ໃນຕອນເຊົ້າມື້ນີ້ ວັນທີ 10 ພະຈິກ 2016 ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດເທື່ອທີ VIII ໄດ້ດຳເນີນຕໍ່ ໂດຍການເປັນປະທານ ຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ທີ່ປະຊຸມມີ ຜູ້ແທນເຂົ້າຮ່ວມ ໄດ້ຮັບຟັງການຂຶ້ນຜ່ານຮ່າງກົດໝາຍວ່າດ້ວຍການຄຸ້ມຄອງເຄມີ.
ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານໄດ້ຍົກໃຫ້ເຫັນ ເຖິງຄວາມຈຳເປັນ ໃນການສ້າງກົດໝາຍວ່າດ້ວຍການຄຸ້ມຄອງເຄມີ ເພື່ອເປັນບ່ອນອີງ ແລະ ການຄຸ້ມຄອງເຄມີໃນທຸກດ້ານທົ່ວປະເທດ. ປະຈຸບັນນີ້ ການນຳໃຊ້ສານເຄມີ ຕິດພັນກັບຊີວິດປະຈຳວັນ ບໍ່ວ່າຈະເປັນວຽກງານອຸດສາຫະກຳ, ກະສິກຳ ແລະ ອື່ນໆ ນັບມື້ນັບເພີ່ມຂຶ້ນ, ການປະສານສົບທົບລະຫວ່າງສູນກາງ ແລະ ທ້ອງຖິ່ນກ່ຽວກັບວຽກງານດ້ານເຄມີ ເພື່ອເຜີຍແຜ່ຂໍ້ມູນຂ່າວສານກ່ຽວກັບຜົນໄດ້ຜົນເສຍຈາກສານເຄມີ ຍັງບໍ່ທັນກ້ວາງຂວາງ ເຮັດໃຫ້ປະຊາຊົນໃນຂົງເຂດ ວຽກງານຕ່າງໆຍັງໃຊ້ສານເຄມີຢ່າງຊະຊາຍ ບໍ່ຖືກຕ້ອງຕາມມາດຕະຖານ ເຮັດໃຫ້ເປັນອັນຕະລາຍຕໍ່ຄົນ ແລະ ສິ່ງແວດລ້ອມ.
ຮອດເວລາແລ້ວທີ່ຕ້ອງໄດ້ມີກົດໝາຍຄຸ້ມຄອງໃຫ້ຖືກຕ້ອງ ເລີ່ມຈາກການຄຸ້ມຄອງການນຳເຂົ້າສານເຄມີຕ່າງໆ, ການເກັບຮັກສາໃຫ້ຖືກຕ້ອງ, ກວດກາອາຍຸການນຳໃຊ້ໃຫ້ຊັດເຈນ, ການນຳໃຊ້ໃນປະລິມານທີ່ເໝາະສົມ ແລະ ມີການບຳບັດສານເຄມີໃຫ້ຖືກຕ້ອງຕາມຫຼັກວິຊາການ. ຈາກນັ້ນ ບັນດາຜູ້ແທນແຕ່ລະເຂດເລືອກຕັ້ງ ໄດ້ປະກອບຄຳຄິດຄຳເຫັນໃສ່ຮ່າງກົດໝາຍ ໃຫ້ມີຄວາມສົມບູນ, ສອດຄ່ອງ ແລະ ໃຫ້ສະພາຮັບຮອງເອົາເປັນກົດໝາຍນຳໃຊ້ຢ່າງເປັນທາງການ.
ຂ່າວ: ສຳນັກຂ່າວ ເອບີຊີ