ອີງຕາມຂໍ້ມູນການລາຍງານ ຂອງລັດຖະບານໃນກອງປະຊຸມໃຫຍ່ສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ VIII ໃຫ້ຮູ້ວ່າ: ການຈັດຕັ້ງປະຕິບັດການລົງທຶນຂອງລັດໃນສົກປີ 2015-2016 ເສດຖະກິດເຂດພາກກາງ ຂອງລາວສາມາດຈັດຕັ້ງປະຕິບັດບັນດາໂຄງການລົງທຶນຂອງລັດ ແລະເອກະຊົນໄດ້ທັງໝົດ 1.113 ໂຄງການ ມູນຄ່າ 378.224 ລ້ານກີບ, ທຶນຕ່າງປະເທດ 55.267 ລ້ານກີບ, ໃນນັ້ນໄດ້ສຸມໃສ່ການພັດທະນາພື້ນຖານໂຄງລ່າງຖະໜົນ ຫົນທາງເປັນຕົ້ນ: ໂຄງການກໍ່ສ້າງເສັ້ນທາງເຕ 6 ສາມາດປະຕິບັດໄດ້ 35%, ໂຄງການກໍ່ສ້າງທາງປູຢາງ 2 ຊັ້ນແຕ່ແຍກທາງ 12 ລັງຄັງຫາດ່ານນາເພົ້າປະຕິບັດໄດ້ 47,95% ໂຄງການພັດທະນາສູນເສດຖະກິດການຄ້າຄົບວົງຈອນ ໜອງຈັນຕອນໃຕ້ສໍາເລັດກໍ່ສ້າງຮາກຖານເບື້ອງຕົ້ນ, ໂຄງການກໍ່ສ້າງສະຖານີລົດເມມາດຕະຖານສາກົນຂອງນະຄອນຫຼວງປະຕິບັດໄດ້ 13% ແລະໂຄງການກໍ່ສ້າງຕະຫຼາດສະບາຍດີສໍາເລັດພື້ນການກໍ່ສ້າງຮ່າງອາຄານ.
ຄຽງຄູ່ກັນນີ້ ກໍມີການຜະລິດພືດກະສີກໍາທີ່ເປັນສະບຽງອາຫານ ໂດຍສະເພາະແມ່ນການຜະລິດເຂົ້ານາແຊງ, ປູກພືດລະດູແລ້ງເດັ່ນກວ່າໝູ່ແມ່ນປູກພືດຜັກອິນຊີ ຢູ່ນະຄອນຫຼວງວຽງຈັນ ແລະແຂວງບໍລິຄໍາໄຊ ສາມາດເກັບກ່ຽວໄດ້ 36.278 ໂຕນ ໃນເນື້ອ ທີ່ 2.328 ເຮັກຕາ ຊຶ່ງມີການຈັດເປັນກຸ່ມປະຈຸບັນນະຄອນຫຼວງວຽງຈັນສາມາດຈັດຕັ້ງໄດ້ 17 ກຸ່ມສຸມໃສ່ໃນ 6 ຕົວເມືອງຄື: ເມືອງສີໂຄດຕະບອງ, ໄຊເຊດຖາ, ໄຊທານີ, ນາຊາຍທອງ, ຫາດຊາຍຟອງ ແລະເມືອງປາກງື່ມ ທີ່ໄດ້ມີການຈັດໃຫ້ມີຕະຫຼາດນັດຂາຍຜະລິດຕະພັນ ປອດສານພິດໃນສະຖານທີ່ແຕກຕ່າງທີ່ສໍາຄັນ, ນອກນັ້ນເມືອງໄຊທານີ ນະຄອນຫຼວງວຽງຈັນ ຍັງມີການສົ່ງເສີມໃຫ້ປະຊາຊົນປູກພືດຖົ່ວເຫຼືອງ ແລະຄາດຄະເນໃຫ້ໄດ້ 450 ເຮັກຕາ.
ພ້ອມດຽວກັນນັ້ນ ກໍຍັງສຶບຕໍ່ ສົ່ງເສີມການຜະລິດເປັນສິນຄ້າ ອຸດສາຫະກໍາ ໂດຍສະເພາະແມ່ນ ຢູ່ເຂດສະຫວັນນະເຂດ ສາມາດຜະລິດເຂົ້າຈ້າວຫອມສະຫວັນ ສົ່ງໄປຂາຍຢູ່ປະເທດຈີນໄດ້ຈໍານວນ 100 ໂຕນ ຊຶ່ງຄາດວ່າໝົດສົກປີ 2015-2016 ຈະສົ່ງອອກໃຫ້ໄດ້ 8.000 ໂຕນ ແລະປູກອ້ອຍ ເພື່ອຜະລິດນໍ້າຕານ ໄດ້ເຖິງ 485.000 ໂຕນ ໃນເນື້ອທີ່ 20.000 ເຮັກຕາ, ການປູກເຂົ້າອິນຊີ ຢູ່ນະຄອນຫຼວງວຽງຈັນ ໄດ້ຊຸກຍູ້ໃຫ້ປະຊາຊົນຜະລິດເປັນສິນຄ້າໂດຍສະເພາະແມ່ນເຂດເມືອງສັງທອງມີເນື້ອທີ່ເຖິງ 396,6 ເຮັກຕາ, ຜົນຜະລິດ 1.896 ໂຕນ, ການປູກສາລີແຂງເພື່ອຜະລິດເປັນອາຫານສັດຢູ່ແຂວງບໍລິຄໍາໄຊມີເນື້ອທີ່ປູກ 2.964 ເຮັກຕາ ຜົນຜະລິດໄດ້ 11.738 ໂຕນ, ຍັງມີການສົ່ງອອກແຮ່ທາດເຊັ່ນ: ເຫຼັກ, ກົ່ວ, ຫີນປູນ, ແລະອື່ນໆເດັ່ນກວ່າໝູ່ແມ່ນແຂວງຄໍາມ່ວນນອກນີ້ຍັງມີການລ້ຽງສັດແບບເປັນຟາມເຫັນວ່າທ່າອຽງເພີ່ມ ຂຶ້ນໂດຍສະເພາະການລ້ຽງປະເພດສັດປີກ, ປາ, ໝູ ແລະສັດໃຫຍ່ເພື່ອ ເປັນສິນຄ້າອຸປະໂພກບໍລິໂພກ.
ຂ່າວ: ເສດຖະກິດ-ສັງຄົມ