ການເກັບລາຍຮັບເຂົ້າງົບປະມານ ຂອງແຂວງວຽງຈັນ ໃນສົກ 2015-2016 ນີ້ ປະຕິບັດໄດ້ເກືອບ 200 ຕື້ກີບ ຊຶ່ງລື່ນແຜນການທີ່ວາງເອົາໄວ້ຢ່າງວຸດວິດ, ແຫຼ່ງລາຍຮັບສ່ວນໃຫຍ່ແມ່ນອາກອນປົກກະຕິກວມເອົາເຖິງ 160 ຕື້ກວ່າກີບ.
ທ່ານ ຂັນທອງ ພະລະຄອນ ຫົວໜ້າພະແນກສ່ວຍສາອາກອນ ແຂວງວຽງຈັນ ກ່າວຕໍ່ຜູ້ສື່ຂ່າວໃນວັນທີ 15 ພະຈິກນີ້ວ່າ: ການເກັບລາຍຮັບເຂົ້າງົບປະມານ ໃນສົກ 2015-2016 ນີ້ ແຂວງວຽງຈັນ ໄດ້ຂຸ້ນຂ້ຽວຈັດຕັ້ງປະຕິບັດແຕ່ຫົວທີດ້ວຍຄວາມຮັບຜິດຊອບສູງ ຊຶ່ງຕາມການສະຫຼຸບໝົດສົກດັ່ງກ່າວຜົນອອກມາແມ່ນເປັນທີ່ໜ້າພໍໃຈຢູ່ ເພາະສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 198 ຕື້ກວ່າກີບ, ຊຶ່ງຕົວເລກແຜນການຈັດເກັບທີ່ວາງເອົາໄວ້ແມ່ນ 184 ຕື້ກີບຖືວ່າສາມາດຈັດເກັບລາຍຮັບເຂົ້າງົບປະມານ ໄດ້ກາຍແຜນຢ່າງວຸດວິດ, ລາຍຮັບດັ່ງກ່າວແມ່ນໄດ້ຈາກອາກອນປົກກະຕິ 164 ຕື້ກວ່າກີບ, ລາຍຮັບວິຊາການ 21 ຕື້ກວ່າກີບ, ລາຍຮັບຈາກທີ່ດິນ 11 ຕື້ກວ່າກີບ ແລະຄ່າທຳນຽມ 2 ຕື້ກວ່າກີບ.
ທ່ານຫົວໜ້າພະແນກສ່ວຍສາອາກອນ ແຂວງວຽງຈັນ ຍັງຊີ້ໃຫ້ເຫັນຖານລາຍຮັບທີ່ເກັບໄດ້ 198 ຕື້ກວ່າກີບນັ້ນ ແມ່ນນອນຢູ່ໃນຂັ້ນແຂວງເປັນຜູ້ຈັດເກັບ 164 ຕື້ກວ່າກີບ, ສ່ວນທີ່ເຫຼືອແມ່ນ 11 ເມືອງ ທົ່ວແຂວງເປັນຜູ້ຈັດເກັບໃນນີ້ເມືອງທີ່ເກັບໄດ້ຫຼາຍແມ່ນວັງວຽງ 7 ຕື້ກວ່າກີບ, ໂພນໂຮງ 5 ຕື້ກວ່າກີບ, ຊະນະຄາມເກືອບ 5 ຕື້ກວ່າກີບ, ທຸລະຄົມ 4 ຕື້ກວ່າ ກີບ, ເມືອງເຟືອງ 2 ຕື້ກວ່າ, ຫີນເຫີບ 2 ຕື້ກວ່າກີບ ແລະເມື່ອງອື່ນໆຕາມລຳດັບ.
ຂ່າວ: ເສດຖະກິດ-ສັງຄົມ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!
ifram FBPictpost ຮູບພາບລາວໂພສຕ໌