ຫົວໜ້າກອງກວດກາພາສີປະຈໍານະຄອນຫລວງວຽງຈັນ ໃຫ້ຮູ້ວ່າ: ໃນລະຫວ່າງກາງເດືອນກັນຍາທີ່ຜ່ານມາ ເຈົ້າໜ້າທີ່ກອງກວດກາພາສີຂອງຕົນ ໄດ້ປະຕິບັດໜ້າທີ່ວຽກງານວິຊາສະເພາະໃນການຕ້ານ ແລະ ສະກັດກັ້ນການຄ້າຂາຍເຖື່ອນລຽບຕາມຊາຍແດນ, ພາຍໃນຂອບເຂດຄວມຮັບຜິດຊອບ ຕາມລະບຽບກົດໝາຍ ແລະ ໄດ້ກວດພົບເຫັນພາຫະນະຈໍານວນໜື່ງທີ່ເຂົ້າມາບໍ່ຖືກຕ້ອງ ແລະ ນຳໃຊ້ໃບແຈ້ງພາສີເປັນລາຍລະອຽດ (iM4) ແລະ ໃບຢັ້ງຢືນການເສຍພາສີ (ບໍ9) ທີ່ມີການປອມແປງເພື່ອໄປຂຶ້ນທະບຽນ.
ດັ່ງນັ້ນ ທາງເຈົ້າໜ້າທີ່ ກອງກວດກາພາສີຈຶ່ງໄດ້ກັກພາຫະນະດັ່ງກ່າວໄວ້ຊົ່ວຄາວຢູ່ກອງກວດກາພາສີນະຄອນຫລວງ ຊຶ່ງມີລາຍລະອຽດດັ່ງນີ້: ລົດກະບະ ຍີ່ຫໍ້ TOYOTA ແລະ MITSUBISHI ລຸ້ນ VIGO ແລະ TRITON 4 ຄັນ; ລົດເກັງ ຍີ່ຫໍ້ TOYOTA ແລະ AUDI ລຸ້ນ MARK II ແລະ R8 2 ຄັນ; ລົດຈິບ ຍີ່ຫໍ້ TOYOTA ລຸ້ນ FORTUNER 1 ຄັນ; ລົດຈິບ ຍີ່ຫໍ້ TOYOTA ລຸ້ນ LANDCRUISER 3 ຄັນ; ລົດຈິບ ຍີ່ຫໍ້ LEXUS ລຸ້ນ XL 570 ຈຳນວນ 4 ຄັນ ແລະ ລົດຈັກຍີ່ຫໍ້ SUSUKI ລຸ້ນ SAMASH ຈຳນວນ 1 ຄັນ ລວມທັງໝົດ 15 ຄັນ ເພື່ອດຳເນີນການສະສາງຄະດີຕາມລະບຽບກົດຫມາຍ ແລະ ມາຮອດວັນທີ 31 ຕຸລາທີ່ຜ່ານມາ ເຈົ້າຂອງພາຫະນະດັ່ງກ່າວ ກໍ່ໄດ້ເຂົ້າມາຕິດຕໍ່ພົວພັນ ເພື່ອດໍາເນີນຕາມລະບຽບຫຼັກການໃຫ້ຖືກຕ້ອງ.
ຫົວໜ້າກອງກວດກາພາສີນະຄອນຫລວງວຽງຈັນ ຍັງໃຫ້ຮູ້ອີກວ່າ: ໃນສົກປີ 2015-2016 ສາມາດຈັດຕັ້ງປະຕິບັດໄດ້ 8 ຕື້ກວ່າກີບ ເທົ່າກັບ 36,02% ຂອງແຜນການປີ ແລະ ສາມາດມ້າງລັກລອບໜີພາສີໄດ້ 175 ຄະດີ, ຕົກເປັນມູນຄ່າກວ່າ 12 ຕື້ກີບ ໃນນັ້ນ ສະສາງແລ້ວ ຈຳນວນ 163 ຄະດີ, ພ້ອມຄ່າປັບໃໝເປັນເງິນທັງໝົດ 3 ຕື້ກວ່າກີບ.
ຂ່າວ: ສຳນັກຂ່າວ ເອບີຊີ