ວັນທີ 11ພະຈິກຜ່ານມານີ້, ທີ່ສຳນັກງານນາຍົກລັດຖະມົນຕີ, ໄດ້ມີພິທີມອບໂອນວຽກບັນດາ ຄະນະກໍາມະການທີ່ຂຶ້ນກັບຫ້ອງວ່າການສຳນັກງານນາຍົກໃນເມື່ອກ່ອນ ໄປຂຶ້ນກັບພາກສ່ວນທີ່ກ່ຽວຂ້ອງ, ໂດຍໃຫ້ກຽດເຂົ້າຮ່ວມຂອງທ່ານສອນໄຊ ສີພັນດອນ ຮອງນາຍົກລັດຖະມົນຕີ.
ໃນການມອບໂອນວຽກຄັ້ງນີ້ ປະກອບມີ: ອົງການກາແດງລາວ ແລະ ຄະນະຄຸ້ມຄອງແຫ່ງຊາດ ເພື່ອແກ້ໄຂບັນຫາລູກລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ໄປຂຶ້ນກັບກະຊວງແຮງງານ ແລະ ສະຫວັດດີການສັງຄົມ; ກອງເລຂາຄະນະກຳມາທິການແຫ່ງຊາດເພື່ອແມ່ ແລະ ເດັກ ແລະ ກອງເລຂາຄະນະກຳມາທິການ ແຫ່ງຊາດ ເພື່ອຄວາມກ້າວໜ້າຂອງແມ່ຍິງ ໄປຂຶ້ນກັບສູນກາງສະຫະພັນແມ່ຍິງລາວ, ໃນນັ້ນ, ໄດ້ມອບວຽກງານທັງໝົດ ນັບທັງບັນຊີພະນັກງານ, ສະມາຊິກພັກ ແລະລັດຖະກອນລວມທັງຊັບສິນຕ່າງໆ ເປັນຕົ້ນພາຫະນະຮັບໃຊ້, ງົບປະມານ, ຊັບສົມບັດ, ອຸປະກອນ, ເຄື່ອງໃຊ້ຫ້ອງການ ແລະອື່ນໆ.

ທັງນີ້ກໍ່ເພື່ອເຮັດໃຫ້ອົງການບໍລິຫານລັດມີຄວາມໜັກແໜ້ນເຂັ້ມແຂງ ແຕ່ສູນກາງຮອດທ້ອງຖິ່ນຕາມທິດກະທັດຮັດ, ສົມເຫດສົມຜົນ, ເຄື່ອນໄຫວຄ່ອງຕົວ, ມີປະສິດທິພາບ ແລະ ໄດ້ຮັບປະສິດທິຜົນ, ເຊິ່ງການມອບໂອນດັ່ງກ່າວ, ແມ່ນປະຕິບັດຕາມການຊີ້ນຳຂອງຂັ້ນເທິງກໍ່ຄືກົມການເມືອງສູນກາງພັກ ແລະ ຄະນະເລຂາທິການສູນກາງພັກກ່ຽວກັບທິດທາງແຜນການປັບປຸງສັບຊ້ອນບາງວຽກງານຂອງລັດຖະບານ ເວົ້າລວມ, ເວົ້າສະເພາະ ແມ່ນປະຕິບັດຕາມມະຕິຕົກລົງຂອງກອງປະຊຸມລັດຖະບານປະຈຳເດືອນພຶດສະພາ 2016.
ທ່ານ ເພັດ ພົມພິພັກ ໄດ້ຂຶ້ນລາຍງານຫຍໍ້ກ່ຽວກັບການຈັດຕັ້ງ ແລະ ການເຄື່ອນໄຫວລວມທັງ ໝາກຜົນຈາກການປະຕິບັດພາລະບົດບາດ, ສິດ ແລະ ໜ້າທີ່ຂອງບັນດາຄະນະກຳມະການທີ່ຖືກມອບໂອນ ພ້ອມທັງກ່າວມອບໂອນບັນດາວຽກ ໃຫ້ແກ່ພາກສ່ວນທີ່ກ່ຽວຂ້ອງ. ຫຼັງຈາກນັ້ນ, ທ່ານປະທານສູນກາງສະຫະພັນແມ່ຍິງລາວໄດ້ຕາງໜ້າໃຫ້ສູນກາງສະຫະພັນແມ່ຍິງລາວ ແລະ ກະຊວງແຮງງານ ແລະ ສະຫວັດດີການສັງຄົມ ກໍ່ໄດ້ຂຶ້ນກ່າວຮັບເອົາວຽກທີ່ໄດ້ຮັບການມອບໂອນມາຂຶ້ນກັບພາກ ສ່ວນຂອງຕົນ, ພ້ອມທັງໃຫ້ຄຳໝັ້ນສັນຍາວ່າ: ຈະນຳເອົາວຽກງານທີ່ພັກ-ລັດຖະບານ ກໍຄືປະເທດຊາດ ແລະປະຊາຊົນມອບໝາຍໃຫ້ ໃນຄັ້ງນີ້ ໄປສືບຕໍ່ຈັດຕັ້ງຜັນຂະຫຍາຍຕາມແນວທາງຂອງພັກ, ນະໂຍບາຍຂອງພັກ ແລະ ລັດຖະບານໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ້.
ໃນໂອກາດນີ້ທ່ານຮອງນາຍົກລັດຖະມົນຕີ ໄດ້ເນັ້ນໃຫ້ສູນກາງສະຫະພັນແມ່ຍິງ ແລະ ກະຊວງແຮງງານ ແລະ ສະຫວັດດີການສັງຄົມ ກໍຄືພາກສ່ວນທີ່ກ່ຽວຂ້ອງ ກັບວຽກງານທີ່ໄດ້ຮັບການມອບໂອນໃນຄັ້ງນີ້ ຈົ່ງເອົາໃຈໃສ່ຕື່ມບາງດ້ານເປັນຕົ້ນ ຮີບຮ້ອນປັບປຸງນິຕິກຳຕ່າງໆກ່ຽວຂ້ອງກັບການຈັດຕັ້ງ ແລະການເຄື່ອນໄຫວວຽກງານຂອງຕົນ ໃຫ້ສຳເລັດໂດຍໄວ ທັງນີ້ກໍ່ເພື່ອຮັບປະກັນແກ່ການຈັດຕັ້ງປະຕິບັດວຽກງານທີ່ຢູ່ພາຍໃຕ້ຄວາມຮັບຜິດຊອບຂອງຕົນ ໃຫ້ມີຜົນສຳເລັດຕາມລະດັບຄາດໝາຍ; ປະຕິບັດຕາມຫຼັກການຂອງພັກ ແລະລະບຽບກົດໝາຍຂອງລັດຢ່າງເຂັ້ມງວດ, ໂດຍສະເພາະລະບອບແບບແຜນວິທີເຮັດວຽກ, ກົນໄກການຈັດຕັ້ງປະຕິບັດວຽກງານ ໃຫ້ແທດເໝາະກັບສະພາບ ແລະ ເງື່ອນໄຂຕົວຈິງໃນປະຈຸບັນກໍ່ຄືອະນາຄົດໃຫ້ໄດ້ຮັບຜົນດີ.

ຂ່າວ: ລາວພັດທະນາ