ສຳນັກຂ່າວຕ່າງປະເທດ ລາຍງານໃນວັນທີ 8 ພະຈິກນີ້ວ່າ ໃນລະຫວ່າງການເດີນທາງຢ້ຽມຢາມຣັດເຊຍ ເພື່ອເຂົ້າຮ່ວມກອງປະຊຸມ ຈີນ-ຣັດເຊຍ ສະຕະວັດທີ 21 ທີ່ນະຄອນເຊັນປີເຕີສະເບີກ ໃນມື້ວັນຈັນທີ 7 ພະຈິກທີ່ຜ່ານມານີ້ ທ່ານ ຫລີເຄີ່ສຽງ ນາຍົກລັດຖະມົນຕີ ແຫ່ງ ສປ ຈີນ ແລະ ທ່ານ ດິມິທຣີ ເມດເວເດບ ນາຍົກລັດຖະມົນຕີຣັດເຊຍ ໄດ້ຮ່ວມກັນເປັນສັກຂີພິຍານ ໃນການລົງນາມຂໍ້ຕົກລົງການຮ່ວມມືສອງຝ່າຍ ລວມ 21 ສະບັບ ໃນຫລາຍຂົງເຂດ ເພື່ອບັນລຸສັກກະຍະພາບໃໝ່ ທີ່ເກີດຂຶ້ນຈາກການຮ່ວມມືທະວິພາຄີ ອັນຈະເປັນຜົນປະໂຫຍດກັບປະຊາຊົນສອງປະເທດ ຕະຫລອດເຖິງການພັດທະນາ ໃນລະດັບພາກພື້ນ.
ທ່ານ ດິມິທຣີ ເມດເວເດບ ໄດ້ກ່າວວ່າ ສອງຊາດກຳລັງຮ່ວມມືກັນ ໃນການສ້າງພື້ນຖານໂຄງລ່າງຂະໜາດໃຫຍ່, ໂຄງການໄຟຟ້າພະລັງງານນິວເຄລຍ ແລະ ລົດໄຟຄວາມໄວສູງ ໂດຍແຕ່ລະໂຄງການ ມີມູນຄ່າຫລາຍຕື້ໂດລາ, ນອກຈາກນີ້ ຍັງມີການຮ່ວມມືຂົງເຂດອື່ນໆອີກຢ່າງຫລວງຫລາຍ.
ຕິດຕາມເຮົາທາງFacebook ກົດຖືກໃຈເລີຍ!