ຄວາມຕຸ້ຍ ເປັນສາເຫດໜຶ່ງທີ່ເຮັດໃຫ້ເກີດບັນຫາສຸຂະພາບຢ່າງຫຼວງຫຼາຍ ລວມຮອດພາວະໄຂມັນໃນເສັ້ນເລືອດສູງ, ພະຍາດນີ້ເປັນພະຍາດໜຶ່ງທີ່ຈະບໍ່ສະແດງອາການອອກມາໃຫ້ເຮົາເຫັນ, ຈາກການສຶກສາພົບ ແລະຢືນຢັນວ່າ: ພາວະຄໍເລດເຕີລໍໃນເສັ້ນເລືອດສູງ ເປັນສາເຫດເຮັດໃຫ້ຫຼອດເລືອດແດງແຂງ, ຕີບ ແລະຈະເຮັດໃຫ້ເກີດພະຍາດຫົວໃຈຂາດເລືອດ ຫຼືເກີດພະຍາດສະໝອງຂາດເລືອດ ເຊິ່ງເປັນອັນຕະລາຍຫຼາຍ, ມື້ນີ້ເຮົາມີວິທີຫຼຸດໄຂມັນໃນເສັ້ນເລືອດ ມາແນະນຳໃຫ້ທ່ານຜູ້ອ່ານປະຕິບັດນຳກັນ
- ຄວບຄຸມອາຫານ: ໂດຍການບໍ່ກິນອາຫານທີ່ມີໄຂມັນຫຼາຍເກີນໄປ, ຫຼຸດປະລິມານອາຫານທີ່ມີສານຄໍເລດເຕີລໍສູງ, ຫຼີກລຽງອາຫານປະເພດເຄື່ອງໃນສັດ, ສະໝອງສັດ, ຕັບງົວ, ຕັບໝູ, ໜັງເປັດໜັງໄກ່, ໄຂ່, ຫອຍແຄງ, ປາຫມຶກ, ໄຂ່ປາ ເປັນຕົ້ນ, ຖ້າຫາກເຮົາຄວບຄຸມອາຫານປະເພດນີ້ໄດ້ກໍຈະເຮັດໃຫ້ໄຂມັນໃນເສັ້ນເລືອດຫຼຸດລົງ
- ໝັ່ນອອກກຳລັງກາຍ: ເປັນການເພີ່ມການເຜົາຜານອາຫານ ໂດຍສະເພາະແມ່ນຄໍເລດເຕີລໍ, ຍັງຊ່ວຍເພີ່ມລະດັບ ເຮດດີແອວໃນເລືອດ ເຊິ່ງເປັນໂຕຊ່ວຍປ້ອງກັນການເກີດຫຼອດເລືອດແດງແຂງໂຕ
- ຫຼຸດຄວາມຕຸ້ຍ: ດ້ວຍວິທີການທີ່ຖືກຕ້ອງ ນັ້ນກໍຄືການຄວບຄຸມອາຫານ, ຮ່ວມກັບການອອກກຳລັງກາຍຕະຫຼອດ ເພື່ອເຮັດໃຫ້ຮ່າງກາຍໄດ້ສຸຂະພາບດີ ແລະຫຼຸດຫຸ່ນອີກດ້ວຍ
- ເຊົາສູບຢາ: ສຳລັບຄົນທີ່ສູບຢາກໍຄວນເຊົາ ເພາະຈະເຮັດໃຫ້ເກີດພະຍາດມະເຮັງປອດ, ເກີດການອັກເສບຂອງຫຼອດລົມ, ຫຼອດລົມອຸດຕັນ, ຢາສູບຍັງເຮັດໃຫ້ເກີດພະຍາດຫົວໃຈຂາດເລືອດອີກດ້ວຍ
- ເຂົ້າຮັບການຮັກສາຈາກແພດ: ບາງຄົນທີ່ເປັນຮ້າຍແຮງ ຕ້ອງໄດ້ໃຊ້ຢາປັບລະດັບໄຂມັນ ເຊິ່ງແພດຈະເປັນຜູ້ຊີ້ນຳ ແລະຕິດຕາມການຮັກສາ
ສຳຫຼັບທ່ານທີ່ຮັກສຸຂະພາບ ຕິດຕາມເລື່ອງດີດີ ກົດໄລຄ໌ເລີຍ!
ifram FB ວິທະຍາສຶກສາ