່ຂອງປະຊາຊົນໃນເຂດໂຄງການເຂື່ອນໄຟຟ້າດັ່ງກ່າວ.
ອຳນວຍການໂຄງການເຂື່ອນແຫ່ງນີ້ໃຫ້ຮູ້ວ່າ: ໂຄງການໄຟຟ້ານ້ຳງຽບ 1 ແມ່ນໜຶ່ງໃນໂຄງການບູລິມະສິດຂອງລັດຖະບານ ສປປລາວ ນັບແຕ່ກໍ່ສ້າງມາແຕ່ທ້າຍປີ 2014 ທາງຮອດເດືອນຕຸລາ 2016 ນີ້, ການກໍ່ສ້າງເຂື່ອນທັງໝົດມີຄວາມຄືບໜ້າເຖິງ 55 % ແລະ ຄາດວ່າຈະເປີດນຳໃຊ້ໃນອີກບໍ່ດົນນີ້, ສ່ວນການກໍ່ສ້າງຂົວ ແລະ ບ້ານຈັດສັນຫ້ວຍສູບ ກໍແມ່ນຜົນສຳເລັດໜຶ່ງຂອງໂຄງການ, ພາຍຫຼັງໃຊ້ເວລາກໍ່ສ້າງ 14 ເດືອນ, ຂົວມີຄວາມຍາວ 120 ແມັດ , ກ້ວາງ 6 ແມັດ,ອໃຊ້ທຶນໃນມູນຄ່າກໍ່ສ້າງ 1,6 ລ້ານໂດລາສະຫະລັດ ຫຼື ( ປະມານ 12 ຕື້ກວ່າກີບ), ຕາມມາດຕະຖານ ເພື່ອອຳນວຍຄວາມສະດວກໃຫ້ແກ່ ການສັນຈອນໄປມາ ຂອງປະຊາຊົນມີຄວາມສະດວກສະບາຍກວ່າເກົ່າ.
ອຳນວຍການເຂື່ອນໄຟຟ້ານ້ຳງຽບ 1 ໃຫ້ຮູ້ອີກວ່າ: ສຳລັບບ້ານຈັດສັນຫ້ວຍສູບ ເລີ່ມກໍສ້າງມາແຕ່ຕົ້ນປີ 2016, ພ້ອມສິ່ງອຳນວຍຄວາມສະດວກອື່ນໆເຊັ່ນ: ໂຮງຮຽນ, ໄຟຟ້າ, ນ້ຳສະອາດ, ລະບົບຊົນລະປະທານ, ເນື້ອທີ່ທຳການຜະລິດ ແລະ ອື່ນໆ, ເພື່ອສາມາດຮອງຮັບປະຊາຊົນທີ່ຍົກຍ້າຍ ມາຈາກເຂດທີ່ໄດ້ຮັບຜົນກະທົບຈາກການກໍ່ສ້າງເຂື່ອນປະມານ 480 ຄອບຄົວ.
ຂ່າວ: ລາວພັດທະນາ