ສຳນັກຂ່າວຕ່າງປະເທດ ລາຍງານໃນວັນທີ 16 ພະຈິກຜ່ານມານີ້ວ່າ ທ່ານ ຢາຕອນເລາະ ອາລີ ຄາເມເນອີ ຜູ້ນຳສູງສຸດຂອງອີຣ່ານ ໄດ້ກ່າວປາໄສຕໍ່ສາທາລະນະ ຢູ່ນະຄອນຫລວງເຕເຮຣານ ໂດຍທ່ານໄດ້ລະບຸວ່າ ຜົນຂອງການເລືອກຕັ້ງປະທານາທິບໍດີ ສະຫະລັດອາເມຣິກາ ທີ່ອອກມານັ້ນ ບໍ່ໄດ້ສ້າງຄວາມແຕກຕ່າງຫຍັງເລີຍຕໍ່ກັບອີຣ່ານ, ທ່ານ ເວົ້າວ່າ ” ເຮົາບໍ່ໄດ້ຕັດສິນຈາກເສິກເລືອກຕັ້ງຄັ້ງນີ້ ເພາະແນວໃດ ອາເມຣິກາກໍຍັງເປັນອາເມຣິກາຄືເກົ່າ, ໃນໄລຍະ 37 ປີຜ່ານມາ ບໍ່ວ່າພັກໃດຢູ່ໃນຕຳແໜ່ງໃດ ກໍບໍ່ເຄີຍເຮັດດີຕໍ່ກັບເຮົາ ແລະ ຜີສາດຮ້າຍຂອງພວກເຂົາ ກໍຍັງບຸກໜ້າມາທີ່ເຮົາຢູ່ສະເໝີ ” ພ້ອມກັນນັ້ນ ທ່ານ ຄາເມເນອີ ໄດ້ຍົກຕົວຢ່າງເຫດການທີ່ ກໍລະນີກຳປັ່ນສູ້ຮົບຂອງອາເມຣິກາ ຍິງເຮືອບິນໂດຍສານຂອງອີຣ່ານຕົກ ໃນປີ 1988 ເຮັດໃຫ້ມີຜູ້ເສຍຊີວິດທັງໝົດ 290 ຄົນ.
ທ່ານ ຄາເມເນອີ ຍັງໄດ້ເວົ້າຕື່ມອີກວ່າ ” ເຮົາບໍ່ໄດ້ໂສກເສົ້າ ຫລື ສະເຫລີມສະຫລອງ ເພາະສຳລັບເຮົາແລ້ວ ມັນກໍບໍ່ໄດ້ຕ່າງກັນ ” ທັງນີ້ ທັງສອງປະເທດ ໄດ້ຕັດຄວາມສຳພັນທາງການທູດຢ່າງເປັນທາງການ ນັບຕັ້ງແຕ່ປີ 1980 ເປັນຕົ້ນມາ ຫລັງຈາກເຫດການທີ່ ນັກສຶກສາຫົວຮຸນແຮງ ບຸກເຂົ້າໄປໃນສະຖານທູດສະຫະລັດອາເມຣິກາ ປະຈຳນະຄອນຫລວງເຕເຮຣານ ແລ້ວຈັບກຸມເຈົ້າໜ້າທີ່ເປັນຕົວປະກັນ ຍາວນານກວ່າ 444 ມື້.
ຕິດຕາມເຮົາທາງFacebook ກົດຖືກໃຈເລີຍ!