ອຳນາດການປົກຄອງຂັ້ນຕ່າງໆຂອງເມືອງໄຊບູລີ ແຂງສະຫວັນນະເຂດ ສົມທົບ ກັບຫ້ອງການກະສິກຳ ແລະ ປ່າໄມ້ ເມືອງໄດ້ລົງຊຸກຍູ້ປຸກລະດົມ ໃຫ້ພໍ່ແມ່ປະຊາຊົນທ້ອງຖິ່ນຕ່າງໆພາຍໃນເມືອງ ທີ່ມີລະບົບຊົນລະປະທານຕາມສາຍເຊບັ້ງໄຟຕື່ນຕົວ ລົງມືສູ່ການຜະລິດນາແຊງແຕ່ຫົວທີ ພ້ອມວາງຕົວເລກແຜນການຜະລິດນາແຊງ ໃນປີ 2017 ນີ້ 8 ພັນກວ່າເຮັກຕາ.
ພາຍຫຼັງທີ່ສຳເລັດເສັດສິ້ນການເກັບກ່ຽວ ແລະ ມ້ຽນມັດເຂົ້ານາປີ; ທາງພາກສ່ວນກ່ຽວຂ້ອງກໍໄດ້ນຳພາປະຊາຊົນໄດ້ທຳການເຮັດອະນາໄມຄອງເໝືອງສາຍຕ່າງໆພ້ອມທັງທຳການສ້ອມແປງຈັກສູບນ້ຳ ແລະ ອຸປະກອນການຜະລິດທັງນີ້ກໍເພື່ອເປັນການກະກຽມສູ່ການຜະລິດເຂົ້ານາແຊງໂດຍສະເພາະແມ່ນການຕົກກ້ານາແຊງ.
ທ່ານ ອະນຸຊາ ປະທຸມມະແສງ ຮອງເຈົ້າເມືອງໄຊບູລີເປີດເຜີຍວ່າ: ໃນລະດູແລ້ງປີນີ້ ເມືອງໄຊບູລີ ມີແຜນຈະປູກເຂົ້ານາແຊງໃຫ້ໄດ້ໃນເນື້ອທີ່ 8.580 ເຮັກຕາ, ປະຈຸບັນ ພໍ່ແມ່ປະຊາຊົນເຂດໂຄງການຊົນລະປະທານເວີນ-ຕົ້ນແຫນ ໄດ້ສາມັກຄີກັນເຮັດອະນາໄມຄອງເໝືອງແມ່ ເພື່ອສ້າງເງື່ອນໄຂອຳນວຍຄວາມສະດວກ ເອົານ້ຳຈາກໂຄງການຊົນລະປະທານຈັກສູບນ້ຳຂຶ້ນ ຫົດເນື້ອທີ່ການຜະລິດຂອງປະຊາຊົນ ຊຶ່ງໃນປີນີ້ເຂດໂຄງການຊົນລະປະທານດັ່ງກ່າວ ມີແຜນຈະປູກເຂົ້ານາແຊງໃຫ້ໄດ້ຈຳນວນ 400 ເຮັກຕາ, ເມືອງໄຊບູລີກໍແມ່ນ ເມືອງໜຶ່ງທີ່ມີການຜະລິດກະສິກຳຢ່າງຫຼວງຫຼາຍ ແລະ ເປັນເມືອງໜຶ່ງທີ່ນອນໃນຈຸດສຸມການຜະລິດເຂົ້າເປັນສິນຄ້າໃນໂຄງການຄ້ຳປະກັນສະບຽງອາຫານແຫ່ງຊາດ.
ຂ່າວ: ເສດຖະກິດ-ສັງຄົມ