ສຳນັກຂ່າວຕ່າງປະເທດ ລາຍງານໃນວັນທີ 22 ພະຈິກຜ່ານມານີ້ວ່າ ທ່ານ ໂດນັນ ທຣັມ ວ່າທີ່ປະທານາທິບໍດີ ສະຫະລັດອາເມຣິກາ ຜູ້ຊະນະໃນການເລືອກຕັ້ງເມື່ອບໍ່ດົນມານີ້ ໄດ້ອອກມາປະກາດຜ່ານຄລິບວີດີໂອຕອນໜຶ່ງ ທີ່ບັນທຶກກ່ຽວກັບບັນດາວຽກງານ ຊຶ່ງທ່ານຈະປະຕິບັດໃນມື້ທຳອິດຂອງການເຮັດວຽກຢູ່ທຳນຽບຂາວ ໂດຍໃນນັ້ນ ທ່ານໄດ້ລະບຸວ່າ ຈະປະກາດໃຊ້ລັດຖະດຳລັດ ຖອນສະຫະລັດອາເມຣິກາ ອອກຈາກ ຂໍ້ຕົກລົງຫຸ້ນສ່ວນຍຸດທະສາດດ້ານເສດຖະກິດ ອາຊີ-ປາຊີຟິກ (Trans-Pacific Strategic Economic Partnership Agreement) ຫລື TPP ເນື່ອງຈາກໃນເວລາໂຄສະນາຫາສຽງເລືອກຕັ້ງ ທ່ານ ທຣັມ ໄດ້ລະບຸວ່າ TPP ແມ່ນຂໍ້ຕົກລົງບໍ່ມີຜົນປະໂຫຍດ ແລະ ຈະບັງຄັບປະເທດອາເມຣິກາ ດ້ວຍການນຳເອົາວຽກເຮັດງານທຳຂອງຊາວອາເມຣິກາ ໄປຍັງບັນດາປະເທດມີຄ່າແຮງງານຖືກກ່ວາ.
ໃນຄລິບວີດີໂອດັ່ງກ່າວ, ທ່ານ ທຣັມ ຍັງໄດ້ກ່າວອີກວ່າ ຈະສະເໜີຫລຸດຜ່ອນບັນດາຂໍ້ກຳນົດຂອງລັດຖະບານລົງ, ຊີ້ນຳກະຊວງແຮງງານ ສືບສວນບັນດາກໍລະນີສວຍໃຊ້ໂຄງການວິຊາ, ພ້ອມທັງຍົກເລີກຂໍ້ຈຳກັດຈຳນວນໜຶ່ງ ສຳລັບການຜະລິດພະລັງງານ, ໃນນັ້ນ ມີການຜະລິດນ້ຳມັນ, ອາຍແກັສ ແລະ ຖ່ານຫີນ ອີກດ້ວຍ.
ຕິດຕາມເຮົາທາງFacebook ກົດຖືກໃຈເລີຍ!