ຊາຍໜຸ່ມຝຣັ່ງສຸດເຮັງ ພົບເຫັນຄຳມູນຄ່າ 3.5 ລ້ານຢູໂຣ ໃນເຮືອນຫຼັງເກົ່າ

0
1769

ຊາຍໜຸ່ມຝຣັ່ງຄົນໜຶ່ງ ໄດ້ຮັບມໍລະດົກເປັນບ້ານ 1​ ຫຼັງຈາກພີ່ນ້ອງຂອງລາວ ທີ່ຫາກໍ່ເສຍຊີວິດໄປບໍ່ດົນມານີ້ ແຕ່ໂຊກດີກວ່າການໄດ້ເປັນເຈົ້າຂອງເຮືອນນັ້ນຄື ລາວໄດ້ພົບເຫັນຄຳຈຳນວນຫຼາຍ, ມີທັງຄຳເປັນຫຼຽນ ແລະຄຳເປັນແທ່ງ

ເຮືອນຫຼັງດັ່ງກ່າວ ຕັ້ງຢູ່ໃນແຄວ້ນນໍມັງດີ ປະເທດຝຣັ່ງ, ຊາຍຄົນດັ່ງກ່າວໃຫ້ສຳພາດກັບນັກຂ່າວ AFP ວ່າຊັບສົມບັດ ທີ່ລາວຄົ້ນພົບນັ້ນປະກອບດ້ວຍ ຫຼຽນຄຳ 5,000 ຫຼຽນ, ຄຳແທ່ງໜັກ 12 ກິໂລ ຈຳນວນ 2 ແທ່ງ ແລະຄຳແທ່ງນໍ້າໜັກ 1 ກິໂລ ອີກ 37 ແທ່ງ ລວມເປັນນໍ້າໜັກທັງໝົດ 100 ກິໂລ. ຄຳດັ່ງກ່າວນັ້ນ ຖືກເຊື່ອງໄວ້ຕາມເຟີນິເຈີຕ່າງໆ, ກ້ອງຜ້າເສື່ອ, ຫ້ອງນໍ້າ ເວົ້າໄດ້ວ່າ ຄຳໄດ້ກະແຈກກະຈາຍ ເຊື່ອງຢູ່ທຸກບ່ອນໃນບ້ານເລີຍ, ລວມມູນຄ່າຂອງຄຳ ທີ່ຖືກຄົ້ນພົບປະມານ 3.5 ລ້ານຢູໂຣ

ຄຳທັງໝົດ ຖືກຊື້ມາໃນຊ່ວງປີ 1950-1960 ເຊິ່ງຖືວ່າ ເປັນຄວາມໂຊກດີຂອງຊາຍໜຸ່ມຝຣັ່ງດັ່ງກ່າວ, ທີ່ໄດ້ພົບເຫັນໃນລະຫວ່າງມ້ຽນເຮືອນ, ນອກຈາກນັ້ນ ຍັງພົບເຫັນເອກະສານຢືນຢັນວ່າ ຄຳເຫຼົ່ານີ້ ເປັນຊັບສົມບັດຂອງພີນ້ອງຜູ້ທີ່ເສຍຊີວິດໄປແລ້ວນັ້ນ

ຂະນະນີ້ ຄຳດັ່ງກ່າວຖືກຂາຍໃຫ້ແກ່ຜູ້ຊື້ຕ່າງໆທັງໃນຝຣັ່ງ ແລະຕ່າງປະເທດ, ແຕ່ເບິ່ງແລ້ວ ຜູ້ທີ່ໂຊກດີແທ້ໆຂອງເລື່ອງນີ້ ໜ້າຈະແມ່ນລັດຖະບານຝຣັ່ງຫຼາຍກວ່າ ເພາະນອກຈາກຊາຍໜຸ່ມຄົນດັ່ງກ່າວ ຈະຕ້ອງຈ່າຍພາສີ ມູນມໍລະດົກມູນຄ່າເປັນ 45% ທີ່ລາວໄດ້ຮັບແລ້ວ, ລາວຍັງຕ້ອງໄດ້ຈ່າຍພາສີຄືນຫຼັງ 3 ປີ ໃຫ້ແກ່ລັດຖະບານອີກ, ເພາະວ່າພີ່ນ້ອງຜູ້ທີ່ເສຍຊີວິດໄປແລ້ວນັ້ນ ບໍ່ໄດ້ເຮັດພິໄນກຳໄວ້ວ່າ ຈະຍົກຄຳດັ່ງກ່າວນັ້ນໃຫ້ໃຜ