ສຳນັກຂ່າວຕ່າງປະເທດ ລາຍງານໃນວັນທີ 9 ພະຈິກນີ້ວ່າ ຜົນການນັບຄະແນນສຽງເລືອກຕັ້ງ ປະທານາທິບໍດີ ສະຫະລັດອາເມຣິກາ ຢ່າງເປັນທາງການພົບວ່າ ທ່ານ ໂດນັນ ທຣັມ ຕົວແທນຈາກພັກຣີພາບລິກັນ ໄດ້ຮັບໄຊຊະນະ ກາຍເປັນປະທານາທິບໍດີ ສະຫະລັດອາເມຣິກາ ຄົນທີ 45 ຕໍ່ຈາກ ທ່ານ ບາຣັກ ໂອບາມາ ໂດຍໄດ້ຮັບຄະແນນສຽງສະໜັບສະໜູນ 276 ສຽງ, ໃນຂະນະທີ່ ທ່ານ ນາງ ຮີນລາຣີ ຄລີນຕັນ ຄູ່ແຂ່ງຈາກພັກເດໂມແຄຣັດ ໄດ້ 218 ຄະແນນ.
ທ່ານ ໂດນັນ ທຣັມ ຫລື ຊື່ເຕັມ ໂດນັນ ຈອນ ທຣັມ (Donald John Trump) ເກີດເມື່ອວັນທີ 14 ມິຖຸນາ 1946 ເປັນນັກທຸລະກິດຜູ້ຊົງອິດທິພົນ, ເປັນນັກຂຽນ ແລະ ເປັນທັງຜູ້ດຳເນີນລາຍການທາງໂທລະພາບ, ທ່ານເປັນປະທານເຈົ້າໜ້າທີ່ຜູ້ບໍລິຫານຂອງ ບໍລິສັດ ທຣັມອໍເກໄນເຊຊັນ ຜູ້ພັດທະນາອະສັງຫາລິມະຊັບຢູ່ ສະຫະລັດອາເມຣິກາ, ທັງຍັງເປັນຜູ້ກໍ່ຕັ້ງ ບໍລິສັດ ທຣັມເອນເຕີເທນເມັນຣີສອດ ທີ່ມີກິດຈະການກາສິໂນ ແລະ ໂຮງແຮມຫລາຍແຫ່ງໃນທົ່ວໂລກ ຊຶ່ງດ້ວຍການໃຊ້ຊີວິດທີ່ຫລູຫລາ ແລະ ເປັນຄົນເວົ້າກົງໄປກົງມາ ຈຶ່ງເຮັດໃຫ້ທ່ານມີຊື່ສຽງ ຈົນກ້າວເຂົ້າສູ່ເສັ້ນທາງການເມືອງ ດ້ວຍການລົງຮັບສະໝັກ ເປັນປະທານາທິບໍດີ ສະຫະລັດອາເມຣິກາ ສັງກັດພັກສາທາລະນະ ຫລື ພັກຣີພາບລິກກັນ.
ຕິດຕາມເຮົາທາງFacebook ກົດຖືກໃຈເລີຍ!