ວັນທີ 14 ພະຈິກ ປີ 2000 ຫຼືມື້ນີ້ເມື່ອ 16 ປີທີ່ແລ້ວ ເປັນມື້ວາງຈຳໜ່າຍຂອງເກມ Final Fantasy IX (FF9) ເທິງເຄື່ອງ PS1 ທີ່ປະເທດສະຫະລັດອາເມຣິກາແລະແຄນາດາ. ໂດຍພາກນີ້ໄດ້ຖືກພັດທະນາດ້ວຍແນວຄິດທີ່ເນັ້ນຄວາມຮຽບງ່າຍ ຜ່ານທີມຂອງເກມທີ່ຄ້າຍກັບໂລກຍຸກກາງ ຫຼັງຈາກທີ່ພາກ 6-8 ໄດ້ມີການນຳເທັກໂນໂລຈີດ້ານວິທະຍາສາດເຂົ້າມາເປັນພລ໋ອດຂອງເລື່ອງ. 

ທາງດ້ານ Gameplay ຂອງການປະຈົນໄພໃນພາກ 9 ນີ້ ມີການນຳເອົາ “ມູເກິ້ນ” (Moogle) ມອນສເຕີ້ສີຂາວມີປີກສຸດໜ້າຮັກເຂົ້າມາມີບົດບາດຫຼາຍຂຶ້ນ, ໂດຍໂຕມູເກິ້ນນີ້ຈະໂພ່ມາເປັນຈຸດເຊບທີ່ຜູ້ຫຼິ້ນສາມາດກົດເອີ້ນໃຊ້ໄດ້ທຸກເທື່ອໃນເວລາທີ່ຢູ່ສາກແຜນທີ່ ຫຼືແມ້ແຕ່ໂພ່ມາເປັນໂຕລະຄອນອະທິບາຍວິທີການຫຼິ້ນທົ່ວໄປ (ພຽງກົດປຸ່ມ Select ໃນໜ້າເມນູເວລາເຮົາເລື່ອນເຄີເຊີ້ໄປທີ່ຫົວຂໍ້ຕ່າງໆ). ລວມໄປເຖິງລະບົບ Mognet ທີ່ໃຫ້ຜູ້ຫຼິ້ນເຮັດໜ້າທີ່ບູລຸດໄປສະນີຄອຍສົ່ງເມວໃຫ້ມູເກິ້ນໂຕອື່ນໆ ທີ່ຢູ່ສະຖານທີ່ອື່ນໆທົ່ວໂລກ ແລະຍັງໄດ້ນຳເອົາລະບົບ Active Time Event (ATE) ທີ່ເປັນລະບົບການເບິ່ງເຫດການຂອງໂຕລະຄອນອື່ນທີ່ບໍ່ໄດ້ຢູ່ໃນປາຣ໌ຕີ້ດຽວກັນໃນຕອນນັ້ນແບບ Real-time.

ໃນສ່ວນຂອງການພັດທະນາຄວາມສາມາດໂຕລະຄອນສຳລັບພາກ 9 ຈະເນັ້ນໄປທີ່ຄອນເຊັບຄວາມເຂົ້າເຖິງງ່າຍ ຄື: ອາວຸດຊຸດປ້ອງກັນແຕ່ລະອັນຈະມີສະກິວໃຫ້ຮຽນຮູ້ແຕກຕ່າງກັນໄປ ເຊິ່ງຜູ້ຫຼິ້ນກໍຕ້ອງສວມໃສ່ອາວຸດຊຸດປ້ອງກັນເຫຼົ່ານັ້ນແລ້ວກຳຈັດສັດຕູເພື່ອເກັບຄ່າ AP ມາຕື່ມເກດຈົນເຕັມ ຈຶ່ງຈະສາມາດນຳສະກິວມາໃຊ້ໄດ້ຢ່າງຖາວອນ. 

ທັງນີ້ສະກິວໃນເກມກໍຈະແບ່ງອອກເປັນ 2 ປະເພດໄດ້ແກ່: Active Skill ທີ່ເປັນສະກິວຈຳພວກເວດມົນຫຼືທ່າໄມ້ຕາຍຕ່າງໆທີ່ຕ້ອງກົດໃຊ້ໃນການຕໍ່ສູ້ ແລະ Passive Skill ທີ່ເປັນສະກິວປະເພດເພີ່ມຄວາມສາມາດດ້ານຕ່າງໆຂອງໂຕລະຄອນເຊັ່ນ: ເພີ່ມ HP Max 10%, ປ້ອງກັນການຕິດອາການ Blind (ຕາບອດ) ຫຼື Auto-Haste (ຢູ່ໃນສະຖານະ Haste ຕະຫຼອດເວລາ) ເປັນຕົ້ນ. 

Fact ເລັກນ້ອຍກ່ຽວກັບເກມ Final Fantasy IX

• FF9 ເວີຊັ່ນຍີ່ປຸ່ນນັ້ນວາງຈຳໜ່າຍມາຕັ້ງແຕ່ຊ່ວງກາງປີ 2000 ແລະສາມາດເຮັດຍອດຂາຍໄດ້ເຖິງ 2.65 ລ້ານຊຸດພາຍໃນປີນັ້ນ ແລະຂຶ້ນເປັນເກມທີ່ມີຍອດຂາຍສູງເປັນອັນດັບ 2 ຂອງປີ 2000 ທັນທີ (ເກມທີ່ໄດ້ອັນດັບ 1 ໃນປີນັ້ນແມ່ນ Dragon Quest VII ທີ່ວາງຈຳໜ່າຍເທິງເຄື່ອງ PS1 ຄືກັນ), ເຖິງວ່າຈະເປັນເກມທີ່ມີຍອດຂາຍດີໃນຊ່ວງເວລານັ້ນ ແຕ່ເມື່ອນັບຍອດຂາຍລວມແລ້ວ ພັດໜ້ອຍກວ່າ FF7 ແລະ FF8. ໃນທີ່ສຸດຍອດຂາຍລວມຂອງພາກ 9 ກໍໄປຢຸດຢູ່ທີ່ປະມານ 5.3 ລ້ານຊຸດທົ່ວໂລກ (ນັບຮອດວັນທີ 31 ມີນາ ປີ 2003)

• ເຖິງວ່າຍອດຂາຍອາດຈະສູ້ພາກຍອດນິຍົມແບບພາກ 7 ບໍ່ໄດ້, ແຕ່ເຊື່ອບໍ່ວ່າ FF9 ພັດເປັນພາກທີ່ໄດ້ຄະແນນສະເລ່ຍຈາກທຸກສຳນັກຂ່າວເກມທົ່ວໂລກສູງເຖິງ 93% ແລະເປັນອັນດັບທີ 2 ຮອງຈາກ FF6 ທີ່ເຄີຍລົງໃຫ້ກັບເຄື່ອງ Super Famicom ເມື່ອປີ 1994 ພຽງພາກດຽວເທົ່ານັ້ນ, ໂດຍຫຼາຍໆສຳນັກໃຫ້ຄວາມເຫັນໄປໃນທາງດຽວກັນວ່າຈຸດເດັ່ນຂອງພາກນີ້ແມ່ນ “ເນື້ອເລື່ອງ” ທີ່ມີຄວາມເລິກເຊິ່ງ, ໜ້າຕິດຕາມ ອີກທັງໂຕລະຄອນທຸກໂຕຕ່າງມີທີ່ມາທີ່ໄປເປັນຕາສົນໃຈ ມີການພັດທະນາຄວາມສຳພັນແລະຄວາມຄິດຕາມເນື້ອເລື່ອງທີ່ດຳເນີນໄປ ພ້ອມທັງແຝງແງ່ຄິດຜ່ານບົດສົນທະນາຂອງໂຕລະຄອນໄດ້ເປັນຢ່າງດີ ຖືວ່າເປັນຈຸດແຂງທີ່ໂດດເດັ່ນຂອງພາກນີ້ເລີຍ. 

• ໃນຊ່ວງມື້ວາງຈຳໜ່າຍ FF9 ທີ່ຍີ່ປຸ່ນ ທາງຄ້າຍ Squaresoft ທີ່ຕອນນັ້ນຍັງບໍ່ຄວບລວມກັບບໍລິສັດ Enix ໄດ້ຕັດສິນໃຈປ່ຽນມື້ວາງຈຳໜ່າຍຂອງ FF9 ກະທັນຫັນ ເພື່ອຫຼີກລ່ຽງການວາງຈຳໜ່າຍຕຳກັບ Dragon Quest VII ທີ່ຂາຍໃນຊ່ວງເວລາໄລ່ເລ່ຍກັນ ເຊິ່ງບ່ອນນີ້ເປັນທີ່ຮູ້ກັນດີວ່າຊີຣີ Dragon Quest ນັ້ນເປັນຄືເກມລະດັບວາລະແຫ່ງຊາດຂອງເກມເມີ້ຊາວຍີ່ປຸ່ນກະເຈົ້າ ເຖິງຂະໜາດທີ່ວ່າທາງການຍີ່ປຸ່ນຕ້ອງຂໍຮ້ອງໃຫ້ຄ້າຍເກມ Enix ວ່າຢ່າວາງຈຳໜ່າຍເກມ Dragon Quest ຖືກກັບມື້ທຳມະດາ ເພາະຢ້ານວ່າຄົນຍີ່ປຸ່ນຈະແຫ່ກັນຢຸດວຽກເພື່ອມາຊື້ເກມນີ້ຈົນສະເທືອນເຖິງລະບົບເສດຖະກິດຂອງຍີ່ປຸ່ນເລີຍ. 

• ເພງຮ້ອງປະຈຳຂອງພາກນີ້ມີຊື່ວ່າ Melodies of Life ເຊິ່ງຮ້ອງໂດຍ ຊິຣາໂທຣິ ເອມິໂກະ (Shiratori Emiko) ແລະມີການປະພັນເນື້ອຮ້ອງຂອງເພງນີ້ທັງແບບເວີຊັ່ນພາສາຍີ່ປຸ່ນແລະພາສາອັງກິດ ເຊິ່ງທຳນອງຂອງເພງນີ້ເປັນທຳນອງດຽວກັບເພງ Crossing Those Hills ທີ່ເປັນເພງບັນເລງຕອນຢູ່ເທິງສາກແຜນທີ່ນັ້ນເອງ. 

• ຫາກຜູ້ຫຼິ້ນຖ້າເບິ່ງສາກຈົບຈົນຂຶ້ນຄຳວ່າ The End ຮຽບຮ້ອຍແລ້ວ ໃຫ້ລອງກົດປຸ່ມ R2, L1, R2, R2, ເທິງ, ຄູນ, ຂວາ, ວົງມົນ, ລຸ່ມ, ສາມຫຼ່ຽມ, L2, R1, R2, L1, ສີ່ຫຼ່ຽມ, ສີ່ຫຼ່ຽມ ແລະ Start ກໍຈະສາມາດຫຼິ້ນມິນິເກມ Blackjack ໄດ້. 

• ສຳລັບເວີຊັ່ນ PS1 ຫຼັງຈາກເຮົາດຳເນີນເນື້ອເລື່ອງໄປຈົນຮອດຊ່ວງທີ່ໂລກ Terra ຖືກທຳລາຍແລ້ວ ແລະເຂົ້າສູ່ເນື້ອເລື່ອງໃນແຜ່ນທີ 4 ໃຫ້ເຮົາໄປແຂ່ງປະມູນເພື່ອເອົາຄີໄອເທັມທີ່ມີຊື່ວ່າ: Doga’s Artifact ກັບ Une’s Mirror ມາໄວ້ຄອບຄອງກ່ອນ, ຈາກນັ້ນກໍກັບໄປທີ່ໝູ່ບ້ານ Black Mage ແລ້ວສຳຫຼວດເຄື່ອງ Gramophone ທີ່ຢູ່ພາຍໃນໂຮງແຮມຂອງໝູ່ບ້ານດັ່ງກ່າວ ພໍສຳຫຼວດປຸບສຽງເພງຈະປ່ຽນເປັນເມໂລດີ້ຈາກເກມ Final Fantasy III ເວີຊັ່ນພາສາຍີ່ປຸ່ນ ແລະເພງທີ່ເວົ້ານີ້ຈະບັນເລງໄປເລື້ອຍໆຈົນກວ່າເຮົາຈະອອກຈາກໝູ່ບ້ານນີ້. 

ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!

ທີ່ມາ: online station