ວັນທີ 15 ພະຈິກ 2016ຜ່ານມານີ້, ທ່ານນາງ ປານີ ຢາທໍ່ຕູ້ ປະທານສະພາ ແຫ່ງຊາດລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ເລໂອ ຟາເບີ (Leo faber) ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສະຫະພາບເອີຣົບ ປະຈໍາລາວ.
ໂອກາດດັ່ງກ່າວ, ທ່ານນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ຂອງທ່ານ ເລໂອ ຟາເບີ ເຊິ່ງເປັນການປະກອບສ່ວນເສີມຂະຫຍາຍການພົວພັນຮ່ວມມື ລະຫວ່າງ ລາວ-ອີຢູ ໃຫ້ໄດ້ຮັບການພັດທະນາ ແລະ ກ້ວາງຂວາງ ຂຶ້ນກວ່າເກົ່າ.
ທ່ານ ເລໂອ ຟາເບີ ກໍໄດ້ສະແດງຄວາມຂອບໃຈຕໍ່ທ່ານນາງ ປານີ ຢາທໍ່ຕູ້ ທີ່ໄດ້ສະຫລະເວລາອັນມີຄ່າຂອງຕົນ ມາຕ້ອນຮັບໃນຄັ້ງນີ້ ພ້ອມທັງແຈ້ງເຈດຈຳນົງ ຂອງການເດີນທາງມາຢ້ຽມຢາມ ຄັ້ງນີ້ ໃຫ້ທ່ານນາງ ປານີ ຢາທໍ່ຕູ້ ຊາບ.
ຂ່າວ: ສຳນັກຂ່າວສານປະເທດລາວ