ສຳນັກຂ່າວຕ່າງປະເທດ ລາຍງານໃນວັນທີ 3 ພະຈິກຜ່ານມານີ້ວ່າ ທ່ານ ເລຫາຍບີງ ໂຄສົກກະຊວງການຕ່າງປະເທດຫວຽດນາມ ໄດ້ຖະແຫລງວ່າ ຫວຽດນາມຊົມເຊີຍປະທານາທິບໍດີຟີລີບປີນ ທີ່ໄດ້ແກ້ໄຂບັນຫາເຮືອຫາປາ ແລະ ຊາວປະມົງຫວຽດນາມ ບົນຈິດໃຈມະນຸດສະທຳ.
ທັງນີ້ ເນື່ອງຈາກທ່ານ ໂຣດຣິໂກ ດູເຕີເຕ ປະທານາທິບໍດີຟິລິບປິນ ໄດ້ມີຄຳສັ່ງໃຫ້ປ່ອຍຕົວ ຊາຍຊາວປະມົງຫວຽດນາມ ຈຳນວນ 17 ຄົນ ທີ່ຖືກເຈົ້າໜ້າທີ່ຟິລິບປິນຈັບກຸມຕົວ ເມື່ອວັນທີ 8 ກັນຍາທີ່ຜ່ານມາ ດ້ວຍຂໍ້ຫາລ່ວງລ້ຳນ່ານນ້ຳຂອງຟິລິບປິນ ໂດຍໃນພິທີກ່າວອຳລາ ທ່ານ ດູເຕີເຕ ໄດ້ກ່າວຕໍ່ນັກການທູດ ແລະ ເຈົ້າໜ້າທີ່ຂອງລັດວ່າ ທ່ານໄດ້ສັ່ງໃຫ້ມີການຖອນຂໍ້ກ່າວຫາ ຕໍ່ບັນດາຊາວປະມົງຫວຽດນາມກຸ່ມນີ້ ເນື່ອງຈາກຜົນການສືບສວນພົບວ່າ ທັງໝົດເດີນທາງເຂົ້ານ່ານນ້ຳຟິລິບປິນ ພຽງເພື່ອຫລີກລ່ຽງສະພາບອາກາດທີ່ຮຸນແຮງເທົ່ານັ້ນ.
ຕິດຕາມເຮົາທາງFacebook ກົດຖືກໃຈເລີຍ!