ໃນວັນທີ 16 ພະຈິກຜ່ານມານີ້ ບັນດາສະມາຊິກສະພາແຫ່ງຊາດ ໄດ້ສຸມໃສ່ປະກອບ ຄໍາຄິດ,ຄໍາເຫັນໃສ່ຮ່າງປະມວນ ກົດໝາຍອາຍາ ເຊິ່ງສະເໜີໂດຍ ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທໍາ. ຮ່າງກົດໝາຍດັ່ງກ່າວ ປະກອບມີ: 2 ພາກໃຫຍ່ ແລະ 1 ພາກນ້ອຍ, 23 ໝວດ ແລະ 420 ມາດຕາ. ພາກທົ່ວໄປປະກອບມີ 11 ໝວດ, 109 ມາດຕາ; ພາກສະເພາະມີ 12 ໝວດ 309 ມາດຕາ ແລະ ພາກບົດບັນຍັດສຸດທ້າຍມີ 2 ມາດຕາ.

ທ່ານລັດຖະມົນຕີກະຊວງຍຸຕິທໍາ ໄດ້ຍົກໃຫ້ເຫັນເຫດຜົນ ແລະ ຄວາມຈໍາເປັນໃນການສ້າງຮ່າງກົດໝາຍ ສະບັບນີ້ວ່າ:ຜ່ານການຈັດຕັ້ງປະຕິບັດນັບແຕ່ສະພາແຫ່ງຊາດໄດ້ຮັບຮອງ ເອົາໃນປີ 1989 ແລະ ໄດ້ມີການປັບປຸງໃນປີ 2005 ຍັງມີບາງບັນຫາ, ບາງບົດບັນຍັດຂອງກົດໝາຍອາຍາ ທີ່ກໍານົດບໍ່ທັນລະອຽດ, ຄົບຖ້ວນ ບວກກັບສະພາບທາງດ້ານເສດຖະກິດ ແລະ ສັງຄົມຂອງປະເທດເຮົາ ໄດ້ນັບມື້ໄດ້ຂະຫຍາຍຕົວ, ພ້ອມນັ້ນ ສປປ ລາວ ກໍໄດ້ເຂົ້າເປັນພາຄີສົນທິສັນຍາ ສາກົນຈໍານວນໜຶ່ງ ທີ່ພົວພັນກັບກົດໝາຍອາຍາເປັນຕົ້ນ ສົນທິສັນຍາ ກ່ຽວກັບສິດທິມະນຸດ, ສົນທິສັນຍາກ່ຽວກັບ ການຕ້ານການສໍ້ລາດ ບັງຫລວງ,ກ່ຽວກັບການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ສົນທິສັນຍາ ກ່ຽວກັບການຕ້ານການຄ້າມະນຸດ.

ການປະກອບຄໍາເຫັນໃສ່ຮ່າງກົດໝາຍສະບັບນີ້, ບັນດາ ສສຊ ໄດ້ຄົ້ນຄ້ວາ ແລະ ລົງເລິກໃນຫລາຍໝວດ ຫລາຍ ມາດຕາທີ່ເຫັນວ່າຍັງບໍ່ທັນສອດຄ່ອງ, ຊັນເຈນ ແລະຈະແຈ້ງ ທັງນີ້ເພື່ອໃຫ້ມີຄວາມຖືກຕ້ອງສອດຄ່ອງ ແລະ ແທດ ເໝາະກັບສະພາບພັດທະນາທາງດ້ານເສດຖະກິດ ແລະ ສັງຄົມຂອງປະເທດເຮົາ, ສອດຄ່ອງກັບແນວທາງນະໂຍ ບາຍ ຂອງພັກ-ລັດ ແລະ ສອດຄ່ອງກັບສົນທິສັນຍາສາກົນທີ່ ສປປ ລາວ ເປັນພາຄີ.

ຂ່າວ: ສຳນັກຂ່າວສານປະເທດລາວ