ລັດຖະບານຈະໃຊ້ທຶນເກືອບຮ້ອຍຕື້ກີບ ເຂົ້າໃນໂຄງການກໍ່ສ້າງຍົກລະດັບທາງຄູກັ້ນນ້ຳແຕ່ສົ້ນຂົວມິດຕະພາບ 1 ທ່ານາແລ້ງ ເມືອງຫາດຊາຍຟອງຫາບ້ານໝາກຮຽວ ເມືອງປາກງື່ມ ທາງເລກທີ 13 ໃຕ້, ທີ່ມີຄວາມຍາວ 32 ກິໂລແມັດ ຊຶ່ງເປັນຄູທີ່ລົດສາມາດແລ່ນໄດ້ດ້ວຍການປູຢາງອັດສະຟານ ທັງນີ້ກໍເພື່ອແນໃສ່ອຳນວຍຄວາມສະດວກແກ່ການສັນຈອນໄປ-ມາຂອງປະຊາຊົນທັງສອງເມືອງ.
ທ່ານ ບຸນມາ ເພັດມະນີວົງ ຜູ້ຈັດການໂຄງການ ບໍລິສັດ ພົງຊັບທະວີກໍ່ສ້າງຂົວທາງ ແລະຊົນລະປະທານໃນ ນາມ ບໍລິສັດ ຮັບເໝົາກໍ່ສ້າງ ໃຫ້ສຳພາດວ່າ: ຜ່ານມາເຂດດັ່ງກ່າວແມ່ນມີຄູກັ້ນນ້ຳຢູ່ແລ້ວແຕ່ເນື່ອງຈາກມີການໃຊ້ງານມາໄດ້ຫຼາຍປີ ພ້ອມນີ້ປະຊາຊົນຍັງໃຊ້ເປັນເສັ້ນທາງລະຫວ່າງເມືອງຫາດຊາຍຟອງ ແລະເມືອງປາກງື່ມ ເພື່ອຂົນສົ່ງສິນຄ້າ, ການສັນຈອນໄປ-ມາຫາສູ່ເຊິ່ງກັນ ແລະກັນມາ

ເປັນເວລາດົນນານ, ແຕ່ເນື່ອງຈາກເສັ້ນທາງຄູກັ້ນນ້ຳດັ່ງກ່າວ ຍັງເປັນທາງດິນແດງທີ່ມີຄວາມກວ້າງ 7-8 ແມັດ ແລະມີລະດັບຕ່ຳພຽງກັບໜ້າດິນພໍເມື່ອເຖິງລະດູຝົນຈິ່ງເຮັດໃຫ້ນ້ຳໄຫຼ ຖ້ວມຄວບຄູ່ກັບທາງເສັ້ນນີ້ມີພາຫະນະແລ່ນຕະຫຼອດ ຈິ່ງເຮັດໃຫ້ເສັ້ນທາງດັ່ງກ່າວກາຍເປັນບວກຂຸມເວລາສັນຈອນ ກໍພົບຄວາມຫຍຸ້ງຍາກ, ສະນັ້ນກະຊວງກະສິກຳ ແລະປ່າໄມ້ ຈິ່ງໄດ້ມີແຜນຈະຍົກລະດັບ ແລະປັບປຸງຄູກັ້ນນ້ຳດັ່ງກ່າວໃຫ້ດີຂຶ້ນກວ່າເກົ່າ ທີ່ສາມາດກາຍເປັນເສັ້ນທາງສັນຈອນໄປ-ມາສະດວກ ແລະເປັນທາງທີ່ ອຳນວຍຄວາມສະດວກໃຫ້ກັບການຂົນສົ່ງ, ແລກປ່ຽນສິນຄ້າລະຫວ່າງປະຊາຊົນທັງສອງເມືອງໃຫ້ນັບມື້ດີຂຶ້ນ.

ທ່ານຍັງໃຫ້ຮູ້ອີກວ່າ: ໂຄງການດັ່ງກ່າວນີ້ແມ່ນມີຄວາມຍາວທັງໝົດ 32 ກິໂລແມັດ, ທີ່ແບ່ງອອກເປັນ 2 ຊ່ວງ  ໂດຍແມ່ນບໍລິສັດ ພົງຊັບທະວີ ກໍ່ສ້າງຂົວທາງ ແລະຊົນລະປະທານ ກັບບໍລິສັດ ສຸກປະເສີດກໍ່ສ້າງຂົວທາງ, ເຄຫາ ແລະຊົນລະປະທານເປັນຜູ້ຮັບເໝົາກໍ່ສ້າງ ຊຶ່ງໄດ້ເລີ່ມປະຕິບັດມາແຕ່ວັນທີ 4 ຕຸລາ 2016, ມີໄລຍະການກໍ່ສ້າງ 24 ເດືອນ ໃຫ້ສຳເລັດ ແລະເປັນທຶນກູ້ຢືມດອກເບ້ຍຕ່ຳຈາກ ທະນາຄານ ພັດທະນາອາຊີ (ADB) ໃນມູນ12 ລ້ານໂດລາ ຫຼື ປະມານ 96 ຕື້ກີບ, ສ່ວນຄວາມຄືບໜ້າຂອງໜ້າວຽກ ທັງໝົດໃນປະຈຸບັນໄດ້ເກືອບ 10%.

ສຳລັບແຜນການໃນຕໍ່ໜ້ານີ້ ພວກເຮົາກຳລັງເລັ່ງໃສ່ການປັບ ແລະຂະຫຍາຍໜ້າທາງ ຄູກັ້ນນ້ຳອອກຈາກຄວາມກວ້າງ 7-8 ແມັດ ມາເປັນ 10 ແມັດ, ອະນາໄມໜ້າທາງຄູກັ້ນນ້ຳ ແລະຄາດວ່າ ພາຍໃນເດືອນພະຈິກນີ້ແມ່ນຈະເລີ່ມຍົກລະດັບຊັ້ນທາງຂຶ້ນຕື່ມອີກຢ່າງໜ້ອຍ 50-80 ເຊັນຕື່ມ ເພື່ອໃຫ້ລະດັບໜ້າທາງຄູກັ້ນນ້ຳສູງຂຶ້ນກວ່າເກົ່າ.

ຂ່າວ: ເສດຖະກິດ-ສັງຄົມ