ປະຕິບັດຕາມການຕົກລົງຂອງ ສອງນາຍົກລັດຖະມົນຕີ ລາວ ແລະ ກຳປູເຈຍ, ຄັ້ງວັນທີ 27 ມິຖຸນາ 2016 ທີ່ນະຄອນຫລວງພະນົມເປັນ ແລະ ຄັ້ງວັນທີ 6 ສິງຫາ 2016 ທີ່ນະຄອນຫລວງວຽງຈັນ. ໃນລະຫວ່າງ ວັນທີ 2-4 ພະຈິກ 2016, ຄະນະຝ່າຍລາວ ນຳໂດຍທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ; ຄະນະຝ່າຍກຳປູເຈຍ ນຳໂດຍທ່ານ ລອງ ວິຊາໂລ ຮອງລັດຖະມົນຕີ ກະຊວງການຕ່າງປະເທດ ແລະ ຮ່ວມມືສາກົນ ໂດຍມີບັນດາການນໍາຂອງແຂວງ ທີ່ກ່ຽວຂ້ອງສອງປະເທດ ແລະ ຜູ້ຕາງຫນ້າ ຈາກບັນດາກະຊວງ, ຂະແໜງການຂອງລາວ ແລະ ກຳປູເຈຍ ເຂົ້າຮ່ວມ.
ສອງຝ່າຍ ໄດ້ດຳເນີນການສຳຫລວດ ພູມີປະເທດຕົວຈິງ ແລະ ປຶກສາຫາລື ຈຸດຈະສ້າງຂົວຂ້າມເຊລຳເພົາ ແລະ ຈຸດທີ່ຈະສ້າງດ່ານສາກົນ ບໍລິເວນບ້ານເວີນຍາງ, ເມືອງມູນລະປະໂມກ, ແຂວງຈຳປາສັກ; ດ່ານເວີນຄາມ, ເມືອງໂຂງ ແຂວງຈຳປາສັກ ແລະ ດ່ານເຊປຽນ (ດ່ານ48), ບ້ານຫາດໃຫຍ່ ເມືອງສະໜາມໄຊ ແຂວງອັດຕະປື.
ການລົງສຳຫລວດ ຢູ່ພື້ນທີ່ຕົວຈິງໃນຄັ້ງນີ້, ເປັນການປະຕິບັດ ຕາມເຈດຕະນາລົມ ແລະ ຄວາມມຸ້ງມາດປາດຖະໜາ ຂອງສອງພັກ ແລະ ລັດຖະບານ ຂອງສອງປະເທດລາວ ແລະ ກຳປູເຈຍ ທີ່ຢາກເອື້ອອຳນວຍຄວາມສະດວກ ໃຫ້ແກ່ການໄປມາຫາສູ່ກັນ ລະຫວ່າງ ປະຊາຊົນສອງຊາດ, ການທ່ອງທ່ຽວ, ການຄ້າຂາຍ, ແລກປ່ຽນສິນຄ້າ, ການລົງທຶນ ແລະ ການຮ່ວມມື ຊ່ວຍເຫລືອຊຶ່ງກັນ ແລະ ກັນ ທັງໃນລະດັບ ສູນກາງ ແລະ ທ້ອງຖິ່ນ, ເພື່ອຍົກລະດັບຊີວິດການເປັນຢູ່ ຂອງປະຊາຊົນ ຢູ່ຕາມບໍລິເວນຊາຍແດນ ໃຫ້ນັບມື້ດີຂຶ້ນກວ່າເກົ່າ.
ອີງໃສ່ຜົນການສຳຫລວດພື້ນທີ່ຕົວຈິງ, ສອງຝ່າຍໄດ້ປຶກສາຫາລື ແລະ ແລກປ່ຽນຄວາມເຫັນນໍາກັນ ຢ່າງກົງໄປກົງມາ ແລະ ຊອກວິທີທາງ ເພື່ອເຮັດແນວໃດ ໃຫ້ມີການເປີດ ແລະ ຍົກລະດັບດ່ານ, ສ້າງຂົວຂ້າມເຊລໍາເພົາໂດຍໄວ, ພ້ອມທັງຈະນໍາເອົາ ຜົນຂອງການສໍາຫລວດ ພື້ນທີ່ຕົວຈິງຄັ້ງນີ້ ລາຍງານຂັ້ນເທິງຂອງຕົນໃຫ້ການຊີ້ນໍາ. ການພົບປະ ແລະ ການສຳຫລວດ ພື້ນທີ່ຕົວຈິງໃນຄັ້ງນີ້ ໄດ້ດຳເນີນໄປດ້ວຍບັນ ຍາກາດແຫ່ງໄມຕີຈິດ ມິດຕະພາບທີ່ດີນຳກັນ ແລະໄດ້ລົງນາມ ໃນບົດບັນທຶກຮ່ວມກັນ ເພື່ອເປັນບ່ອນອີງໃນການຮ່ວມມື ໃນຕໍ່ໜ້າ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!