ອີງຕາມການລາຍງານຂ່າວຂອງສໍານັກຂ່າວ mirror ເມື່ອວັນທີ 8 ພະຈິກ 2016 ວ່າ ເມື່ອວັນທີ 7 ພະຈິກຜ່ານມາ ໄດ້ເກີດອຸປະຕິເຫດເກີດຂຶ້ນ ຢູ່ກອງຖ່າຍທໍາ ຮູບເງົາ ແອັກຊັ່ນ Masthigudi ໄດ້ເຮັດໃຫ້ Anil Kumar ແລະ Raghav Uday ນັກສະແດງຄົນອິນເດຍ 2 ຄົນເສຍຊີວິດ
ຕາມລາຍງານໄດ້ບອກວ່າ ເຫດການດັ່ງກ່າວ ເກີດຂຶ້ນໃນຂະນະທີ່ພວກເຂົາ ຖ່າຍທຳ ສາກກະໂດດອອກມາຈາກ ຍົນເຮລິຄອບເຕີ ທີ່ບິນຕໍ່າ ເທິງເຂື່ອນເກັບນໍ້າ Thippagondanahalli ທາງທິດຕາເວັນຕົກ ເມືອງບັງຄາລໍ ແຕ່ກັບເກີດເລື່ອງທີ່ບໍ່ຄາດຄິດຂຶ້ນ ເມື່ອທັງສອງຄົນຈົມນໍ້າ ແຕ່ເມື່ອທາງເຮືອກູ້ໄພມາຮອດ ທັງສອງກໍເສຍຊີວິດແລ້ວ, ລາຍງານຍັງບອກອີກວ່າ ທັງສອງຄົນນີ້ ລອຍນໍ້າບໍ່ເກັ່ງ, ແຕ່ນັກສະແດງອີກຄົນທີ່ຖ່າຍທຳນຳ ລອຍນໍ້າເກັ່ງເລີຍລອດຊີວິດ
ທາງເຈົ້າໜ້າທີ່ຕຳຫຼວດບອກວ່າ ທາງກອງຖ່າຍທຳ ໄດ້ລະເມີດເງື່ອນໄຂໃນການຖ່າຍທຳຮູບເງົາ ເພາະມີຄຳສັ່ງຫ້າມ ຖ່າຍທຳທາງອາກາດ ໃນບ່ອນທີ່ສັ່ງຫ້າມ ແລະໃນນໍ້າ, ເຊິ່ງທາງຕຳຫຼວດກໍກຳລັງສືບສວນຜູ້ຜະລິດຮູບເງົາເລື່ອງນີ້