ໃນວັນທີ 21 ພະຈິກນີ້, ຄະນະຜູ້ແທນຂັ້ນສູງຂອງ ສະຫະພັນກາແດງ ແລະ ຊີກວົງເດືອນແດງສາກົນ ນຳໂດຍ ທ່ານ ຄາດາເຕຣູ ໂຄໂນ້ (Kadateru Konoe) ປະທານສະຫະພັນກາແດງ ແລະ ຊີກວົງເດືອນແດງສາກົນ (IFRC), ທັງເປັນປະທານອົງການກາແດງຍີ່ປຸ່ນ, ພ້ອມຄະນະ ໄດ້ເດີນທາງມາຢ້ຽມຢາມ ສປປ ລາວ ເປັນຄັ້ງທຳອິດ, ຊຶ່ງການຢ້ຽມຢາມຄັ້ງນີ້ ໄດ້ພົບປະກັບອົງການກາ ແດງລາວ, ໂດຍການຕ້ອນຮັບຂອງ ທ່ານ ຄຳຮຸ່ງ ເຮືອງວົງສີ ປະທານອົງການແດງລາວ, ຊຶ່ງທັງສອງຝ່າຍໄດ້ລາຍງານສະພາບການຈັດຕັ້ງປະຕິບັດ ໜ້າທີ່ວຽກງານມະນຸດສະທຳ, ພ້ອມທັງປຶກສາຫາລືບາງວຽກງານຄື: ວຽກງານຊ່ວຍເຫລືອບັນເທົາທຸກ, ລະບົບສາງ ແລະ ການຂົນສົ່ງ, ປະຖົມພະຍາບານ, ຊ່ວຍເຫລືອອຸປະຕິໄພຕ່າງໆ, ວຽກງານເລືອດ ແລະ ວຽກງານລະດົມຂົນຂວາຍແຫລ່ງທຶນ ເພື່ອໃຫ້ບໍລິການປະຊາຊົນບັນດາເຜົ່າ ໄດ້ທົ່ວເຖິງ ແລະ ສອດຄ່ອງກັບຈິດໃຈມະນຸດສະທຳຕາມ 7 ຫລັກການຂອງຂະບວນການກາແດງສາກົນ.
ປະທານສະຫະພັນກາແດງ ແລະ ຊີກວົງເດືອນແດງສາກົນ ຍັງຈະໄດ້ເຂົ້າຢ້ຽມຂ່ຳນັບ ການນຳຂັ້ນສູງຂອງປະເທດ ເພື່ອຫາລືເຖິງວຽກງານມະນຸດສະທຳ ແລະ ການຊ່ວຍເຫລືອສະໜັບສະໜູນຂອງຕົນຕໍ່ ສປປ ລາວ. ຫລັງຈາກນັ້ນ ກໍຈະໄດ້ສືບຕໍ່ຢ້ຽມຢາມອົງການກາແດງແຂວງຫລວງພະບາງ, ພ້ອມທັງສະໜັບສະໜູນ ແລະ ໃຫ້ການຊ່ວຍເຫລືອປະຊາຊົນຜູ້ດ້ອຍໂອກາດອື່ນໆອີກ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!