ອີງຕາມການລາຍງານຂ່າວຂອງສຳນັກຂ່າວຊີເອັນເອັນ ເມື່ອວັນທີ 20 ພະຈິກ ລາຍງານວ່າ ລົດໄຟດ່ວນ ຂະບວນສາຍປັນນາ-ອິນດໍ ເກີດເຫດຂັດຂ້ອງ ເຮັດໃຫ້ຕູ້ລົດໄຟ 14 ຕູ້ ຈາກທັງໝົດ 24 ຕູ້ຕົກລາງ ຢູ່ທີ່ບໍລິເວນໃກ້ກັບເມືອງຄານປູ ລັດອຸຕະຣະ ທາງພາກເໜືອຂອງປະເທດອິນເດຍ
ອຸປະຕິເຫດດັ່ງກ່າວ ເກີດຂຶ້ນເມື່ອເວລາປະມານ 03:00 ໂມງ ຂອງວັນທີ 20 ພະຈິກ ຕາມເວລາທ້ອງຖິ່ນ ເຊິ່ງທາງຜູ້ວ່າການລົດໄຟແຫ່ງຊາດ ແລະທາງເຈົ້າໜ້າທີ່ທ້ອງຖິ່ນ ໄດ້ຮີບເຂົ້າໄປຫາທີ່ເກີດເຫດ ແລະຈາກການເຂົ້າໄປກວດສອບເບື້ອງຕົ້ນພົບວ່າ ມີຜູ້ທີ່ບາດເຈັບສາຫັດຫຼາຍກວ່າ 40 ຄົນ, ຍັງມີຜູ້ໂດຍສານອີກຫຼາຍກວ່າ 70 ຄົນ ທີ່ຍັງຕິດຢູ່ ໃນຊາກຕູ້ລົດໄຟ ເຊິ່ງຍັງບໍ່ສາມາດຊ່ວຍເຫຼືອອອກມາໄດ້
ທາງເຈົ້າໜ້າທີ່ຕຳຫຼວດ ລັດອຸຕະຣະ ເວົ້າວ່າ ທາງເຈົ້າໜ້າທີ່ໄດ້ນຳເອົາສົບຜູ້ເສຍຊີວິດອອກມາໄດ້ແລ້ວ 30 ສົບ ແຕ່ຍັງຕິດຢູ່ໃນຕູ້ລົດໄຟອີກຫຼາຍ, ທ່ານ Narendra Modi ນາຍົກລັດຖະມົນຕີຂອງອິນເດຍ ໄດ້ອອກມາສະແດງຄວາມເສຍໃຈກັບອຸປະຕິເຫດ ແລະໄຫວ້ອາໄລແກ່ປະຊາຊົນຜູ້ເສຍຊີວິດຈາກອຸປະຕິເຫດໃນຄັ້ງນີ້
ຈາກອຸປະຕິເຫດໃນຄັ້ງນີ້ ຍັງບໍ່ທັນຮູ້ແຈ້ງວ່າເກີດຈາກສາເຫດຫຍັງ, ລົດໄຟແຕ່ລະສາຍຂອງອິນເດຍ ມີຜູ້ໂດຍສານໃຊ້ບໍລິການເປັນຈຳນວນຫຼາຍ ໂດຍລວມຮອດ 1 ແສນຄົນໃນແຕ່ລະມື້, ດ້ວຍການບໍລິຫານຈັດການທີ່ບໍ່ຄວບຄຸມ ແລະເບິ່ງແຍງບໍ່ດີພໍ ຈຶ່ງເຮັດໃຫ້ເກີດບັນຫາຕະຫຼອດ ແລະຍັງເກີດອຸປະຕິເຫດຕະຫຼອດຫຼາຍຄັ້ງໃນແຕ່ລະປີ