ກະຊວງແຜນການ ແລະ ການລົງທຶນ ຮ່ວມກັບອົງການສະຫະປະຊາຊາດ ເພື່ອການພັດທະນາ ( UNDP ) ໄດ້ແຈ້ງໃຫ້ຮູ້ວ່າ: ກອງປະຊຸມໂຕະມົນປະຈຳປີ 2016 ຈະຈັດຂຶ້ນໃນລະຫ່ວາງວັນທີ 24-25 ພະຈິກນີ້, ທີ່ແຂວງແຂວງວຽງຈັນ, ພາຍໃຕ້ຫົວຂໍ້ ” ເລັ່ງລັດການຈັດຕັ້ງປະຕິບັດແຜນພັດທະນາເສດຖະກິດ -ສັງຄົມ 5 ປີ ຄັ້ງທີ VIII         (2016-2020) ເພື່ອນຳປະເທດຊາດ ຫຼຸດພົ້ນອອກຈາກສະຖານະພາບ ດ້ອຍພັດທະນາ ແລະ ບັດລຸເປົ້າໝາຍການພັດທະນາແບບຍືນຍົງ”, ກອງປະຊຸມດັ່ງກ່າວແມ່ນ ສ່ວນໜຶ່ງຂອງຂະບວນການກອງປະຊຸມໂຕະມົນລະດັບສູງ, ຊຶ່ງເປັນກົນໄກໃນການຊຸກຍູ້ການພັດທະນາ ແລະ ເນື່ອງຈາກເປັນປີທຳອິດຂອງການຈັດຕັ້ງປຕິບັດການພັດທະນາແບບຍືນຍົງ ແລະ ການພັດທະນາເສດຖະກິດ -ສັງຄົມ 5 ປີຄັ້ງທີ VIII, ບວກກັບບັນຫາຕ່າງໆທີ່ລາວເຮົາຍັງປະສົບພົບພໍຢູ່ໃນປັດຈຸບັນ.

ດັ່ງນັ້ນ ກອງປະຊຸມຄັ້ງນີ້ແມ່ນຈະສຸມໃສ່ປຶກສາຫາລື 4 ບັນຫາໃຫຍ່ຄື: ການຈັດຕັ້ງປະຕິບັດເປົ້ໝາຍການພັດ ທະນາແບບຍືນຍົງ, ວຽກງານຄ້ຳປະກັນສະບຽງອາຫານ ແລະ ໂພຊະນາການ, ການປົກປັກຮັກສາສິ່ງແວດລ້ອມ (ພັດທະນາຕາມທິດສີຂຽວ) ແລະ ການປັບຕົວຕໍ່ການປ່ຽນແປງຂອງສະພາບດິນຟ້າອາກາດ  ແລະ ການຮັບມືກັບໄພພິບັດ ແລະ ຂອດການຮ່ວມມືປະສານງານກັບຄູ່ຮ່ວມພັດທະນາ ເພື່ອຈັດຕັ້ງປະຕິບັດວຽກງານດັ່ງກ່າວ ໃຫ້ມີປະສິດທິຜົນ, ປະສົບຜົນສຳເລັດ ແລະ ບັນລຸລະດັບຄາດໝາຍທີ່ວາງໄວ້, ລວມເຖິງການຂໍຄວາມຊ່ວຍເຫຼືອຕ່າງໆຈາກຄູ່ຮ່ວມພັດທະນາ.

ທ່ານ ຮອງລັດຖະມົນຕີກະຊວງແຜນການ ແລະ ການລົງທຶນໃຫ້ຮູ້ວ່າ: ລາວເຮົາເລີ່ມຈັດຕັ້ງປະຕິກອງປະຊຸມໂຕະມົນມາແຕ່ປີ 1983, ຈັດຂຶ້ນເພື່ອເປັນກົນໄກໃນການລະດົມທຶນ ຂອງລັດຖະບານຕໍ່ການຊ່ວຍເຫຼືອຕ່າງໆ ຂອງບັດດາຄູ່ຮ່ວມພັດທະນາ ໃນການພັດທະນາເສດຖະກິດ-ສັງຄົມຂອງປະເທດ, ຕໍ່ມາ ກອງປະຊຸມດັ່ງກ່າວໄດ້ກາຍເປັນເວທີປຶກສາຫາລື ສ້າງຄວາມເຂົ້າໃຈໃຫ້ຄູ່ຮ່ວມພັດທະນາເຖິງສະພາບການ, ຍຸດທະສາດ ແລະ ບູລິມະສິດການພັດທະ ນາຂອງລັດຖະບານ, ເພື່ອເຮັດໃຫ້ການຈັດຕັ້ງປະຕິບັດວຽກງານຮ່ວມກັນມີປະສິດທິຜົນສູງສຸດ

ຂ່າວ: ລາວພັດທະນາ