ສຳນັກຂ່າວຕ່າງປະເທດ ລາຍງານໃນວັນທີ 18 ພະຈິກນີ້ວ່າ ກອງທັບຣັດເຊຍ ໄດ້ສ້າງປະຫວັດສາດໜ້າໃໝ່ ສົ່ງເຮືອບິນຖິ້ມລະເບີດຍຸດທະສາດ Tu-95 ໃນຍຸກອະດີດສະຫະພາບໂຊວຽດ ບິນຈາກພາກເໜືອຂອງປະເທດ ຂ້າມທະເລເໜືອ ອ້ອມທະວີບເອີຣົບ ອັນເປັນຮັງໃຫຍ່ຂອງກຸ່ມນາໂຕ້ ແລ້ວເຂົ້າສູ່ທະເລເມດິແຕຣານຽນ ກ່ອນຈະເຂົ້າປະຕິບັດການ ຍິງລູກສອນໄຟ X-101 ໃສ່ຖານທີ່ໝັ້ນຂອງກຸ່ມລັດອິດສະລາມ ຫລື ໄອເອັສ ຢູ່ປະເທດຊີຣີ ຊຶ່ງນັບເປັນການໂຈມຕີດ້ວຍເຮືອບິນ Tu-95 ດ້ວຍໄລຍະທາງໄກທີ່ສຸດ ເປັນຄັ້ງປະຫວັດສາດ.
ກະຊວງປ້ອງກັນປະເທດຣັດເຊຍ ໄດ້ເຜີຍແຜ່ຄລິບວີດີໂອ ໃນວັນພະຫັດທີ 17 ພະຈິກ 2016 ຜ່ານມານີ້ ຊຶ່ງສະແດງໃຫ້ເຫັນພາບການຕື່ມນ້ຳມັນກາງອາກາດ ໃຫ້ແກ່ເຮືອບິນ Tu-95 ໂດຍມີເຮືອບິນສູ້ຮົບ Su-30SM ຈຳນວນ 2 ລຳ ເຮັດໜ້າທີ່ບິນຄຸ້ມກັນ ຕາມແບບແຜນການສູ້ຮົບ ແລະ ໂຈມຕີທາງອາກາດດັ້ງເດີມ ທີ່ເຄີຍປະຕິບັດມາຕັ້ງແຕ່ສົງຄາມໂລກຄັ້ງທີ 2, ຈາກນັ້ນ ຍັງສະແດງໃຫ້ເຫັນ ພາບການປ່ອຍອາວຸດນຳວິຖີຈາກເຮືອບິນ Tu-95 ໄປທຳລາຍເປົ້າໝາຍໃນປະເທດຊີຣີ ຂະນະທີ່ເຮືອບິນລຳດັ່ງກ່າວ ຍັງບິນຢູ່ເໜືອນ່ານຟ້າທະເລເມດິແຕຣານຽນ.
ຖ້ອຍຖະແຫລງຂອງ ກະຊວງປ້ອງກັນປະເທດຣັດເຊຍ ຜ່ານທາງເວັບໄຊ ໄດ້ລະບຸວ່າ ” ເຮືອບິນໄດ້ບິນຂຶ້ນຈາກສະໜາມບິນແຫ່ງໜຶ່ງ ໃນດິນແດນສະຫະພັນຣັດເຊຍ ແລະ ຕື່ມນ້ຳມັນກາງອາກາດ 2 ຄັ້ງ ເພື່ອບິນດ້ວຍໄລຍະທາງກວ່າ 11,000 ກິໂລແມັດ ໂດຍໃຊ້ເສັ້ນທາງບິນຂ້າມຜືນນ້ຳທະເລເໜືອ ແລະ ມະຫາສະໝຸດແອັດແລນຕິກຕາເວັນອອກ, ຫລັງຈາກປ່ອຍອາວຸດໂຈມຕີແລ້ວ ເຮືອບິນໄດ້ບິນກັບຄືນໄປຍັງຖານທັບທີ່ຕັງເດີມ ”
ທັງນີ້ ເຮືອບິນຍຸດທະສາດ Tu-95 ຂຶ້ນບິນເປັນຄັ້ງທຳອິດໃນປີ 1953 ແລະ ຖືກບັນຈຸເຂົ້າປະຈຳການ ໃນກອງທັບອາກາດສະຫະພາບໂຊວຽດ ໃນປີ 1956 ເປັນເຮືອບິນໃຊ້ເຄື່ອງຈັກໃບພັດ 4 ໜ່ວຍ ບິນດ້ວຍຄວາມໄວສູງສຸດໄດ້ 920 ກິໂລແມັດຕໍ່ຊົ່ວໂມງ ຊຶ່ງໄດ້ຊື່ວ່າເປັນເຮືອບິນໃບພັດໄວ ທີ່ບິນໄດ້ໄວທີ່ສຸດໃນໂລກ ຕັ້ງແຕ່ເຄີຍມີການສ້າງເຮືອບິນຂຶ້ນມາ, ປັດຈຸບັນນີ້ ເຮືອບິນ Tu-95 ຂອງຣັດເຊຍ ຖືເປັນເຮືອບິນຖິ້ມລະເບີດ ທີ່ໃຫຍ່ທີ່ສຸດໃນໂລກລຸ້ນໜຶ່ງ ຊຶ່ງໃຫຍ່ກວ່າເຮືອບິນຖິ້ມລະເບີດຍຸດທະສາດ B-52 ຂອງສະຫະລັດອາເມຣິກາ.
ໃນລະຫວ່າງຊຸມປີ 1950 ເຖິງຊຸມປີ 1970 ຜູ້ຜະລິດເຮືອບິນລຸ້ນດັ່ງກ່າວນີ້ ໄດ້ມີການສ້າງ Tu-95 ອອກມາທັງໝົດ 500 ລຳ ຊຶ່ງກະຈາຍຢູ່ໃນກອງກຳລັງຮົບທີ່ສຳຄັນ ຕາມບັນດາສາທາລະນະລັດ ທີ່ຂຶ້ນກັບສະຫະພາບໂຊວຽດ, ປັດຈຸບັນ ກອງທັບອາກາດຣັດເຊຍ ມີເຮືອບິນລຸ້ນດັ່ງກ່າວນີ້ ປະມານ 55 ລຳ.
