ສຳນັກຂ່າວຕ່າງປະເທດ ລາຍງານໃນວັນທີ 21 ພະຈິກນີ້ວ່າ ກອງປະຊຸມການຮ່ວມມືທາງເສດຖະກິດ ໃນພາກພື້ນອາຊີ-ປາຊີຟິກ ຫລື ເອເປັກ ຄັ້ງທີ 24 ຊຶ່ງໄຂຂຶ້ນທີ່ນະຄອນລິມາ ປະເທດເປຣູ ໄດ້ອັດລົງຢ່າງເປັນທາງການແລ້ວ ໂດຍໄດ້ມີການລົງນາມຂໍ້ຕົກລົງການຄ້າເສລີສະບັບໃໝ່ ເພື່ອຊຸກຍູ້ໃຫ້ 21 ປະເທດສະມາຊິກ ເຮັດວຽກຮ່ວມກັນຢ່າງຍືນຍົງ, ສະເໝີຕົ້ນສະເໝີປາຍ ແລະ ມີບາດກ້າວຂະຫຍາຍຕົວ.

ທັງນີ້ ພາຍໃນກອງປະຊຸມດັ່ງກ່າວ ໄດ້ມີການຕັ້ງຂໍ້ສັງເກດວ່າ ການຄ້າຈະບໍ່ຂະຫຍາຍຕົວເພີ່ມຂຶ້ນ ທ່າມກາງການຟື້ນຕົວທີ່ຍັງບໍ່ທັນຕໍ່ເນື່ອງ ນັບຕັ້ງແຕ່ວິກິດການທາງການເງິນ, ພ້ອມທັງໄດ້ກ່າວວ່າ ປະໂຫຍດທາງການຄ້າ ແລະ ການເປີດຕະຫລາດນັ້ນ ຈະຕ້ອງມີການສື່ສານກັບປະຊາຊົນໃນວົງກວ້າງ ເພື່ອໃຫ້ຂໍ້ຕົກລົງມີປະສິດທິພາບຫລາຍຂຶ້ນ ໂດຍເນັ້ນວິທີການກະຈາຍຂ່າວການຄ້າ, ສົ່ງເສີມການຈ້າງງານ ແລະ ມາດຕະຖານຄ່າຄອງຊີບທີ່ເພີ່ມຂຶ້ນອີກດ້ວຍ.

ຕິດຕາມເຮົາທາງFacebook ກົດຖືກໃຈເລີຍ!