ສຳນັກຂ່າວຕ່າງປະເທດ ລາຍງານໃນວັນທີ 9 ພະຈິກນີ້ວ່າ ໜ່ວຍເລືອກຕັ້ງສອງໜ່ວຍ ໃນລັດກາລີຟໍເນຍ ຖືກປິດການປ່ອນບັດເລືອກຕັ້ງ ໃນມື້ວານນີ້ (8 ພະຈິກ) ພາຍຫລັງເກີດເຫດກວາດຍິງໃນບໍລິເວນເມືອງອາຊູຊ່າ ຫ່າງຈາກນະຄອນລອສແອັງເຈີລິສ ໄປທາງທິດຕາເວັນອອກ 40 ກິໂລແມັດ ໂດຍທ່ານ ວາເນສຊາ ໂລຊາໂນ ໂຄສົກສຳນັກງານຕຳຫລວດມອດໄຟ ນະຄອນລອສແອັງເຈີລິສ ໄດ້ລະບຸວ່າ ເຫດການດັ່ງກ່າວນີ້ ໄດ້ເຮັດໃຫ້ມີຜູ້ເສຍຊີວິດ 1 ຄົນ ແລະ ບາດເຈັບ 3 ຄົນ.
ເຈົ້າໜ້າທີ່ຕຳຫລວດເມືອງອາຊູຊ່າ ໄດ້ອອກມາແນະນຳໃຫ້ປະຊາຊົນ ຫລີກລ່ຽງການເດີນທາງໄປຍັງພື້ນທີ່ດັ່ງກ່າວ ແລະ ໃຫ້ຫລົບອາໄສຢູ່ພາຍໃນເຄຫະສະຖານ ໃນຂະນະທີ່ຕຳຫລວດ ກຳລັງດຳເນີນການກວດກາສະຖານທີ່ເກີດເຫດ ແລະ ລະດົມກຳລັງອອກນຳຈັບຕົວຜູ້ກໍ່ເຫດທີ່ພວມຫລົບໜີ, ດ້ານເຈົ້າໜ້າທີ່ອົງການປົກຄອງທ້ອງຖິ່ນ ໄດ້ອອກມາແນະນຳໃຫ້ ປະຊາຊົນຜູ້ມີສິດເລືອກຕັ້ງ ອອກໄປບ່ອນບັດເລືອກຕັ້ງຢູ່ໜ່ວຍອື່ນໆແທນ.
ຕິດຕາມເຮົາທາງFacebook ກົດຖືກໃຈເລີຍ!