ເພື່ອເປັນການຊ່ວຍເຫຼືອໃຫ້ກັບຜູ້ທີ່ຖືກເຄາະຮ້າຍຈາກໄພພິບັດທາງທຳມະຊາດ (ນ້ຳຖ້ວມ) ໃນໄລຍະຜ່ານມາໃນວັນທີ 11 ພະຈິກ ຜ່ານມາທີ່ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ມີພິທີມອບ-ຮັບເງິນຊ່ວຍເຫຼືອ ຈຳນວນ 50 ລ້ານກີບ ຕາງໜ້າ ມອບໂດຍ ທ່ານ ນາງ ສຸກນາລີ ເທບສີເມືອງ ປະທານບໍລິສັດ ພີເອັສ ສົ່ງເສີມກະສິກຳ-ອຸດສາຫະກຳຄົບວົງຈອນ ຈຳກັດ ແລະ ຮັບໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ ພ້ອມ ຄະນະທັງ 2 ຝ່າຍເຂົ້າຮ່ວມ.
ທ່ານ ຄຳແພງ ໄຊສົມແພງ ກ່າວວ່າ: ກະຊວງແຮງງານ ແລະ ສະຫວັດດີການສັງຄົມ ແມ່ນອົງການໜຶ່ງທີ່ເຮັດວຽກຊ່ວຍເຫຼືອຜູ້ປະສົບໄພຕ່າງໆ ເປັນຫຼັກໂດຍການເກັບທ້ອນໂຮມເງິນ ແລະ ສິ່ງບໍລິຈາກຕ່າງໆເພື່ອນຳໄປແຈກຢາຍໃຫ້ປະຊາຊົນຜູ້ທຸກຍາກ ແລະ ທີ່ໄດ້ຮັບຜົນກະທົບຈາກໄພພິບັດທາງທຳມະຊາດຢູ່ຕາມທ້ອງຖິ່ນຕ່າງໆເຖິງຢ່າງໃດກໍຕາມກະຊວງແຮງງານ ແລະ ສະຫວັດດີການສັງຄົມ ກໍຍັງຕ້ອງການເງິນຊ່ວຍເຫຼືອຕື່ມອີກ ຈຳນວນຫຼາຍເພື່ອນຳໄປຊ່ວຍເຫຼືອປະຊາຊົນຜູ້ທຸກຍາກ ແລະ ໄດ້ຮັບຜົນກະທົບຈາກໄພພິບັດທາງທຳມະຊາດ (ນ້ຳຖ້ວມ- ໄພໜາວ) ແລະ ເກັບໄວ້ເປັນຄັງແຮ ເວລາສຸກເສີນ ເພື່ອຊ່ວຍເຫຼືອປະຊາຊົນໃນຄັ້ງຕໍ່ໄປໃຫ້ທັນການ.
ພ້ອມກັນນີ້ ທ່ານ ຄຳແພງ ໄຊສົມແພງ ກໍຍັງໄດ້ກ່າວເພື່ອເປັນການເຊີນຊວນມາຍັງບັນດາການຈັດຕັ້ງພາກລັດ, ເອກະຊົນ, ບັນດາທຸລະກິດຫ້າງຮ້ານ, ບັນດາຊັ້ນຄົນ ແລະ ອົງການຈັດຕັ້ງໃນສັງຄົມຜູ້ມີກຳລັງຊັບ, ມີວັດຖຸສາມາດປະກອບສ່ວນຊ່ວຍເຫຼືອພໍ່ແມ່ປະຊາຊົນທີ່ພວມຫຍຸ້ງຍາກສັບສົນທີ່ສຸດໃນປະຈຸບັນ ຊຶ່ງບັນດາທ່ານ ຫຼື ບັນດາພາກສ່ວນຕ່າງໆ ສາມາດພົວພັນໂດຍກົງ ຫາກົມສັງຄົມສົງເຄາະກະຊວງແຮງງານ ແລະ ສະຫວັດດີການສັງຄົມທີ່ເບີໂທ: 021 213005, 222776 ຫຼື 020 5552 1811, 2222 5185, 2222 8154, 5567 5089, 2223 2212, 5567 6987.
ຂ່າວ: ເສດຖະກິດ-ສັງຄົມ