ໃນຄໍລຳ ສາລະໜ້າຮູ້ ມື້ນີ້ແອັດມິນຈະມານຳສະເໜີການລ້ຽງປາດຸກໃຫ້ມີສີຜິວເຫຼືອງ ແລະ ບໍ່ມີກິ່ນຄາວ ມາຝາກບັນດາແຟນເພສ ທີ່ມີຄວາມສົນໃຈໃນເລື່ອງຂອງການກະສິກຳ ການລ້ຽງປາ ເພື່ອເປັນອາຫານ ແລະ ກ້າວໄປສູ່ການສ້າງອາຊີບ ສ້າງລາຍຮັບເພີ່ມໃນຄອບຄົວ ເຊິ່ງວິທີການລ້ຽງປາດຸກໃຫ້ມີສີເຫຼືອງ ແລະ ເພີ່ມຂະໜາດໂຕໃຫ້ໃຫຍ່ຊີ້ນແໜ້ນ ເວລາກິນບໍ່ມີກິ່ນຄາວມີເຕັກນິກງ່າຍໆດັ່ງຕໍ່ໄປນີ້

1.ເຕັກນິກການເພີ່ມສີ ແລະ ຂະໜາດຂອງປາດຸກ 
ເມື່ອລ້ຽງປາດຸກຮອດ 60 ມື້ຂຶ້ນໄປ ໃຫ້ນຳມັນໝູຈຳນວນ 20 ກິໂລ ມາຕົ້ມຈົນສຸກ ຈາກນັ້ນກໍ່ເທນ້ຳຕົ້ມຖຶ້ມຈົ່ງໄວ້ແຕ່ມັນໝູຢູ່ໃນໝໍ້ ແລ້ວປະໄວ້ໃຫ້ແຫ້ງ (ມັນໝູ 20 ກິໂລກຣາມ ຕໍ່ປາດຸກຈຳນວນ 200 ໂຕ) ຈາກນັ້ນກໍ່ນຳມັນໝູທີ່ໄດ້ໄປໃຫ້ປາດຸກກິນ ມື້ລະ 1 ເທື່ອ ວິທີນີ້ຈະຊ່ວຍເພີ່ມຂະໜາດຂອງປາດຸກ ແລະ ສີຂອງປາດຸກ.

2.ການເຮັດໃຫ້ປາດຸກລ້ຽງໃນຫຼຸມດິນມີສີເຫຼືອງງາມຄືປາດຸກນາ 
ກ່ອນຈະຈັບປາຂາຍປະມານ 1 ເດືອນ ໃຫ້ນຳກ້ວຍນ້ຳສຸກມາບົດປະສົມກັບຮຳ ໃນອັດຕາສ່ວນຮຳ 6 ກິໂລກຣາມ ຕໍ່ກ້ວຍສຸກ 1 ຫວີ ປະສົມໃຫ້ເຂົ້າກັນ ຈາກນັ້ນກໍ່ນຳໄປຕາກແດດໃຫ້ແຫ້ງ ແລ້ວນຳໄປຫວ່ານໃຫ້ປາດຸກກິນທຸກມື້ ມື້ລະ 2 ເທື່ອ ເຊົ້າ-ແລງ ຕໍ່ເນື່ອງກັນເປັນເວລາຢ່າງໜ້ອຍ 1 ເດືອນກ່ອນຈັບປາຂາຍ ພຽງເທົ່ານີ້ກໍ່ຈະເຮັດໃຫ້ປາດຸກທີ່ລ້ຽງມີສີເຫຼືອງໜ້າກິນ ແລະ ມີກິ່ນຄາວໜ້ອຍລົງອີກດ້ວຍ

3.ການລ້ຽງເພີ່ມຄວາມຫວານໃຫ້ຊີ້ນປາ
ນຳເອົາກ້ວຍສຸກເຊັ່ນ: ກ້ວຍນ້ຳ, ກ້ວຍໄຂ່ ແລະ ກ້ວຍຫອມ ໃຫ້ປາກິນ ຖ້າປາຍັງນ້ອຍໃຫ້ປາກິນອາຫານປາສະລັບກັບກ້ວຍສຸກ ອາດຈະໃຫ້ປາກິນກ້ວຍເປັນອາຫານຕອນແລງສະລັບກັບການໃຫ້ອາຫານປາໃນຕອນເຊົ້າ ຫຼື ຈະໃຫ້ກ້ວຍເປັນອາຫານປາຢ່າງດຽວກໍ່ໄດ້ ໂດຍໃຫ້ປາກິນພໍອີ່ມ ວິທີນີ້ສາມາດໃຊ້ໄດ້ກັບປາທຸກຊະນິດ ຈະເຮັດໃຫ້ປາໃຫຍ່ໄວ, ມີຊີ້ນແໜ້ນ, ຊີ້ນຫວານ ໄດ້ຂະໜາດຕາມຄວາມຕ້ອງການຂອງຕະຫຼາດ

4.ເຕັກນິກການລ້ຽງປາດຸກໃຫ້ຕົວໃຫຍ່ຍາວໄດ້ນ້ຳໜັກ
ວິທີການລ້ຽງປາດຸກໃຫ້ໂຕໃຫຍ່, ໂຕຍາວ, ຫຼັງຈາກປ່ອຍລູກປາລົງຫຼຸມແລ້ວ ໃຫ້ອົດອາຫານ 4 ມື້ ເພື່ອເປັນການປັບສະພາບຂອງລູກປາໃຫ້ເຂົ້າກັບນ້ຳໃນຫຼຸມ ຈາກນັ້ນວັນທີ 5 ກໍ່ເລີ່ມໃຫ້ອາຫານ ໂດຍການໃຫ້ອາຫານລູກປາດຸກໃນປະລິມານໜ້ອຍ ແຕ່ໃຫ້ຫຼາຍຄັ້ງຕໍ່ມື້ ລູກປາຈະຄ່ອຍໆໃຫຍ່ ຫຼັງຈາກນັ້ນເມື່ອປາໄດ້ອາຍຸປະມານ 2 ເດືອນ ໃຫ້ຢຸດໃຫ້ອາຫານ 7 ມື້ ວິທີນີ້ຈະເຮັດໃຫ້ປາດຸກຈ່ອຍ ແລະ ໂຕຢືດອອກ ຈິ່ງຄ່ອຍໃຫ້ອາຫານຕໍ່ ຜົນທີ່ໄດ້ຮັບຄືປາດຸກຈະໂຕໃຫຍ່ ແລະ ຍາວ ເຊິ່ງເມື່ອເຫັນຂະໜາດທີ່ເໝາະສົມເຊັ່ນ 2 ຫຼື 3 ໂຕຕໍ່ກິໂລກຣາມກໍ່ສາມາດຈຳໜ່າຍໄດ້

5.ການນຳເຟືອງເຂົ້າໃສ່ໃນອ່າງປາເພື່ອເພີ່ມສີປາ ແລະ ກຳຈັດກິ່ນ
ເມື່ອເອົາເຟືອງເຂົ້າໃສ່ລົງໄປໃນອ່າງປາດຸກປາກໍ່ຈະເຂົ້າໄປໃນເຟືອງເຮັດໃຫ້ໂຕປາສຽດສີກັບເຟືອງເຂົ້າ ແລະ ຈະເຮັດໃຫ້ເມືອກທີ່ຕິດຢູ່ກັບໂຕປາໝົດໄປ ແລະ ຍັງເຮັດໃຫ້ປາທີ່ມີສີດຳ ກາຍເປັນສີເຫຼືອງນຳອີກ ນອກຈາກນີ້ການໃສ່ຟາງເຂົ້າລົງໄປກ່ອນຈັບປາດຸກນັ້ນຍັງເປັນການຊ່ວຍຫຼຸດກິ່ນສາບຂອງປາໄດ້ອີກດ້ວຍ

6.ເຕັກນິກການກຽມຈັບປາດຸກຂາຍໃຫ້ໄດ້ລາຄາ ແລະ ກຳຈັດກິ່ນຄາວປາ
ງົດໃຫ້ອາຫານ 3 ມື້ກ່ອນເຮັດການຈັບປາ ຈາກນັ້ນກໍ່ຫຼຸດນ້ຳໃນຫຼຸມ ຫຼື ອ່າງປາໃຫ້ເຫຼືອໃນປະລິມານ 80-90% ກ່ອນຈັບປາຂາຍ 1 ມື້ ໃຫ້ໃຊ້ເກືອຫວ່ານລົງໄປໃນຫຼຸມປາ ໃນຂະໜາດຫຼຸມປາກ້ວາງ 1 ໄຮ່ ໃຊ້ເກືອນ 30 ກິໂລກຣາມ

ຂອບໃຈຂໍ້ມູນຈາກ ທີມງານຮັກບ້ານເກີດ

ເຄດິດຈາກ: ສູນລວມຄວາມຮູ້ການກະເສດ
ຕິດຕາມນານາສາລະ ກົດໄລຄ໌ເລີຍ!