ພາຍຫລັງມີສະມາຊິກສະພາແຫ່ງຊາດຫລາຍທ່ານໃຫ້ຄວາມສົນໃຈຕໍ່ໂຄງການກໍ່ສ້າງເສັ້ນ ທາງປູຢາງແຕ່ສົ້ນຂົວນ້ຳຂອງຫາວັງເຕົ່າ ເມືອງ ແລະ ແຂວງຈຳປາສັກ ວ່າມີມູນຄ່າການກໍ່ສ້າງສູງ ແລະ ມີການເກັບເງິນຄ່າຜ່ານທາງດັ່ງກ່າວນຳດ້ວຍ ແລະ ຕໍ່ບັນຫານີ້, ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ຊີ້ແຈງວ່າ: ໂຄງການກໍ່ສ້າງເສັ້ນທາງດັ່ງກ່າວມີໄລຍະທາງຍາວ 42 ກິໂລແມັດ ໂດຍມີການຂະຫຍາຍໜ້າທາງຈາກ 2 ຊ່ອງມາເປັນ 4 ຊ່ອງຈະລາຈອນ, ກວ້າງປະມານ 16 ແມັດ, ປູດ້ວຍຢາງຂົ້ວໜາ 5 ຊັງຕີແມັດ, ມີມູນຄ່າກໍ່ສ້າງທັງໝົດ 30,83 ລ້ານໂດລາສະຫະລັດ, ໂດຍແມ່ນ ບໍລິສັດດວງດີກໍ່ສ້າງຂົວທາງ ເປັນຜູ້ລົງທຶນດ້ວຍຮູບແບບ BOT ເຊິ່ງມີໄລຍະສຳປະທານ 45 ປີ ແລະ ໄດ້ລົງມືກໍ່ສ້າງມາແຕ່ປີ 2010 ແລະ ມາຮອດກາງປີ 2016 ໂຄງການມີຄວາມຄືບໜ້າຫລາຍກວ່າ 97%.

ບໍລິສັດສຳປະທານຈຶ່ງໄດ້ສະເໜີລັດຖະບານເພື່ອທົດລອງເປີດການນຳໃຊ້ ແລະ ເກັບຄ່າຜ່ານທາງດັ່ງກ່າວ, ສ່ວນອັດຕາຄ່າຜ່ານທາງແມ່ນປະຕິບັດຕາມແຈ້ງການຂອງລັດຖະບານກຳນົດ.

ຂ່າວ: ລາວພັດທະນາ